好殘忍呀~臘味煲仔飯

 

今日香港天氣好鬼凍，

而且仲落埋雨，

全日氣溫都係11~12度左右(天水圍)，

聽講週末仲會再凍D十度或以下；

今日我落街已經著重裝備，

睇嚟要摷番條冷頸巾出嚟保暖先得。

天氣咁凍，

梗係要整個超級殘忍嘅煲仔飯嚟嘆下啦!

臘味煲仔飯有臘腸、潤腸和臘鴨髀，

全部都係老公至愛呀!

灼埋碟菜就開得飯喇!

材料: 2杯半米、臘鴨髀1隻、臘腸1條、鴨潤腸1條、蔥粒

調味: 蒸魚豉油、老抽、糖、麻油

做法: 臘腸、潤腸和臘鴨髀用熱水沖洗後切片備用；

洗2杯半米後浸10分鐘，將米放入鍋內加2杯半水(量米杯)，

用中火煲約4~5分鐘至冒煙或差不多乾水後(即飯表面有細孔)，

用筷子係飯面拮十幾個窿窿後，將臘味平均放在飯面上，

轉最細火煲多15分鐘，期間需要將煲在煮食爐上下左右移動，

使飯焦平均分佈，熄火前灑上蔥粒焗多5分鐘，最後加調味撈勻食得!

~P.S: 煮食爐火力大，飯焦就會燶D好味D；

又或可以在未落餸之前，攪攪煲底嘅飯，

咁就唔會有太多飯焦和濃底架啦!

~係飯面拮窿窿，係想D熱力容易蒸熟臘腸呀!

  

大家可以入嚟Facebook讚下我新開嘅Fans專頁呀!

 雀后(添飯)Facebook Fan Page