姐姐好耐之前去新加坡公幹，
買咗幾包海南雞飯醬俾我做手信，
今日就用佢煲咗海南雞飯，
整埋豉油雞翼和灼菜芯，
咁又一餐喇!
新年時去親家奶奶家食飯，
親家奶奶請我食咗呢個親親芒，
一個雪凍咗嘅芒果$10支，
佢真係一個芒果嚟架，
仲有核添架!
以我咁鐘意食芒果嘅人，
真係啱哂我口味；
聽親家奶奶講佢係惠康買架!
搵日我都要去惠康買嚟食先得。
今餐食得健康D，
整咗雜菌炆排骨，
用咗鮮冬菇、雞髀菇、秀真菇和白蘑菇，
加埋雲耳和甘筍絲一齊煮，
齋炒菇菇都好好食架!
响惠州返嚟好想飲湯，
拿拿臨去買舊豬腱番嚟，
摷下雪櫃有咩材料，
蓮子百合麥冬石斛煲豬腱，
配上淮山、龍眼肉、沙參、玉竹、瑤柱仔和蜜棗，
用養生壺煲湯功能，
煲好落少少鹽調味就飲得架喇!
呢個湯有滋陰潤燥、清熱養胃、潤肺安神等功效。
3月8日星期一
今日我和老公，
約埋大伯大伯娘和姑奶，
一行5人返惠州；
落車後即刻去隔離飯店食午飯。
今日38婦女節，
我哋又抽時間去探朱鎧仁小朋友啦!
新抱仔話想食咖哩豬皮蘿蔔魚蛋，
我今朝整過一大盒拎過去大家一齊食，
去到大仔屋企，
又幫手醃咗雞翼整蜜糖煎雞翼，
嘻嘻，
大仔話好耐冇食過煎雞翼，
佢食唔停口添!
新抱仔妹妹整咗酸種麵包，
好成功，
好好味道呀!
依家我屋苑商場嘅雙餸飯$43盒，
如果想食原條魚就要加$5，
燒味雙拼就要$35，
已經算平架啦!
我返咗惠州果幾日，
老公買咗1斤幾大白菜返嚟食，
食咗幾餐都食唔哂；
今日我就用佢嚟煲湯~金銀菜咸鴨腎紅蘿蔔煲豬腱，
呢個湯有清熱潤肺、健脾生津等功效。
3月2日星期一
今日我自己帶母親大人返惠州，
我係上水火車站新開張嘅紅茶食早餐，
順便等母親大人過嚟集合呀!
返到惠州屋企放低行李，
我哋就去對面商場搵食喇!
綠茶餐廳，
香港都有開架!
呢度食咗￥119，
母親大人話如果係香港食，
呢度大約$300左右啦！
之後我帶母親大人行新街市，
母親大人話呢度又大又乾淨，
仲好多嘢賣添呀!
生果買咗￥17，
母親大人洗個頭￥30。
今年新春行大運，
我同老公和他的舊同學，
一行12人，
齊齊由元朗錦田出發，
經過紅磚屋和吉慶圍，
午餐就去錦上路爾巒翠湖飲茶。
