支竹馬蹄羊腩煲

我星期五已經炆定支竹馬蹄羊腩煲，

留番星期六同老公和細仔一齊食，

我哋一路食一路睇善心滿東華，

我哋決定用孫仔名義打電話去捐錢，

我和細仔打咗十次以上先打通捐款電話，

火災無情，

人間有愛。

P.S.英文名串錯應該係Tristan。

材料: 羊腩3磅、馬蹄15粒、冬菇8隻、乾支竹1包、竹庶3節、

粟米1條、薑10大片(拍扁)、紹酒適量、冰糖適量、老抽少許(調色用)

醬料: 大南乳一磚、腐乳4件

腐乳醬: 腐乳4件、糖1茶匙、腐乳汁、麻油少許

做法: 羊腩解凍後，放入鑊內加水、4大片薑、紹酒2湯匙出水8分鐘，

沖洗乾淨後瀝乾水份備用；馬蹄去皮；冬菇浸軟後切半；

竹庶用百潔布擦去表面污物，洗淨後斬件，每支斬開3片；

燒熱油鑊落薑6大片(拍扁)煎香後，加入羊腩和醬料炒勻，

贊紹酒1湯匙炒羊腩數十下，落竹庶、馬蹄、冰糖和足夠熱水，

水要蓋過羊腩面，水滾後轉中小火炆2小時，

熄火唔好開蓋焗至自然涼，放雪櫃雪一晚上；

取出羊腩夾起竹庶後，再煮滾炆多1小時，

加入浸軟支竹和粟米炆多10~15分鐘，

按個人口味加鹽調味和老抽調色，

將羊腩轉入電鍋內加熱就食得啦!

~炆羊腩如果唔夠汁嘅話，記得要加熱水呀!

    

 

大家可以入嚟Facebook讚下我新開嘅Fans專頁呀! 雀后(添飯)Facebook Fan Page