除夕晚餐

以感恩之心告別2025，

以喜樂之情迎接2026，

祝大家平安、健康、快樂!

今日除夕晚餐有鹽焗燒雞、蘑菇洋蔥肉醬意粉、

灼西蘭花苗和煎荷包蛋。

白背木耳紅棗瘦肉湯

 

為咗健康，

呢排我會整多D有白背木耳和雲耳嘅餸菜或湯水，

今日就煲咗個白背木耳紅棗瘦肉湯；

呢個湯唔落肉都得架，

煲完當水飲，

最緊要食哂所有白背木耳呀!

臥床休息

 

呢個聖誕不平凡，

平安夜去做CTCA，

檢查報告顯示有危險，

體檢中心2小時內已出報告俾我，

當晚我即係攞埋報告去天水圍醫院睇急症，

咁啱呢兩日聖誕假期，

心臟科醫生放假，

我需要係醫院靜養休息，

等醫生返工後再作決定。

平安夜

今日約咗下午1點15分去尖沙咀照CTCA，

照完差不多3點，

我和老公求其搵間餐廳食午餐；

我哋係尖沙咀行咗一陣，

真係太多人啦!

而且又開始封路，

我哋要行到去清真寺附近先搭到巴士返天水圍，

咁啱遇到日落，

好靚呀!

黑椒蘑菇牛柳配西蘭花苗

 

近排細仔又開始健身，

佢要補充好多蛋白質，

雞蛋、雞胸肉、牛肉、西蘭花就成為佢日常食物，

今次就整咗黑椒蘑菇牛柳配西蘭花苗，

啱哂佢口味啦!

冬至快樂

噚日冬至，

我哋去咗大仔家過冬，

同親家奶奶一共7人，

簡簡單單打邊爐做節，

大仔和親家奶奶準備咗好多嘢食，

包羅萬有，

大家都食得好滿足呀!

今年有朱小B一齊過節，

特別開心呀!

外賣~八方雲集

今晚得我和細仔兩個人食晚飯，

唔想煮就叫外賣，

細仔話想食餃子，

所以叫咗八方雲集，

呢餐$172.88。

我又入院喇!

唉，

我又入院喇!

噚日中午時份，

我個心口翳住翳住咁，

怕死嘅我即刻去天水圍醫院睇急症，

登記見完護士後，

即刻安排去做心電圖、抽血6支和照x~ray，

等咗一陣就去見醫生；

醫生做過初步心臟超聲波檢查後，

佢話初步唔似心臟有問題，

不過都係建議我入院觀察，

順便等抽血報告，

就係咁，

我住院啦!

入院後我竟然發燒，

雖然唔係高燒，

但都要做流感測試、檢尿、檢痰等，

好彩到今朝燒已退，

9點幾又去咗照x~ray，

今次主要係照頸椎和膊頭，

結果係發現我頸椎有退化跡象，

物理治療師要我做強化運動。

今朝見醫生，

醫生話我所有血報告都很正常，

佢知我有3高，

建議我自費去做CTCA電腦斷層心臟冠狀動脈血管造影，

如果等政府醫院排期，

起碼要等好幾年；

我返到屋企，

已經約咗下星期三去照CTCA，

希望冇事啦!

返惠州Hea幾日

12月15日星期一

 我和老公中午返咗惠州hea幾日，

一落車就去食個快飯，

揀咗幾個餸，

呢餐食咗￥54。

朱小B百日宴

 

今日朱小B舉行百日宴嘅大日子，

地點係香港朗廷酒店Chalet宴會廳，

今次延開6圍，

全部都係雙方親戚，

大家共聚一堂，

好開心呀!

菜遠肉片炒河粉

近排我好鐘意食呢款河粉，

煮湯粉又得，

炒粉又得，

今次用佢嚟炒菜遠肉片河粉，

加少少我至愛嘅XO醬拌食，

非常惹味呀!

雪梨乾山楂麥冬茶

雪梨乾山楂麥冬茶，

有潤燥生津、消食健胃、滋陰清熱等功效，

味道酸甜酸甜，

熱飲冷飲都可以架!

唔用雪梨乾，

可以落蘋果乾都得架!

用新鮮雪梨和蘋果得唔得???

梗係得啦!

食飯盒

 

當呢排冇咩煮意，

又或得我和老公兩個人食飯時，

我都懶得去煮，

等老公黃昏去做運動後，

就去買兩餸飯$43，

一盒兩個人食啱啱好呀!

雜錦湯烏冬

雪櫃仲有半盒清雞湯，

今餐就用佢嚟煮烏冬，

摷下雪櫃有咩食材就放落去，

3個人食4個烏冬，

啱啱夠食咋! 

揚州炒飯

 

屋企食剩咗幾塊叉燒，

今日就用佢嚟炒飯，

呢個揚州炒飯有好多料，

叉燒、蝦仁、雞蛋和菜芯粒，

簡單又好味道呀!

生菜魚肉湯

前兩日滾咗個生菜魚肉湯，

簡單又好味道，

細仔食到Lam Lam 脷呀!

外食~雲貴軒

今日我和老公全日出咗去做助選團，

午餐買外賣，

晚餐就去咗新北江雲貴軒食嘢，

兩個人食咗$142。

豉汁鳳爪炆排骨

好耐冇炆過鳳爪啦!

今日見凍肉舖D炸鳳爪啱啱倒出嚟，

仲幾大隻添，

於是買咗9隻返嚟炆排骨，

呢個餸加咗辣豆瓣醬去煮，

辣辣哋好送飯呀!

蕃茄雞蛋燴肉碎

今晚得我和老公兩個人食晚飯，

簡單煮咗呢碟蕃茄雞蛋燴肉碎，

大大碟撈飯一流架!

新明苑園林海鮮酒家

我哋元朗牛潭尾政府開始收地啦!

舊屋已經登記咗，

唔只要收地拆屋，

最重要連老爺山墳都要搬，

真係好大件事呀!

呢度大伯、姑奶和老公佢哋由細住到大，

而大小魔怪細細個成日返嚟玩和燒嘢食，

依家要清拆，

大家都好唔捨得。

今日返去舊屋了解情況，

老公又專登上老爺山墳睇下有冇張貼通告，

我哋日後見步行步啦!

之後就去附近新明苑飲茶，

呢餐3個人食咗$267。

黑椒薯仔牛柳粒

細仔呢幾日WFH，

佢話要食肉喎!

可以吖，

即刻攞2塊牛柳出嚟解凍，

整咝呢碟黑椒薯仔牛柳粒。

西洋菜紅蘿蔔粟米咸鴨腎煲豬腱

不時不食，

冬天西洋菜當造，

好嫩冇渣；

我買咗$20西洋菜煲湯，

今次煲豬腱，

咁食西洋菜時就唔會咬到骨頭喇!

支竹馬蹄羊腩煲

我星期五已經炆定支竹馬蹄羊腩煲，

留番星期六同老公和細仔一齊食，

我哋一路食一路睇善心滿東華，

我哋決定用孫仔名義打電話去捐錢，

我和細仔打咗十次以上先打通捐款電話，

火災無情，

人間有愛。

P.S.英文名串錯應該係Tristan。