今朝醃定咗D雞膇，
晚餐就用氣炸鍋整咗呢碟氣炸雞膇，
唔使開鑊炸，
廚房冇咁熱囉!
附上中午食嘅煎餃和意粉，
咁又過咗一日啦!
今日大魔怪女朋友仔嚟食飯，
4餸1湯，
白飯任裝，
天氣太熱，
開冷氣緊係唔少得啦!
食飯時我要開把風扇吹住自己，
先有胃口食飯呀!
呢兩日我和老公都係簡單煮食，
因為大小魔怪都唔返嚟食晚飯，
天氣咁熱，
兩個人就懶得煮，
所以買飯盒就最啱啦!
不過呢，
我有時都會煮D簡單餸，
呢碟XO醬蝦仁炒青瓜，
好送飯又惹味，
都唔錯架!
老公好鐘意食涼瓜，
所以就買咗個肥肥深綠色的涼瓜~雷公鑿；
今次唔炆排骨喇!
而係炒牛肉，
豉汁涼瓜炒牛肉，
好送飯架!
今日煲羊肚菌鹿茸菇淮山豬腱湯，
加埋紅蘿蔔、粟米和蜜棗，
呢個湯水有提高免疫力、健脾胃、
增強體質、補腦提神等功效架!
唔好講笑，
呢個湯真係好清香有菇味，
而且所有材料都可以食落肚，
老公話好環保呀!
商場街市仔裝修重開，
魚檔多咗少少唔同種類嘅魚，
(不過都係普通嘢)
今日見有黃立鯧賣一條$35，
唔算貴啦!
所以買咗一條嚟煎，
煎香後淋上蒸魚豉油，
啖啖肉，
好味道呀!
噚日我已經鹵定牛腱和金錢肚，
今日就將佢哋切片，
加入我自己調味嘅麻辣汁，
整咗呢碟涼麻辣牛腱金錢肚，
天氣咁熱，
食呢個涼拌菜，
簡直正到冇朋友啦!
今日又用大亞灣買嘅淡口大馬友，
蒸咗呢碟咸魚蒸肉片，
老公之前已經將咸魚斬件，
我就揀咗幾件咸魚肉，
加埋梅頭豬肉，
蒸完出嚟咸魚特別香，
睇嚟老公今日又要添飯啦喂!
上次去山姆買咗包有機鹿茸菇，
今日就浸咗少少嚟炒雞髀肉，
鹿茸菇食落爽爽脆脆，
老公都讚話好食呀!
今日襯天氣好，
早上晨運我去咗天水圍公園和天水圍運動場，
30度行咗一個圈，
已經出一身汗，
真係好熱架!
晚餐得我和小魔怪食，
咁熱唔煮啦!
叫外賣算喇!
今次試下用美團KeeTa點外賣，
有好多優惠呀!
今晚大小魔怪都係屋企食飯，
簡單煮咗3個餸，
豉汁涼瓜排骨、燒腩仔和蝦仁炒蛋，
唔講咁多，
開飯啦喂!
上星期返廣州，
堂妹買咗包霸王花俾我做手信，
今日就用佢嚟煲咗湯，
霸王花紅蘿蔔煲西施骨，
呢個湯有清熱、润肺、止咳除痰外，
仲有舒緩便秘、排毒等功效架!
今日父親節，
大小魔怪請我哋食晚飯，
原本諗住點外賣，
點知佢哋即興話要落街食呀!
叫咗6個餸、2碗飯、薯粉1碗和4杯豆漿，
店員話滿$360有碟小食送，
我哋叫咗碟沙薑豬腳，
呢餐食咗$396，
多謝大小魔怪。
噚日，
我和老公陪母親大人返廣州探親，
6年冇返去，
唔知廣州變成點呢???
我哋係羅湖搭10點火車直去廣州東站，
每位車費79.5人民幣。
呢架車唔停其他站大約1小時04分後就到啦!
堂姐和堂姐夫廣州揸車嚟表我哋，
首先我哋去食午飯。
今日中午有成34度，
真係熱到爆呀!
响廚房煮完飯真係冇咩胃口食嘢架!
好彩今晚我煮咗黑椒洋蔥牛仔骨，
用洋蔥和牛仔骨撈飯，
今餐我食咗半碗飯呀!
噚日醃定呢盆雞粒，
今晚就用咗氣炸鍋嚟炸熟佢，
一滴油都冇落，
都有脆皮嘅效果，
真係好鬼正架!
我分咗2盆嚟氣炸，
未食完一盆，
另一盆就出爐喇!
今日端午節，
襯大魔怪女朋友仔過嚟食飯，
順便慶祝埋父親節呀!
午餐煲粥食糭，
晚餐就整咗大家愛吃嘅麻辣香鍋，
有雞、豬肚、蝦、雜丸、芝士腸、豆角，
後加蕃薯粉和台灣公仔面呀!
老公晚上約咗朋友，
得番我哋3仔乸食飯，
我都懶得煮，
最方便盲係搵panda幫手啦!
小魔怪負責點餐，
大小魔怪負責食，
而我就負責俾錢呀!
今日買咗$35梅頭瘦肉諗住整叉燒，
見冰箱仲有8隻雞翼，
又攞埋出嚟一齊醃呀!
有叉燒又有雞翼，
今餐好多肉呀!
呢排晨運我好鐘意行天水圍公園，
一來空氣清新D，
二來公園開咗唔少花，
好靚架!
今日係一年一度包糭嘅大日子，
今年準備包廿零隻糭左右，
總共包咗24隻有咸蛋黃嘅客家咸肉糭，
包咗5隻冇咸蛋黃嘅糭俾小魔怪食呀!
每逢星期二、三晚，
大魔怪返夜學，
而小魔怪又唔返嚟食晚飯嘅話，
我都會偷懶唔煮飯，
叫老公下午做完運動後就買個兩餸飯返屋企，
俾我倆嘅晚餐喇!
每次老公都有選擇困難症，
佢話D餸款款都差不多，
一堆堆都睇唔清係咩嚟，
所以揀咗好耐都唔知揀咗咩呀!
大魔怪和女朋友仔，
去日本旅行買咗好多意粉醬俾我，
平時我就用佢嚟整意粉做午餐，
今餐就整咗司華力腸雞絲燴意粉，
簡單又好味道呀!
今晚整氣炸薯角雞翼，
先氣炸薯角，
再氣炸雞翼，
加咗麻辣粉和燒烤料去焗，
特別惹味架!
今日又係家常便飯，
冬瓜粟米紅蘿蔔生熟薏米煲西施骨，
冬瓜支竹炆火腩和清蛋炒蝦仁。
5月31日(星期五)
上星期已經約好朋友4個人去大亞灣玩，
點知撞正打風，
1號風球都照上啦!
我哋11點左右去到蓮塘口岸，
係口岸2樓簡單搵食後，
就call車返大亞灣霞涌喇!
