簡易晚餐

今晚又係簡易晚餐，

氣炸雞扒和肉碎腸仔意粉，

快靚正，

又夠飽，

啱哂我啦!

粉絲蝦煲

雪櫃冰箱仲有10隻大蝦，

所以今日要清嘅係蝦；

我哋一家都鐘意食粉絲，

加埋棵娃娃菜落個煲仔度，

呢個粉絲蝦煲就更豐富啦!

茄子燴雞絲

下星期，

我、老公和母親大人會出外玩幾日，

所以今日要開始清冰箱物資呀!

今日要清嘅係雞扒；

茄子燴雞絲，

唔記得加咸魚添，

唔係仲惹味呀!

肉碎蒸雞蛋

其實我好鐘意食呢個肉碎蒸雞蛋架，

將滑蛋和肉碎撈埋落D飯度一齊食，

簡直係人間美味呀!

真係要添飯先得啦!

咖哩牛筋腩配新彊饢

星期五响大亞灣買咗兩個新彊饢返嚟，

當時熱辣辣好想食，

點知小魔怪話要等埋佢先食喎；

所以等到今日，

我就整咗大大鍋咖哩牛筋腩，

用新彊饢點咖哩一齊食，

真係絕配呀!

家常便飯

今日攞咗係大亞灣買嘅鱆魚煲蓮藕湯，

鱆魚太大隻，

落咗半隻啖湯已經好好飲，

下次返去要再買先得，

晚餐仲有燒肉和臘肉炒娃娃菜。

返大亞灣

噚日10月24日(星期四)，

我和老公返大亞灣，

未返去之前响蓮塘食碗粉麵，

就搭京橋巴士去十里銀灘梵高的海落車，

再call滴滴返屋苑；

今次返嚟目的係整洗衣機，

電腦板壞了，

換新的就冇事了；

仲有樓上又開始裝備試水，

物管叫我哋返去睇下有冇漏水；

又換埋個新門卡牌，

總之一次過攪掂哂，

唔使煩呀!

由於要等師傅嚟整嘢，

中午就叫美團外賣呀!

黑椒洋蔥牛仔骨

其實條脷生痱滋真係咩都食唔到，

睇到咁惹味嘅黑椒洋蔥牛仔骨，

有得睇冇得食，

呢個經驗真係好唔開心，

不過大小魔怪就食得好滿足囉!

養生壺~石斛麥冬淮山湯

近日我條脷側生咗粒大痱滋，

食咩都覺得痛，

好火呀!

摷下雪櫃有咩可以煲先得。

約母親大人飲茶

母親大人病咗差不多有十日，

佢嚴重感冒又咳又流鼻水，

擦鼻水擦到個鼻附近位置都流哂血，

病嘅時候又冇胃口食嘢，

睇嚟成個人都瘦哂；

今日我約咗佢出嚟行下兼飲茶，

順便攞係惠州買嘅蝦米俾佢；

我哋去咗沙田大會堂旁邊嘅美心皇宮飲茶，

之後又去咗新城市廣場中庭，

欣賞用lego砌嘅清明上河圖、熊貓、龍和兵馬俑展覽呀!

南乳花生炆豬手

今日買1隻咗有3斤幾嘅豬手，

加埋1碗大花生，

炆咗一大鍋南乳花生炆豬手，

我分咗兩餐嚟食，

豬手炆到好腍，

仲好入味添呀!

家常便飯

今日得我、老公和大魔怪3個人食晚飯，

簡單煮咗3個餸，

香煎三文魚、午餐肉炒蛋和灼菜芯。

又嚟病假

大魔怪9月初先中過covid，

前日又開始流鼻水和咳，

做過檢測唔係中招，

應該係普通感冒呀!

今日除WFH外，

下午又睇埋醫生。

今日上午我煲咗瑤柱皮蛋瘦肉粥，

晚上就煲咗雪梨乾竹庶茅根海底椰湯俾佢潤下喉嚨呀!

豉汁鳳爪炆排骨

原本呢個豉汁鳳爪炆排骨係噚晚嘅餸，

點知摷勻成個雪櫃，

一粒豆豉都冇，

所以我冇煮到呀!

今朝一早去買豆豉，

煮咗一鍋豉汁鳳爪炆排骨，

分兩餐食，

好味道呀!

薯仔控必食~麻辣拌土豆(素)

小魔怪係薯仔控，

佢話薯仔白烚都咁好食呀!

今日我就整咗碟麻辣拌土豆(素)，

先蒸熟薯仔後到煎到薯仔金黃色，

加埋粟米粒、蒜蓉和蔥粒，

調味有麻辣油、豉油、糖、醋、鹽和少少凍滾水，

之後壓散撈勻，

最後加上炸花生便成。

一雞兩食

今日買咗隻雞，

斬件後，

雞肉部份用嚟炆冬菇栗子，

其餘雞背和雞腳等，

就用佢嚟煲雜菌湯，

一雞兩食，

完全冇浪費啦!

同場加映，

小魔怪噚日同朋友去深圳一日遊，

回程時買咗2條瑞士卷做手信呀!

沙爹金菇粉絲肥牛

大小魔怪話想食肥牛，

所以呢日就整咗呢鍋沙爹金菇粉絲肥牛，

個人喜好，

我鐘意先灼一灼D肥牛，

等佢出哂D血水，

食落冇羶味呀!

外賣~PHD

大小魔怪話想食炸雞又想食Pizza，

所以今晚叫外賣~PHD，

一次過滿足哂佢哋兩個嘅願望。

節瓜清補涼雞腳螺頭煲西施骨

响元朗元生堂買咗包清補涼，

今日就用佢嚟煲咗呢個湯，

節瓜清補涼雞腳螺片煲西施骨，

除清補涼外，

我加咗節瓜、雞腳、西施骨、蜜棗、瑤柱仔和螺頭。

一個人的晚餐

前兩日返惠州食得太豐富，

係時候要食清D，

所以一個人的晚餐，

好簡單，

蒸咸雞、灼菜芯和白飯一碗。

帶隊返惠州

噚日星期三，

我和老公帶隊返惠州飲飲食食，

一行6人搭永東巴士去惠州，

點知啱啱入到惠州大巴就死咗火，

我哋即刻call咗2架滴滴車，

車我哋去惠州西湖步行街，

我哋未行街前先去食午飯，

正宗客家菜好味道，

老板娘送咗鍋小米粥請我哋食，

呢餐食咗￥269。

外援

上兩個星期去咗屯門醫院照超聲波(婦科檢查)，

今日下午要去屯門醫院睇報告，

我2點45分左右就到咗，

睇醫生就睇3點15分果個時段，

點知等到4點半左右先輪到我，

見醫生唔夠4~5分鐘就出嚟，

再約期見醫生係2025年8月呀!

今晚晚餐搵外援幫手，

買咗盒咕嚕肉加餸，

再加大豆芽炒肉片和節瓜粉絲蝦米，

3餸冇湯，

白飯任裝。

肉碎意粉

今朝一早我行去天水圍公園做晨運，

行完就去食早餐兼買餸，

老公中午約咗朋友飲茶，

所以中午就煮咗個肉碎意粉做午餐，

用咗日本買嘅意粉醬，

煮法簡易又好味道呀!

快樂蜂

前兩日天氣好清涼架!

但今朝入咗元朗舊屋拜山，

又熱又曬，

真係頂唔順呀!

之後大小魔怪話去快樂蜂食炸雞，

我第一次食快樂蜂炸雞，

嘻嘻，

又真係幾好食喎!

家常便飯

今晚大魔怪女朋友仔嚟食飯，

佢攞咗韓國旅行嘅手信俾我哋添呀!

煲咗個節瓜螺頭煲清補涼，

啖湯超甜，

好正架!

仲有酸菜魚配肥牛加雜丸，

超惹味；

加多碟鮑魚生菜，

3餸1湯，

都好豐富架!

家常小菜

呢幾日我煮咗幾個家常小菜，

XO醬豆角炒雞柳、黑椒洋蔥煮豬扒、

臘肉炒菜芯和節瓜支竹炆排骨，

每個都係送飯一流架!

飲飲食食在元朗

Antia係英國返嚟，

佢話好耐冇入元朗，

所以今日我哋就約係元朗見面啦!

其實我都好耐冇落元朗，

好多舖頭都已經唔同哂，

我同Antia去咗陸記正宗桂林米粉食午餐。

西洋菜咸鴨腎煲西施骨

今日啱啱見到有西洋菜賣，

我拿拿臨買咗2扎$28，

煲咗西洋菜咸鴨腎煲西施骨，

呢個湯有清熱、潤肺和止咳等功效架!

蝦醬豬肉蒸豆腐卜

屋企有樽蝦醬，

所以今餐就用佢嚟整蝦醬豬肉蒸豆腐卜，

加咗豆腐卜嚟墊底，

豆腐卜索哂蝦醬嘅香味，

送飯一流呀!

如果唔加豆腐卜，

加粉絲都一樣咁好味道架!