前兩日返惠州食得太豐富，
係時候要食清D，
所以一個人的晚餐，
好簡單，
蒸咸雞、灼菜芯和白飯一碗。
噚日星期三，
我和老公帶隊返惠州飲飲食食，
一行6人搭永東巴士去惠州，
點知啱啱入到惠州大巴就死咗火，
我哋即刻call咗2架滴滴車，
車我哋去惠州西湖步行街，
我哋未行街前先去食午飯，
正宗客家菜好味道，
老板娘送咗鍋小米粥請我哋食，
呢餐食咗￥269。
上兩個星期去咗屯門醫院照超聲波(婦科檢查)，
今日下午要去屯門醫院睇報告，
我2點45分左右就到咗，
睇醫生就睇3點15分果個時段，
點知等到4點半左右先輪到我，
見醫生唔夠4~5分鐘就出嚟，
再約期見醫生係2025年8月呀!
今晚晚餐搵外援幫手，
買咗盒咕嚕肉加餸，
再加大豆芽炒肉片和節瓜粉絲蝦米，
3餸冇湯，
白飯任裝。
今朝一早我行去天水圍公園做晨運，
行完就去食早餐兼買餸，
老公中午約咗朋友飲茶，
所以中午就煮咗個肉碎意粉做午餐，
用咗日本買嘅意粉醬，
煮法簡易又好味道呀!
前兩日天氣好清涼架!
但今朝入咗元朗舊屋拜山，
又熱又曬，
真係頂唔順呀!
之後大小魔怪話去快樂蜂食炸雞，
我第一次食快樂蜂炸雞，
嘻嘻，
又真係幾好食喎!
今晚大魔怪女朋友仔嚟食飯，
佢攞咗韓國旅行嘅手信俾我哋添呀!
煲咗個節瓜螺頭煲清補涼，
啖湯超甜，
好正架!
仲有酸菜魚配肥牛加雜丸，
超惹味；
加多碟鮑魚生菜，
3餸1湯，
都好豐富架!
呢幾日我煮咗幾個家常小菜，
XO醬豆角炒雞柳、黑椒洋蔥煮豬扒、
臘肉炒菜芯和節瓜支竹炆排骨，
每個都係送飯一流架!
Antia係英國返嚟，
佢話好耐冇入元朗，
所以今日我哋就約係元朗見面啦!
其實我都好耐冇落元朗，
好多舖頭都已經唔同哂，
我同Antia去咗陸記正宗桂林米粉食午餐。
今日啱啱見到有西洋菜賣，
我拿拿臨買咗2扎$28，
煲咗西洋菜咸鴨腎煲西施骨，
呢個湯有清熱、潤肺和止咳等功效架!
屋企有樽蝦醬，
所以今餐就用佢嚟整蝦醬豬肉蒸豆腐卜，
加咗豆腐卜嚟墊底，
豆腐卜索哂蝦醬嘅香味，
送飯一流呀!
如果唔加豆腐卜，
加粉絲都一樣咁好味道架!
