梅菜蒸鯇魚

我呢兩日牙骹有D痛，

擘大口食嘢都有少少困難，

所以呢兩日唔係食粉麵，

就係食魚，

今日蒸咗梅菜鯇魚，

有魚肉和魚汁撈飯濕濕哋，

先可以慢慢食啖飯呀!

五指毛桃竹芋粟米紅蘿蔔煲西施骨

今日見到街市有竹芋賣，

之前返惠州，

堂弟婦好鐘意用佢嚟煲湯，

網上查過竹芋有清肝、潤肺、

清熱、止咳和利尿等功效，

所以今日就買咗幾條嚟煲湯，

五指毛桃竹芋粟米紅蘿蔔煲西施骨，

唔講咁多，

襯熱飲湯啦!

閒話家常

屋企個煮食爐，

用咗8年，

換零件都換咗5次左右，

老公話今次壞咗就唔整喇!

買過新嘅好過啦!

之前買嘅係Simpa台灣牌子，

今次換嘅係TGC日本牌子，

原價$6130，

依家優惠$5930，

不過如果原價買嘅話，

可以加送一個Simpa抽油煙機，

好抵喎!

老公話一次換哂佢喎，

仲揀咗呢個藍色添!

就係咁，

明天師傅過嚟睇位，

啱裝嘅話就一次過換哂兩個廚房用品，

其實屋企洗衣機和冷氣機都夠期換架啦!

排緊隊囉!

豉汁排骨炆鳳爪

 

今日終於買咗豆豉啦!

即刻買鳳爪和腩排，

煮咗呢碟豉汁排骨炆鳳爪，

用埋豉汁撈飯就更加正，

睇嚟又要添飯啦喂!

臘味煲仔飯

今日我見天氣涼涼哹，

係時候要整番煲煲仔飯嚟食下喇!

今日整咗臘味煲仔飯，

有埋飯焦，

正呀喂!

食飯盒

其實依家我都好鬼懶，

每當大小魔怪兩個都唔係屋企食飯時，

我都會叫老公買兩餸飯，

慳水又慳力，

好過自己煮呀!

養生壺~石斛麥冬淮山紅蘿蔔煲瘦肉

今日又用咗個養生壺煲湯，

石斛麥冬淮山紅蘿蔔煲瘦肉，

材料有瘦肉、石斛、麥冬、淮山、蓮子百合、

  茨實、龍眼肉、瑤柱仔、蜜棗和杞子，

煲完啖湯好甜架!

即興返大亞灣

噚日我同老公返惠州攪D嘢，，

辦完事後老公話想去大亞灣食海鮮，

我哋返到去都已經成5點，

打掃完畢就去食晚餐啦!

菜芯牛肉碎蛋炒飯

菜芯牛肉碎蛋炒飯，

簡簡單單，

都幾正架!

唔講都唔知，

原來客家人鐘意用菜芯炒飯，

嘻嘻，

我呢個客家新抱都幾稱職架!

花膠雲吞雞

今晚有好嘢食，

我煮咗花膠雲吞雞，

有湯、有雞、有菜和有雲吞餃子，

好豐富呀!