2010年10月31日 星期日

雜錦臘味飯!

呢個雜錦臘味飯,
係噚日嘅午餐嚟o架!
用咗Le creuset煲飯,
真係好鬼方便,
前後15分鐘左右就有得食,
連老公都話啱啱先講煲飯,
點解咁快有得食呀!

2010年10月30日 星期六

一不離二~大閘蟹宴!

 
今晚我又食大閘蟹啦!
因為今日係老公舊同學聚會,
佢哋每年都有一次聚埋食大閘蟹o架!
今次大閘蟹足足有8兩重,
又係超多膏,
我諗今年我嘅quota已滿,
明年請早啦!
仲有呀!
我飲咗好多靚酒添!
呢隻就係個個讚好飲嘅靚次伯和香檳啦!

2010年10月29日 星期五

胡李家之大閘蟹宴!

 
胡李家之大閘蟹宴,
顧名思義响胡李家舉行啦!
今次出席有: 胡李媽 x 3, T&P x 2 , Sandy x 3 , 攪攪震 x 2 , mei , yummy 和我!
專業即係專業,
寫埋菜單,
勁呀!

咸牛肉蛋治!

 
昨晚可能太凍嘅關係,
我D鼻敏感又開始發作;
見有個檸檬係屋企,
即刻叫老公沖杯檸檬茶嚟加強維他命C先得!
有嘢飲,
梗係要有嘢食啦!
攞咗罐咸牛肉出嚟,
不過又係要用鎖匙扭開的,
呢個唔係我嘅強項,
我次次都會中間已經扭斷,
都係要老公幫我整好D!

2010年10月28日 星期四

懵到上心口呀!

今日我好大懵呀!
話就早上食完早餐後,
我發覺我個手提電話唔係個袋度,
不過我肯定我有帶電話出街,
即刻問同事借電話打番屋企叫老公幫我搵;
又立即打番自己個電話睇吓嚮唔嚮呀!
打第一次係嚮o架!
不過打第二三四次就飛咗落留言,
好驚呀!
因為好大機會俾人攞咗呀!
好唔開心呀!
破財唔緊要,
最最緊要係我D電話號碼呀!
於是番轉頭去餐廳搵,
又狂剿自己個袋,
係係係度啦!
原來我攞咗落袋底,
即時打番個電話話俾老公知,
仲俾老公"省"咗一餐添!


2010年10月27日 星期三

潮!

呢排唔知係咪我食得多嘢得滯呢???
個肚仔好似唔係咁舒服咁,
所以今日我煲咗少少潮州粥,
清清腸胃呀!
食粥梗係要炒番碟小炒嚟送粥啦!

2010年10月26日 星期二

栗子炆雞煲!

最近,我發覺亞虎又有問題啦!
有咩問題???
就係死圖啦!
睇番以前D網誌,
剩係出現咗個標題和內容,
中間D相唔見哂呀!
只要click"編輯"和再click"立即發表",
咁D相就會出番嚟啦!

2010年10月25日 星期一

貴!

上星期四(10月21日),
我哋報咗名聖誕去旅行啦!
目的地係北海道(五日團)。
不過今次大小魔怪同老公都話唔好呀!
(大小魔怪假期後要考試;老公要睇住佢哋溫書喎!)
剩得姐姐一家3口、母親大人和我咋!
我哋揀咗12月29日出發,
團費都要$8899,
計埋雜費、燃油附加費,導遊費等等,
肯定過萬呀!
係咪好唔抵呢???
冇法啦!
我剩係得呢D時間可以去旅行咋!

2010年10月24日 星期日

五香淮鹽焗雞翼!

雞翼係大小魔怪嘅至愛,
所以我要用盡我嘅腦汁,
攪攪新意思,
唔使來來去去都係食果幾款雞翼嘛!



      五香淮鹽焗雞翼
材料: 雞翼2磅
醃料: 五香淮鹽2茶匙、幼鹽1茶匙、老抽半湯匙
做法: 將雞翼解凍,用醃料醃半天;預熱焗爐200度15分鐘,
焗雞翼30分鐘就得啦!(記得要將雞翼反轉面焗呀!)


P.S. 呢個雞翼煎和炸都得o架!
我舊年煎嚟食時D雞皮脆卜卜,
好正o架!


 
  
大家可以入嚟Facebook讚下我新開嘅Fans專頁呀! 

2010年10月23日 星期六

煎牛扒!

好可憐啊!
今日我諗住將舊年去台灣觀摩交流D相,
過翻落學校部電腦度,
點知部電腦唔知發生咩事,
唔單只開唔到,
仲話要我格式化張記憶咭!
大佬呀!
格式化張記憶咭即係要洗哂我果千幾張相,
好大件事喎!
不過都應該冇咩人救到我o架啦!
我唯有忍痛~~格式化咗張記憶咭,
就係咁,
我唔見咗千幾張相呀!
唔得,
要整番D正嘢俾自己補數呀!

元朗~石崗咖哩屋!

 
今日完咗個家長會,
同同事落元朗食晏,
我哋揀咗呢間~石崗咖哩屋,
貪佢冇咁多人呀!
我哋叫咗3個lunch set,
加埋一都係$181.5咋!
最梗要係凍飲唔使加錢呀!

2010年10月22日 星期五

香草蒜蓉黑椒焗羊扒!

颱風"鮎魚"終於肯走,
聽日嘅家長會可以照常舉行!
小魔怪話今日吹D風先似秋天喎!
令我好想好想去燒嘢食添!
不過冇人肯陪我去呀! 
今日學人焗脆卜卜嘅羊架,
唔知道成唔成功呢???

2010年10月21日 星期四

好殘忍呀~麵豉排骨臘腸煲仔飯!

颱風"鮎魚"雖然給了我半日的假期,
但係我都做咗好多嘢o架!
首先我返咗學校做埋週六家長會D嘢(剪片),
又去咗元朗買定D餸(菜、豬肉、雞翼),
仲有去百佳執定D罐頭等等;
人人都係好似就快打到嚟咁,
個個都手執幾袋食物呀! 
今晚老公有應酬,
好想懶呀!
咁就殘忍D~食煲仔飯啦!


2010年10月20日 星期三

白汁蘑菇粟米薯仔燴雞柳!

近排我屋企個洗衣機出水好慢,
洗一機衫要成1個半鐘,
工人姐姐又唔出聲喎!
攪到晚晚都好夜先瞓呀!
老公話第日搵人整,
我話唔使啦!
應該扭開個水喉位清清D污物就得;
老公好懷疑問得唔得o架???
於是我剩係用1支棉花捧,
清清入水位,咁就攪掂咗,
依家唔使35分鐘就洗完衫啦!
唔知點解,
我好似咩都識,
但又唔係精果隻囉! 
話時話,
我覺得我依家煮呢個白汁太好味道啦!
真係有D似飲梗蘑菇湯嘅感覺呀!
老公仲問o麥唔係罐頭湯咩???


2010年10月19日 星期二

鹵水雙拼!

見仲有半樽鹵水汁係屋企,
唔好浪費,
即係整個鹵水雙拼嚟食先得!
我認懶o架!
買咗急凍豬肚和豬腸嚟煮呀!


Halloween之甩色甩到七彩~M&M朱古力蛋糕!

剿勻屋企都冇咩料整蛋糕,
於是响手袋攞咗筒m&m朱古力豆出嚟,
加咗D豆豆係蛋糕面,
嘩!點知甩色甩到七彩,
好啱Halloween當日食呀!


2010年10月18日 星期一

臘味煲仔飯!

好耐冇食過咁好味嘅臘味飯啦!
因為次次都要就奶奶要煮D腍飯食,
食到大小魔怪成日投訴話唔想再食"軟"飯呀!
噚日,
我除咗整咗個蝦醬骨之外,
仲用le-creuset 22cm 深底鍋煲咗呢個臘味飯,
煲15分鐘後焗5分鐘就有得食,
仲煮到粒粒分明,
大小魔怪每人添咗3碗飯呀!
食臘味飯配埋油菜和落埋自家製煲仔飯豉油,
啱唔啱大家食呢???


2010年10月17日 星期日

蝦醬骨!

哈哈!大家都估到少少o架!
係,佢就係飛排嘅真身啦!
用嚟蒸、炆、焗都得,
肉質好鬼腍滑呀!
本來我都有諗過用嚟焗整燒排骨,
不過到最後,
我決定整呢個呀~蝦醬骨!


2010年10月16日 星期六

芝麻牛油焗蛋糕!

今日係我婆婆嘅生日,
婆婆今年已經94歲啦!
我整咗個芝麻牛油焗蛋糕請婆婆食!
祝婆婆福如東海,壽比南山!


2010年10月14日 星期四

黃金蝦!

今日,
我整咗個係街成日食,
但自己又未煮過嘅餸~黃金蝦!
食完有少少罪惡感添!
因為太太太美味啦!
令我嘅減肥事業又要推遲一大步了!














材料: 草對蝦12隻、咸蛋黃8隻、牛油20克和粟粉
醃料: 鹽和胡椒粉少許
做法: 蝦解凍去腸、鬚和爪,用醃料醃15分鐘;
將咸蛋黃隔水蒸10分鐘左右,用叉搓散;燒熱油鑊,
將蝦沾上薄薄的粟粉,煎至兩面金黃色上碟備用;用小火爆香牛油,
加入咸蛋黃炒至起泡,將蝦回鑊再快炒,
讓每隻蝦沾滿咸蛋黃或炒至蝦乾身便成。
P.S. 今次D咸蛋黃搓得唔夠散,下次再整過呀!

 
  
大家可以入嚟Facebook讚下我新開嘅Fans專頁呀! 


2010年10月13日 星期三

又係佢呀~鹵豬軟骨!

今日,
我又要留校教手工班,
所以呢個豬軟骨係噚日炆定o架!
留番今晚先嚟食,
咁就會更入味兼夠腍啦!
加埋個炸魚柳,
簡簡單單,
開飯啦!




2010年10月11日 星期一

反傳統~酥炸魚肉豆腐卜!

點解我有好多篇blog裡面冇哂D相o架!
攪到得番個框框,
死得啦!
好多仲係我飲飲食食和blog聚嘅相片嚟o架!
唔通我再去影過哂D相咩???
好彩其他煮食blog仲有番個食譜係度,
最多我整多次兼影埋相,
希望可以補救到啦!
真係激死我啦!



牛潭尾舊居(祖屋)!

 
呢度就係老公由細到大住嘅地方,
自從佢抽到居屋同奶奶搬咗出去住之後,
呢度變咗剩係拜山或燒嘢食先返嚟一次半次咋!
呢個面貌已經係重建咗o架啦!
咪睇好似好靚咁,
其實後山有蛇o架!
仲有好多蚊添!
噚日,
我唔記得搽防蚊水,
俾D蚊滋咬到隻腳腫哂呀!

2010年10月10日 星期日

蒜泥白肉!

我都係鐘意食自己整嘅蒜泥白肉,
因為唔鐘意係街食果D蒜泥係生磨,
食落有少少蒜嘅辣味,
而我整呢個係將蒜蓉和乾蔥蓉先爆香嘅,
加埋支好鬼香嘅麻油,
一個字~正!

芝味餐(2)~簡易版pizza!

有芝味餐(1),
梗係會有芝味餐(2)啦!
噚日,整完個芝士奶油蝦伊麵後,
仲有少半包pizza芝士,
拿拿臨搓個pizza皮,
剿哂屋企有嘅材料,
整咗呢個簡易版pizza!


2010年10月9日 星期六

芝味餐(1):芝士奶油蝦伊麵!

今日,
我見包pizza芝士仲有幾日就過期,
一於泡製2款芝味餐嚟食啦!
可惜整完呢餐之後,
包pizza芝士仲未用得完呀!
嗱!大小魔怪,
龍蝦我就買唔起,
大蝦,張就吓食住先啦!


元朗~譚仔雲南米線!

 
上次同同事去咗雲貴軒食紅薯粉,
今次同另一位同事放工去另一間食米線~譚仔雲南米線!
傳聞佢哋嘅土匪雞翼和蒜泥白肉超好味,
我哋點可以唔去試吓呢???
咁啱老公返元朗舊居執屋,
即刻call佢嚟接我哋去食晏呀!

2010年10月8日 星期五

麻香黃酒雞!

好耐冇食過呢個黃酒雞啦!
記得生完大小魔怪時,
日日都有黃酒雞食;
坐月食黃酒雞係客家女人專用補品嚟o架!
而當時我食嘅黃酒係奶奶專登搵個圍村亞嬸親手釀制,
一個字~香!
咁啱屋企有支黃酒,
又咁啱我買咗隻雞番嚟!
呵呵呵!即刻整鍋嚟補補身先得!
(不過坐月時食嘅雞唔使醃,剩係將雞、黃酒、


薑片和加幾粒鹽,煮熟就食得!)





材料: 雞1隻、黃酒一碗、麻油1湯匙、薑塊一大舊
醃料: 鹽1茶匙、老抽半湯匙、生粉半茶匙和胡椒粉少許
做法: 將雞斬件後,用醃料醃30分鐘;燒熱 le-cresuet 22深底鍋,
加麻油爆香薑片,落雞炒至半熟,將1碗黃酒加入雞內煮熱,
用小火焗雞15分鐘便成。



                                                

醃料: 叉燒醬1匙羹、海鮮醬1匙羹、豉油、老抽、糖、紹酒和蜜糖
做法: 用醃料醃豬仔骨半天;預熱焗爐200度15分鐘,
焗排骨40分鐘,記得中途反轉焗呀!最後搽蜜糖焗多5分鐘便成。
     
  
大家可以入嚟Facebook讚下我新開嘅Fans專頁呀!  

2010年10月7日 星期四

紅燒豬軟骨炆薯仔!

我見個雪櫃冰箱又唔滿,
又係入貨嘅時候啦!
今次我訂咗好少嘢咋!
剩係訂咗4條豬仔骨和6磅豬軟骨咋!
嘻嘻!
豬仔骨$63,
平均每條$15.75;
豬軟骨$65.2,
每磅平均$10.8!
今餐加埋炸魚柳和炒娃娃菜,
一人一個大碗食飯!
慳番唔使洗碟呀!

2010年10月5日 星期二

口多多!

一個人口多多,
唔係件壞事嚟o架!
話說上次幫我照証件相嘅攝影師,
佢話我著咗件黑色衫,
所以攞特區護照時呢D相未必啱用喎! 
今日,
我去申請特區護照,
諗住去到先再影過D相啦!
嘩!好貴呀!
6張相要$40,
唔捨添!
於是一於少理,
去到counter問問著黑衫D相可唔可以用???
嘻嘻!佢話得喎!
我唔信,
攞埋張相出嚟俾佢睇???
哈哈!都話得咯!
Yeah!咁就慳番四十皮! 
為咗獎勵自己今次咁多口,
所以我去元朗合益街市,
買咗2斤D噴哂水又超新鮮生猛嘅蜆,
2斤蜆都係$36咋!
仲有4炆剩呀!


2010年10月4日 星期一

有味~飯!

今日天氣開始涼涼哋,
大家記得要添衣呀!
一個唔小心就會凍親o架啦!
喂!我又心思思啦!
嘻嘻!我有咩嘢諗吖???
梗係諗起食啦!
平時我成日整煲仔飯,
今次用簡單嘅方法~電飯煲嚟焗有味飯啦!



2010年10月3日 星期日

姨甥生日會!

 
我的姨甥~盧智諾,
已經是位中一學生,
不過佢成個人都好似仲係小學生咁天真活潑可愛呀!
靜靜話俾大家知啦!
我就嚟做姨媽!
因為我妹妹有咗BB,
聽講話係BB女,
母親大人一聽笑到合唔埋咀呀!
唔講咁多啦!
睇睇姨甥生日會有咩食仲好啦!

冇啱嘅白底底呀!

哈哈!大家唔好心邪,
我唔係講衰嘢呀!
話說今日我上網book咗星期二做特區護照,
剿勻屋企都冇啱規格嘅白色底証件相,
本來有一張o架!
不過我著咗黑色衫,
唔用得呀!
激死我啦!
做護照用嘅相咁多規矩,
都係到時去到先影啦!


2010年10月2日 星期六

咩都清哂啦!

我好鐘意煲湯俾大小魔怪飲o架!
每次煲湯,
佢哋都會用大湯碗嚟飲,
仲要係飯前飯後都飲1大碗湯果隻呀!
另外,佢哋仲鐘意食埋煲湯嘅肉和湯揸添!
真係食得嘅,
咩都清哂o架!
一D都唔浪費呀!
抵鍚!