今日煲冬瓜，
冬瓜粟米甘筍生熟薏米雞腳煲唐排；
冬瓜皮有利尿消腫功效，
所以連皮煲就最啱喇!
另外，
呢個湯仲有袪濕清熱和利尿等功效，
最啱呢個春夏天飲架!
今晚又係得我哋兩老食晚餐，
蒸咗碟大頭菜蒸鯇魚和灼菜，
我鐘意買鯇魚頭以下嘅部位，
因為佢個魚鲛位嘅魚肉真係好滑，
我超鐘意食呀!
今晚晚餐原本仲有一碟大頭菜蒸鯇魚，
點知大魔怪臨時話唔返嚟食飯，
好彩仲未蒸魚，
今餐有麵豉蒸排骨和灼菜芯，
兩個人夠食啦!
呢排D韭菜花好新鮮，
又脆又嫩，
我買咗$10韭菜花土魷肉絲，
今次唔記得落腰果，
如果落咗仲惹味呀!
天氣咁熱但又想飲湯，
煮呢個蕃茄雞蛋蝦滑湯就最啱喇!
快靚正，
唔使10分鐘就有得飲呀!
之前煮咗一大煲飯，
剩番D冷飯就嚟做炒飯，
今次整咗咸魚雞粒蛋炒飯，
用咸魚嚟炒飯特別惹味，
我唔敢食太多，
食一碗就夠架喇!
呢排香港天氣日日都三十幾度，
梗係要整D涼拌嘢食下啦!
今日就整咗一大盆雜錦大蝦沙律，
雪凍佢嚟食，
未食都覺得爽呀!
我見好耐冇食過牛仔骨，
於是買咗4條牛仔骨返屋企，
用韓國牛肉汁嚟炆，
簡單又好味道，
好送飯呀!
呢兩日香港天氣超級熱，
午餐食咩好???
今日食煎餃配日式冷麵，
涼浸浸，
食完麵都唔會出汗呀!
噚晚老公入房瞓時話冇冷氣，
唔怪得我覺得咁熱啦!
原來部冷氣壞咗，
我仲以為我有病添!
開咗風扇都頂唔順D熱氣，
唯有齊齊出廳瞓，
老公瞓梳化，
我就瞓地下；
點知差不多天光時落大雨行雷又閃電，
攪到我冇覺好瞓呀!
老公即刻搵人嚟整冷氣，
師傅好忙差不多黃昏5點半先嚟，
一check就話部冷氣冇得整，
換過部新冷氣好過啦!
即時可以安裝，
仲要係變頻式冷氣，
安靜、省電和恆溫，
承惠$4200(連安裝)，
裝好冷氣今日我就有覺好瞓啦!
新冷氣
