端午節安康

今日係端午節，

大魔怪和女朋友仔返嚟食飯，

小魔怪又約咗朋友返惠州玩；

簡簡單單有豉油雞、

黑椒洋蔥牛仔骨、

蒜蓉炒菜芯、

蒸珍珠立魚和糭，

仲有蕃茄薯仔紅蘿蔔椰菜煲排骨湯添呀!

香煎雞扒

今日冇買餸，

摷到雪櫃有2塊雞扒，

即刻解凍醃咗佢，

整咗呢碟皮脆肉嫩嘅香煎雞扒喇!

今次煎呢塊雞扒有少少巧妙，

我將雞扒肉較厚嘅位置片咗出嚟，

咁塊雞扒表面平滑咗，

煎出嚟就平均易熟架啦!

片起咗嘅雞肉，

又可以煮另一個餸呀!

老干媽花菜炒肉片

今日買咗一個大花菜$10，

個花菜大過我塊面呀!

哈哈，

真係好鬼抵呀!

今日就用咗我至愛嘅老干媽嚟炒花菜肉片，

簡單又好味道，

送飯一流架!

沙田唐宮小聚

噚日包完糭，

今日我就專登出沙田，

攞咗幾隻糭俾母親大人和妹妹佢哋食呀!

姐姐整親隻腳暫時唔食得糯米，

所以今年D糭就唔預佢啦!

約咗係沙田唐宮小聚食午餐，

之後經過新城市廣場中庭，

見到靚靚DIMOO WORLD 迪士尼華麗舞台公仔。

2025愛心糭~客家咸肉糭

自從腰傷舊患發作之後，

我都唔敢拎重嘢，

所以今次包糭，

我分咗4次買材料呀!

今次包咗24隻有咸蛋黃嘅客家咸肉糭，

小魔怪唔鐘意食咸蛋黃，

我就包咗15隻小型糭(冇咸蛋黃)呀!

韭菜雞蛋豬肉餃

好耐冇包餃子啦!

我見屋企有扎韭菜，

拿拿臨買餃子皮和豬肉碎返嚟，

包咗64隻餃子呀!

煎咗10隻餃子俾小魔怪做午餐，

其餘就放入冰箱冷藏，

等幾時食都得啦!

大馬站煲

屋企有盒燒肉，

係我和老公參加咗一個活動攞返嚟的，

真係大盒，

我和老公要分幾餐嚟食，

今餐食咗1/3盒燒肉，

整咗呢個大馬站煲，

燒肉加豆腐、韭菜和蝦醬一齊煮，

真係特別惹味架!

韭黃叉燒炒滑蛋

韭黃叉燒炒滑蛋，

呢個餸真係好耐冇食，

但又係由細食到大嘅餸菜之一，

真係充滿童年回憶呀!

午餐

今日中午有成34度，

熱到爆啦!

簡單煮咗包餃子，

做我和老公兩個人嘅午餐呀!

冬瓜粒湯

天氣咁熱，

係時候要煲冬瓜湯消消暑喇!

今日就煲咗呢個冬瓜粒湯，

材料有冬菇、瑤柱、肉碎和咸蛋，

呢個湯做湯飯特別好食架!

母親大人76歲生日快樂

噚日，

我哋齊齊慶祝母親大人76歲生日呀!

今次妹妹訂咗禾輋海港酒樓，

仲訂咗個房打麻雀，

4點半交廳，

4個大人打牌，

其餘細嘅(包括我)，

就玩遊戲咭，

第一次玩，

都幾好玩喎!

呢餐真係不得了，

碟碟都超大碟，

隻乳豬有半邊枱咁大，

龍蝦包咗3斤，

但我揀咗2隻大龍蝦重3斤13兩，

所以補咗13兩龍蝦差價，

我食完乳豬和龍蝦伊麵，

都已經半飽了，

碟東星斑有雲腿和冬菇，

好惹味架!

松露燒雞雞皮好香脆；

酥酥咁大碟，

我哋12個人係食唔哂架!

母親大人、妹妹和我又食又拎，

好滿足呀!

食飯盒

 

又嚟食飯盒喇!

依家每次都係老公揀餸，

哈哈，

佢喜歡就好，

唔使理我架!

黃豆醬支竹炆牛腩

 

今日用埋另外2條支竹炆牛腩，

我最鐘意呢個餸多汁，

因為黃豆醬汁撈飯真係一流架!

支竹豆腐卜炆火腩

今日經過街市順便買包支竹(無炸)，

返到屋企，

我先發覺原來已經有1包支竹係廚櫃度，

支竹唔擺得太耐，

睇嚟我呢兩日要盡快食哂佢先得喇!

返惠州執屋

事緣係上星期日我帶母親大人、姐姐和姐夫，

去大亞灣玩時，

小魔怪就有咗4個朋友一齊去惠州玩呀!

佢哋係屋企玩得好盡興架!

5個男仔嘛，

唱K、打牌、點外賣和去行夜市，

不過最後事後小魔怪話我知，

電動麻雀枱有問題，

叫我哋上去睇下呀!

所以我和老公噚日就返咗惠州睇下發生咩事呀!

約咗姑奶食午飯後，

佢先回香港。

絲瓜肉片雞蛋湯

今日食清D，

滾咗個絲瓜肉片雞蛋湯，

有菜有肉有蛋又有湯，

真係慳水又慳力呀!

榨菜肉絲蒸米粉

噚日慶祝母親節食完自助餐後，

我同老公都話要食清D呀!

所以今晚就整咗呢個榨菜肉絲蒸米粉，

簡單好味又易做，

仲好好味添架!

配埋我至愛嘅老干媽，

絕配呀!

母親節快樂

今日我哋同大魔怪和女朋友仔，

兩家人一齊慶祝母親節，

兩個後生好識做，

買咗兩扎花送俾我哋兩位母親，

母親節有花收，

好開心呀!

我哋一行7人，

去咗海港城SAVVY食自助午餐!

蕃茄雜菜排骨湯

今日煲咗蕃茄雜菜排骨湯，

象徵式補下鈣質，

唔只補鈣，

蕃茄薯仔湯酸酸甜甜，

生津解渴、健脾開胃，

仲可以加強免疫力添架!

小休

舊患嘅嘢，

真係話嚟就嚟；

我嘅腰痛時不時都會發作架啦!

前兩日腰骨都已經有少少痛，

唔嚴重，

叫老公幫手搽按摩膏就算；

但到咗星期二晚，

腰骨開始痛到爆，

我諗住早D瞓休息下，

點知瞓底咗就起唔到身，

痛到亞媽都唔認得，

唯有拿拿臨去睇急症，

等咗5個半鐘先睇到我，

檢查完一輪話入醫院check下穩陣D，

就係咁，

我入咗醫院瞓咗一晚，

今日星期四先出院。

豉汁涼瓜炆燒鴨

今日買咗個買咗個肥嘟嘟深綠色的涼瓜~雷公鑿，

用嚟炆燒鴨，

涼瓜和燒鴨都係老公至愛，

所以今餐餸啱哂佢口味呀!

四日三夜惠州行

五月二日星期五

我、母親大人、姐姐和姐夫，

一行4人齊齊返惠州玩幾日；

我哋約咗9點15分係上水火車站等，

食燒賣做早餐後就搭小巴經蓮塘關口過關喇!

由於係五一黃金週，

全中國都人多車多，

平時1小時15分鐘車程，

今日就要成3小時，

返到惠州家放低行李，

我哋就去飲茶和行超市。

家常便飯

今日大魔怪和女朋友一齊返嚟食飯，

我一早煲咗靚湯，

花膠螺片粟米紅蘿蔔淮山豬腱煲雞腳，

仲整埋大家至愛嘅手撕雞和蒸魚，

唔少得西蘭花炒肉片和菜脯炒蛋，

加埋大魔怪買返嚟加餸嘅叉燒，

開得飯啦!