2019年1月31日 星期四

炸腰果


又係開鑊炸腰果嘅時間啦!

今日開爐有少少阻滯,

就係個煤氣爐開8~10秒後自動熄火,

拿拿臨打電話去煤氣公司搵人整,

約咗明日下午嚟睇下發生咩事,

好彩過年前壞咋,

如果新年壞就大件事,

都唔知點算囉!


2019年1月30日 星期三

炆冬菇生菜


今日想食清D,

炆冬菇食就最啱啦!

有人鐘意食厚而大隻冬菇,

但我就鐘意食唔大唔細嘅一口冬菇喇,

一啖一隻,

好食架!


2019年1月29日 星期二

西芹炒雞柳


今日係百佳買咗棵西芹$6.9咋,

又平又嫩,

多食西芹又有益(降血壓),

真係買多幾棵嚟食都好喎!




2019年1月28日 星期一

2019年1月27日 星期日

家鄉煎藕餅


小魔怪真係一個執屋能手,

今日佢唔單只執咗自己房,

仲幫我執埋客廳雜物,

又吸又抹塵,

越執越興奮,

真係好攪笑呀!

本來諗住今晚整個藕餅慰勞下佢,

點知佢約咗朋友食飯,

唯有留番俾我同老公撐枱腳啦!


2019年1月25日 星期五

冬菇雲耳臘腸蒸雞


老公買咗幾包臘腸返嚟,

今日就用佢嚟蒸雞喇!

另外買咗個新碟,

用嚟蒸餸好方便呀!



2019年1月24日 星期四

2019年1月23日 星期三

遊東門


今日我、老公同姑奶去深圳東打扮靚靚,

平日東門都好多人行街架!

而且周圍都有好多美食廣場,

美食當前,

真係有選擇困難症架!

但我哋就最鐘意食一人火鍋喇!

呢度菜多過肉,

唔會食得太過份呀!


2019年1月21日 星期一

韭菜豬肉餃子


一蚊(人民幣)可以買到咩???

我係惠州就買咗1蚊韭菜返嚟喇!

今日包咗韭菜豬肉餃子做我哋嘅午餐,

今次包得咗43隻,

包咁少???

嘻嘻,

預少咗餡料囉!

明天要再豬肉返嚟再包過先得!


2019年1月20日 星期日

回鄉


噚日我同老公和姑奶返惠州,

主要係打掃下間屋,

準備過年時返嚟玩幾日呀!

午飯就係堂弟家食飯,

有自製臘腸臘肉,

又有自家養肥雞,

好好餸啊!


2019年1月18日 星期五

銅鑼灣漢和韓國料理


今日下午約咗朋友仔落銅鑼灣食韓國烤肉,

由11點半食到2點半,

加埋一都係$130,

算抵食啦!

可惜胃得一個,

食唔到好多嘢呀!



2019年1月17日 星期四

冬菇蠔豉花生炆豬手


今日去超市買豬肉,

見亞姐整理緊隻靚靚豬手,

一隻要$60,

都唔知貴唔貴囉!

亞姐幫我斬完隻豬手後,

睇落好似唔夠食咁喎,

還掂都係炆,

一於買多隻豬腳,

炆咗一大煲冬菇蠔豉花生炆豬手喇!

哈,

呢個餸係咪好似過年餸呢!


2019年1月16日 星期三

例湯~青紅蘿蔔粟米螺片豬骨湯


朱家例湯又出爐啦!

今次煲青紅蘿蔔粟米螺片豬骨湯;

用有泥紅蘿蔔加埋粟米嚟煲老火湯,

煲出嚟嘅湯水特別清甜架!



2019年1月15日 星期二

辣子雞丁


辣子雞丁,

我和小魔怪都會食唔停口嘅餸菜之一,

佢辣、麻、香脆嘅感覺;

能夠從一大埋辣椒當中找出雞粒或花生等美食,

仲帶著尋寶嘅樂趣啊!

嘻嘻,

呢碟辣子雞丁,

大愛呀!



2019年1月14日 星期一

自製瑞士汁火雞腎雞翼


為咗要煮埋雪櫃果5隻雞翼,

今日就買咗3個火雞腎返嚟,

配上自製瑞士汁,

滷咗一鍋火雞腎雞翼喇!


2019年1月13日 星期日

沙田煌苑石門店


今晚我哋與母親大人和姐姐妹妹幾家人齊齊提早團年,

順便慶祝妹妹月底生日呀!

平時食開好食嘅酒家冇哂位,

唯有揀咗呢間沙田煌苑食晚飯;

可能近年尾和多人出街食飯,

呢個圍餐水準麻麻哋,

另外叫咗兩個素菜俾大魔怪,

仲加咗1打大壽桃包添呀!


2019年1月12日 星期六

豉油皇雜菜炒麵


今日做完運動經過天瑞街市,

買咗2個麵餅返屋企煮豉油皇炒麵嚟食;

大魔怪話鐘意食脆脆麵,

所以今次我預先煎香個麵底,

炒起嚟有脆香嘅效果啦!

小魔怪本來要早早出門去玩架,

見我炒咗一大鑊麵,

於是食埋先出街呀!



2019年1月11日 星期五

第一次~五香臘味芋頭糕


小魔怪想食我親手整嘅芋頭糕已經等咗好幾年喇!

年年我都話整,

但到最後都係冇整到囉!

今日終於的起心肝,

做出我人生第一個五香臘味芋頭糕,

因為係第一次,

唔知好唔好食,

所以整咗少少出嚟咋,

希望唔會令小魔怪失望啦!

拿,

製成品出咗嚟喇,

睇樣好似好得咁,

食落就唔知味道啱唔啱,

又唔知實定軟,

依家要擺落雪櫃雪一晚,

明天先試食呀!



2019年1月10日 星期四

客家咸香手撕雞


噚日買咗隻雞返屋企,

醃咸佢嚟整客家咸香手撕雞,

究竟客家咸香雞最好食係邊個部位???

靜靜雞話俾大家知,

唔係雞髀雞胸或雞翼,

而係D雞皮呀!


2019年1月9日 星期三

蠔油薯仔炆排骨


噚晚臨返學之前,

炆定一大鍋蠔油薯仔炆排骨,

留俾老公和小魔怪做晚餐:

呢個餸簡單好味外,

最緊要係要多汁,

用嚟撈飯就最正啦!

2019年1月8日 星期二

5分鐘沙薑雞翼



5分鐘,

5分鐘,

只要開最細火浸雞翼5分鐘,

咁煮出嚟嘅雞翼就會好滑溜架啦!

今日我就係用呢個方法嚟整沙薑雞翼,

雞翼皮飽滿,

雞肉又嫩又滑呀!


2019年1月6日 星期日

行山篇~元荃古道


今日約咗老公同學一行6人齊齊行元荃古道,

由荃灣西鐵站旁巴士站搭51號巴士去到郊野公園站落車,

沿荃錦自然教育徑行,

經過荃錦營地,

荃錦越野單車徑,

一路向前行,

左邊看到荃灣,

右邊遠望元朗。

提提大家行呢段路要小心越野單車,

由於斜路比較多單車車速都幾快架!


2019年1月5日 星期六

冬菇雞粒煲仔飯


今日午餐食冬菇雞粒煲仔飯,

仲用咗全瘦肉嘅雞柳做肉粒,

最鐘意煮有味飯,

簡單又好味道,

一煲過啱哂我呢D懶人啦!

呢餐煮咗2杯米,

俾我同小魔怪兩個人KO哂,

咁食法,

點減肥呀!


2019年1月4日 星期五

香煎鱭魚


今日晨早沿天瑞河行晨運,

一路行一路吸下新鮮空氣,

行下行下咁就個幾鐘,

出身汗,

爽呀!

跟住去天瑞街市買餸,

買咗老公至愛嘅鱭魚,

4條$42,

煎到脆卜卜,

連骨都食埋,

好鬼正架!


2019年1月3日 星期四

雜菜排骨湯


一煲湯水,

點先可以啱大魔怪飲之餘(素食者),

又可以啱小魔怪飲呢(肉食者)???

前兩日煲咗呢煲雜菜湯,

先煲好雜菜湯底後,

分咗部份湯出嚟俾大魔怪飲,

然後再加排骨煲多30分鐘,

咁就一家人都有得飲啦!

2019年1月2日 星期三

香煎粟米馬蹄墨魚餅


今日去街市買咗包墨魚膠(4兩$20),

攞起上手輕飄飄,

即刻返轉頭再買多1包,

加咗2粒馬蹄和1/4條新鮮粟米(烚熟拆粒),

咁就做咗呢碟彈牙又爽口嘅粟米馬蹄墨魚餅喇!



2019年1月1日 星期二

除夕派對

噚日我哋齊齊去咗妹妹家開派對,

大人緊係麻雀耍樂啦!

而祈祈亦有得玩架,

佢同妹夫、姐姐、小魔怪齊齊砌薑餅屋,

一路砌一路食,好開心啊!

晚餐每家人整2~3樣餸,

飯後又有一年一度除夕交換禮物,

一家人齊齊countdown完先散band,

歡送2018,

迎接2019。