呢排我胃酸倒流病又發作，
攪到我胃口麻麻哋，
晚餐我煮咗老公至愛嘅銀魚魷魚干蒸梅頭豬肉，
我只食咗少少，
一陣食藥早D瞓，
希望快D好番啦!
食剩幾件叉燒，
用嚟炒飯就最啱啦!
我加咗兩隻雞蛋和4棵菜芯落去一齊炒，
特別好味道呀!
呢個馬蹄土魷蒸肉餅，
我哋一家大細都鐘意食，
而且呢個餸送飯一流，
好味道呀!
今日午飯後，
老公揸車車我和小魔怪返元朗舊屋執嘢，
未開車先食兩球雪糕解解暑先；
返到舊屋老公執咗好多大小魔怪嘅圖書，
又有佢哋嘅學生手冊和功課簿，
睇番佢哋寫嘅字好醜樣呀!
返到屋企5點半，
我哋去新北江食臺味冰點食下午茶餐，
呢餐食咗$130。
8月6日
我、老公和姑奶3個人，
返咗惠州小住3日呀!
係上水食完早餐後，
就去蓮塘口岸過關，
搭永東巴士去惠州，
一落車就去食午餐啦!
呢幾日全香港經歷大暴雨，
不過今日特別嚴重呀!
我住嘅天水圍區都無一幸免，
我家附近嘅天瑞河都差不多滿瀉啦!
明天我和老公會返惠州，
所以簡單蒸咗碟馬蹄土魷蒸肉餅，
和灼埋碟菜芯做晚餐呀!
今日係小魔怪做P牌仔嘅最後一日；
買咗架車後，
老公有時間都會陪小魔怪練車，
一邊從旁指道，
小魔怪都學都唔少嘢架!
慢慢揸唔使急；
襯今晚停咗雨，
我哋又出發去練車啦!
佢哋揸咗去錦綉花園附近明悅軒食晚飯，
呢餐食咗$394，
之後又揸咗去天水圍行咗個圈就返屋企喇!
我見大家咁都鐘意食豬腳薑，
襯噚日去大魔怪家有聚會，
所以早在7月10日時，
我就開始準備整呢煲豬腳薑喇!
呢排天氣咁熱，
每次煲完薑醋待涼後，
我都會放番係雪櫃，
擺5~6日後，
又攞出嚟煲滾佢，
來來回回煲咗5次左右啦!
加咗豬腳和雞蛋後放雪櫃，
又浸多兩三日就食得啦!
今日家庭聚會移師到大魔怪家進行，
我預早大半個月已經煮定一大煲薑醋，
前兩日加埋2隻豬手和30隻雞翼，
仲有一大盒咖哩豬皮蘿蔔魚蛋，
準備拎去大魔怪家開大食會呀!
今日老公話想食涼瓜排骨，
必須安排啦!
買咗個雷公鑿苦瓜$11，
再買多$30腩排，
炆咗呢碟豉汁涼瓜排骨，
今餐1個餸2個人食，
足夠啦!
