蠔油薯仔炆雞翼

今日買咗2磅雞翼，

攞咗10隻雞翼嚟炆薯仔，

呢個餸由細食到大，

一樣咁好味道呀!

川貝海底椰雪梨乾煲西施骨

老公見大魔怪仲有少少咳，

又咁啱見商場有川貝海底椰雪梨乾湯包，

所以就買咗個湯包返嚟啦!

1個湯包料唔多夠，

我加咗少少海底椰和雪梨乾，

再加粟米、紅蘿蔔和瑙施骨一齊煲，

煲2個鐘後，

就等大魔怪放工返嚟飲呀!

冬菇花膠炆鴨腳

 

冰箱有包出咗水嘅花膠仔，

老公話煮咗佢嚟食啦!

所以今日買咗8隻鴨腳，

加埋冬菇仔，

炆咗一大碟冬菇花膠炆鴨腳。

9號風球的晚餐

每次打親風，

天文台都話個風路徑有變數，

所以噚日由3號風球，

到今日中午掛8號風球，

直到晚上7點掛9號風球；

雖然9號風球，

好彩係我家唔係當風位置，

外邊仲係好平靜，

只係落雨呀!

噚日買咗2節蓮藕，

一節用咗嚟煲湯，

另一節就用嚟炆南乳蓮藕支竹木耳排骨呀!

3號風球的晚餐

今日3號風球，

又遇上季候風，

今朝有風又有雨；

去街市買多少少菜，

咁明天真係打風都唔怕啦!

今晚打風晚餐有湯飲，

蓮藕鱆魚綠豆馬蹄紅蘿蔔煲西施骨，

叉燒和薑絲腐乳油麥菜苗，

開得飯啦!

叉燒

噚日去咗做義工，

返到屋企已經好晏，

醃咗嘅叉燒就留番今日先焗嚟食；

咁啱今日大小魔怪又唔返嚟食飯，

我和老公兩個人食咗半份叉燒，

其餘半份就再留番明天先食喇!

清淡D

大魔怪有D咳和頭痛，

請咗病飯係屋企休息，

晚餐佢話想食清淡D，

我整咗菜芯炒牛肉和煎三文魚扒，

唔知算唔算清淡呢!

家常湯水

呢排間唔中我都有煲下唔同種類嘅湯水，

簡簡單單唔複雜，

啱哂我呀!

栗子冬菇炆雞

今日係十一國慶節補假，

大小魔怪都冇出街，

見佢哋留係屋企食飯，

所以一早買咗隻清遠雞和栗子，

晚餐炆咗栗子冬菇炆雞，

加多碟鮑魚生菜，

開得飯啦!

姨甥仔生日會

明天係姨甥亞諾25歲生日，

噚日我哋黃氏家族一齊入沙田提早幫佢慶祝生日。

姐姐準備哂所有生日會美食，

好豐富呀!