今日經過街市順便買包支竹(無炸)，
返到屋企，
我先發覺原來已經有1包支竹係廚櫃度，
支竹唔擺得太耐，
睇嚟我呢兩日要盡快食哂佢先得喇!
事緣係上星期日我帶母親大人、姐姐和姐夫，
去大亞灣玩時，
小魔怪就有咗4個朋友一齊去惠州玩呀!
佢哋係屋企玩得好盡興架!
5個男仔嘛，
唱K、打牌、點外賣和去行夜市，
不過最後事後小魔怪話我知，
電動麻雀枱有問題，
叫我哋上去睇下呀!
所以我和老公噚日就返咗惠州睇下發生咩事呀!
約咗姑奶食午飯後，
佢先回香港。
今日食清D，
滾咗個絲瓜肉片雞蛋湯，
有菜有肉有蛋又有湯，
真係慳水又慳力呀!
噚日慶祝母親節食完自助餐後，
我同老公都話要食清D呀!
所以今晚就整咗呢個榨菜肉絲蒸米粉，
簡單好味又易做，
仲好好味添架!
配埋我至愛嘅老干媽，
絕配呀!
今日我哋同大魔怪和女朋友仔，
兩家人一齊慶祝母親節，
兩個後生好識做，
買咗兩扎花送俾我哋兩位母親，
母親節有花收，
好開心呀!
我哋一行7人，
去咗海港城SAVVY食自助午餐!
今日煲咗蕃茄雜菜排骨湯，
象徵式補下鈣質，
唔只補鈣，
蕃茄薯仔湯酸酸甜甜，
生津解渴、健脾開胃，
仲可以加強免疫力添架!
舊患嘅嘢，
真係話嚟就嚟；
我嘅腰痛時不時都會發作架啦!
前兩日腰骨都已經有少少痛，
唔嚴重，
叫老公幫手搽按摩膏就算；
但到咗星期二晚，
腰骨開始痛到爆，
我諗住早D瞓休息下，
點知瞓底咗就起唔到身，
痛到亞媽都唔認得，
唯有拿拿臨去睇急症，
等咗5個半鐘先睇到我，
檢查完一輪話入醫院check下穩陣D，
就係咁，
我入咗醫院瞓咗一晚，
今日星期四先出院。
今日買咗個買咗個肥嘟嘟深綠色的涼瓜~雷公鑿，
用嚟炆燒鴨，
涼瓜和燒鴨都係老公至愛，
所以今餐餸啱哂佢口味呀!
五月二日星期五
我、母親大人、姐姐和姐夫，
一行4人齊齊返惠州玩幾日；
我哋約咗9點15分係上水火車站等，
食燒賣做早餐後就搭小巴經蓮塘關口過關喇!
由於係五一黃金週，
全中國都人多車多，
平時1小時15分鐘車程，
今日就要成3小時，
返到惠州家放低行李，
我哋就去飲茶和行超市。
今日大魔怪和女朋友一齊返嚟食飯，
我一早煲咗靚湯，
花膠螺片粟米紅蘿蔔淮山豬腱煲雞腳，
仲整埋大家至愛嘅手撕雞和蒸魚，
唔少得西蘭花炒肉片和菜脯炒蛋，
加埋大魔怪買返嚟加餸嘅叉燒，
開得飯啦!
