2019年12月30日 星期一

2019聖誕北京之旅~第二天


2019年12月24日(星期二)

今日聖誕平安夜,

亦係呢五日北京之旅行程裡最緊密的一天,

為了避早上塞車,

我哋朝朝都係6點15分morning call,

7點30分準時出發,

出發前緊係要食飽飽先啦!


2019年12月29日 星期日

2019聖誕北京之旅~第一天


2019年12月23日(星期一)


由於今日要早上5點半前到機場集合,

所以大致上噚晚係瞓得好少呀!

話時話,

今次旅行好齊人,

就係我哋三姐妹伉儷都有出席,

連同母親大人和祈祈共8人,

參加縱橫遊五天北京之旅,

全團得12人咋!


2019年12月28日 星期六

2019聖誕北京之旅~手信篇


參加呢個北京團,

真係冇咩時間去行街買嘢(平嘢),

因為住嘅酒店係郊區,

出入超唔方便,

只係响第一日見到有間大型超市,

係入去執咗D嘢食零食咁咋!


 

2019年12月23日 星期一

2019聖誕北京之旅


今年聖誕之旅,

老公終於可以同我哋一齊去玩喇!

母親大人、姐姐姐夫、我和老公、妹妹妹夫和祈祈共8人,

齊齊參加縱橫遊~北京4大世界文化遺產之旅,

聽講話北京好似落雪添呀!

今朝5點半要到機場集合,

所以噚晚我瞓得幾個鐘頭咋!


2019年12月22日 星期日

冬至快樂


今年朱家一家四口子吃冬至飯,

簡簡單單五餸1湯,

白飯任裝!

祝大家和諧、美滿、知足!


2019年12月21日 星期六

美味海鮮餐


點解我咁鐘意學搓麵包呢,

就係因為呢個課程,

所以識咗幾位傾得埋嘅朋友仔,

而大家又都鐘意飲飲食食,

擇日不撞日,

相約噚晚齊齊去食海鮮餐。

因為朋友仔有相熟海鮮檔和酒家,

我和朋友仔負責去三聖買海鮮,

拎到置樂南記加工煮食。


2019年12月20日 星期五

菜芯炒牛肉


噚日黃昏由惠州返到屋企,

早一個站落車行入天盛街市轉咗個圈,

買咗菜芯和新鮮牛柳肉,

簡單煮碟菜芯炒牛肉做餸啦喂!

2019年12月17日 星期二

福花菜炒肉片


福花菜,

與普通椰菜花外型頗相似,

但兩者總有少少分別係,

福花菜外型巨大及花型鬆散,

耐煮兼食時較爽口;

而椰菜花外型適中及花型較密,

食落較腍身。

近排我都幾鐘意買福花菜嚟清炒或炒肉片呀!


2019年12月16日 星期一

五指毛桃牛大力土伏苓粉葛排骨湯


係雲泉仙館買咗2個湯包,

上次煲咗潤肺養顏滋陰保健湯(海底椰子、雪梨乾、麥冬、椰棗),

今日就煲埋另一個五指毛桃牛大力土伏苓粉葛湯,

加咗個有泥紅蘿蔔和$80排骨頭落去一齊煲,

煲2.5小時加鹽調味就有得飲喇!


2019年12月14日 星期六

咖哩洋蔥雞翼


呢排好多時都係得兩個人食飯,

間中都會唔知煮咩好架!

唔想大煮,

唯有摷下雪櫃存貨有咩就煮咩啦!

咖哩洋蔥雞翼配蒜蓉炒菜芯,

有肉又有菜,

咁又一餐囉!


2019年12月13日 星期五

胡椒芥菜黃豆咸排骨煲


芥菜有獨特嘅苦澀味,

細細個想叫我食都難;

但老公就超愛吃,

可能煮俾老公食得多,

我開始接受咗佢嘅味道喎!


2019年12月12日 星期四

奶茶加蜂蜜


今日去咗同D頭髮扮靚靚啦!

我原本諗住過年前電髮架,

不過髮型師話我頭髮唔夠長,

電咗似師奶(但我真係師奶嘛),

於是改做顏色焗油,

今次試新顏色~奶茶加蜂蜜!


2019年12月11日 星期三

芋頭炆排骨


呢排係街市見到有芋頭賣啦!

見小魔怪咁鐘意食芋頭,

一於買邊芋頭嚟炆排骨啦!

2019年12月10日 星期二

氣炸蕃薯


師奶就係咁,

見邊度多人就會去八卦下,

見屋苑商場菜檔日日都咁多人係度揀緊蕃薯,

個個人都揀大大袋,

問下亞姐話係日本蕃薯嚟10蚊雞磅咋!

好甜好粉兼好多人買架!

係真唔係真???

亞姐話風水佬呃妳十年八年,

我呃妳妳一陣試過就知啦!


2019年12月9日 星期一

手撕包心菜


手撕包心菜,

响街食幾十蚊一碟,

係屋企自己炒,

幾蚊雞就有得食,

味道仲可以自己調較,

起碼冇街食咁油膩和有味精呀!

2019年12月8日 星期日

拜山


昨日我哋約埋母親大人和姐姐一家去拜祭父親大人,

妹妹一家有事辦,

所以佢哋自己會去呀!

午餐去飲茶,

8個人食咗$670,

嘻嘻,

掛住食冇咩影相呀!



2019年12月6日 星期五

滷水大雜會~豬肚、豬腸、金錢肚、火雞腎、雞翼


明天我哋一家會去拜祭父親大人,

午餐應該會去飲茶,

至於晚餐就留係姐姐家自煮,

每家人負責1~2款餸,

今次我整滷水大雜會,

有豬肚、豬腸、金錢肚、火雞腎、雞翼,

今日滷定明天食,

肯定入哂味道啦!

2019年12月5日 星期四

今日靚湯~椰子海底椰紅蘿蔔煲雞湯


今日靚湯~椰子海底椰紅蘿蔔煲雞湯;

買咗個新鮮椰子,

街市姐姐幫我倒出椰子水和開椰子肉

配埋一包新鮮海底椰,

加隻雞和紅蘿蔔(有泥);

煲出嚟啖湯好清甜架!

灼碟油菜,

加碗雞湯兼食埋D雞肉,

簡簡單單又一餐囉!



2019年12月4日 星期三

外食~馬家莊清真館


昨晚到九龍殯儀館送雄姨丈最後一程,

願姨丈一路走好!

之後,

母親大人、姐姐、老公和我,

行咗出去深水埗長沙灣道附近搵食,

見到間馬家莊清真館,

有我至愛嘅牛肉餅食,

正呀!

我想講,

個牛肉餅超級juice呀!


2019年12月2日 星期一

咖哩薯仔洋蔥炆雞翼


煮了一大鍋咖哩薯仔洋蔥炆雞翼,

用咗李X記咖哩醬,

香而不辣,

應該老人家和小朋友都啱食呀!


2019年12月1日 星期日

潤肺養顏滋陰保健湯


潤肺養顏滋陰保健湯,

材料有海底椰子、雪梨乾、麥冬、椰棗,

加有筋豬腱$72和有泥紅蘿蔔1個煲1.5小時,

最後加鹽調味就得。


2019年11月30日 星期六

返惠州


噚日又返咗惠州睇新屋裝修,

唔去到都唔知係屋苑門外空地做緊活動,

有食有玩又有得買,

都唔錯喎!


2019年11月28日 星期四

一個人的午餐~菜遠滑蛋肉片飯


今日午餐得我自己一個人食,

見有碗舊飯係雪櫃,

摷下雪櫃有咩食材,

簡單煮咗呢碟菜遠滑蛋肉片飯。

2019年11月27日 星期三

偷得浮生半日閒


今日老公和我,

兩個人由上水搭79號巴士去雲泉仙館拜奶奶,

帶埋奶奶身前至愛嘅零食,

仲有老公退休後獲頒嘅銀碟,

希望能與奶奶分享喜悅!

2019年11月25日 星期一

豉汁涼瓜炆排骨


老公話好耐冇食過涼瓜,

見佢咁想食,

拿拿臨去街市買個靚靚"雷公鑿",

聽人話"雷公鑿"冇咁苦兼較爽口架!

2019年11月23日 星期六

蔥菜蒸牛肉餅


蔥菜蒸牛肉餅,

又係一個經典家常菜之一;

蔥菜即係大頭菜,

用嚟蒸鯇魚腩、蒸豬或牛肉餅都好好食架!


2019年11月20日 星期三

咸蛋皮蛋咸排骨瑤柱粥配豉油王炒麵


今日終於打敗仗,

咳、喉嚨痛呢D老朋友又嚟探我啦!

冇睇醫生不過買咗D成藥食,

食完就瞓,

攪到成個人懵盛盛咁,

今晚食咸蛋皮蛋咸排骨瑤柱粥配豉油王炒麵。


2019年11月16日 星期六

滷水雜錦~豬肚、豬大腸、火雞腎



計下計下,

原來我都好耐冇整過滷水豬肚和豬大腸食啦!

今日挑起條為食筋,

拿拿臨去凍肉舖買材料先得,

今次滷咗豬肚、豬大腸和火雞腎,

老公大讚好食,

緊係啦!

我剩係清理豬肚和豬大腸嘅肥膏,

都攪咗好耐呀!


2019年11月15日 星期五

新玩具~手拉蒜蓉機


朋友仔幫我淘咗懶人之寶~手拉蒜蓉機,

幾錢???

我就真係唔記得喎!

將蒜頭切粒,

放入蒜蓉機內輕輕鬆鬆拉幾十零廿下,

咁就整咗細細粒嘅蒜蓉喇!

我加咗少少粟米油落去浸住D蒜蓉,

用唔哂放入雪櫃儲存1星期左右,

簡單易用又好玩。

呢個手拉蒜蓉機買1套送多把刀。


2019年11月14日 星期四

老火湯~蓮藕甘筍馬蹄綠豆鱆魚排骨湯


今日又煲老火湯,

蓮藕甘筍馬蹄綠豆鱆魚排骨湯;

我好鐘意食湯渣,

可以當飯食,

一D都唔嘥嘢架!



2019年11月12日 星期二

小香菇鴨腳炆排骨


買咗包小香菇,

食下食下剩番冇幾多餐囉!

老公和我都幾鐘意食呢款小香菇,

細細粒容易食,

今次加埋鴨腳和冬菇一齊炆,

簡直係絕配呀!

2019年11月10日 星期日

一年一度大閘蟹宴


每年老公同學都會攪大閘蟹宴架!

今年都唔例外;

昨晚就入咗錦繡花園會所食大閘蟹,

大閘蟹係老公同學買的,

今年D大閘蟹好好食,

膏多又大隻(約6兩半重),

都係每隻$120咋!

交去酒樓加工都係收每隻$20,

抵到呢!

呢餐兩人合共食咗3隻大閘蟹,

加埋晚飯都係$640呀!


2019年11月8日 星期五

栗子冬菇炆雞


買栗子和馬蹄一樣,

唔去皮都唔會知道佢裡面有冇爛;

今日買咗1磅栗子,

拆栗子殼拆到手指痛,

拆埋拆埋D栗子爛多過好,

最後剩番十幾廿粒係原整咋!


2019年11月7日 星期四

簡易版~藥膳雞腳湯


秋冬天氣真係好乾燥,

得閒煲D湯水飲下都唔錯架!

响雪櫃摷咗D藥材出嚟,

買舊豬腱和雞腳落去一齊煲,

飲完湯暖笠笠,

好正架!


2019年11月6日 星期三

今個冬天不會冷


唔知我係咪年紀越大越怕凍呢,

冬天沖涼真係凍到震架!

所以襯未到冬天,

去買定部浴室寶裝係廁所先得;

今日落元朗豐澤睇到呢部浴室寶啱哂屋企氣窗位置,

價錢又唔貴($1498機價+$380安裝費),

今日買明天送貨後天安裝;

買完機就行去交通廣場對面冬菇亭,

成記食豬扒飯,

豉油豬扒配雞翼、豉油豬扒配雞球,

加2杯凍檸茶都係$92呀!

舊年都係呢個時間去過,

每個餐加咗$2。


2019年11月4日 星期一

2019年11月2日 星期六

明目養肝湯+雞腳+唐排+瑤柱+蜜棗


明目養肝湯+雞腳(8隻)+唐排($60)+瑤柱(6粒)+蜜棗(3粒),

水滾後煲1小時15分鐘(中火滾後轉細火),

然後落埋杞子煲多15分鐘,

最後落鹽調味就有得飲喇!


2019年11月1日 星期五

南乳蓮藕木耳炆豬手


今日去街市見到隻唔係好大隻嘅新鮮豬手,

每隻都係$65,

又唔係好貴喎!

專登叫豬肉佬幫我斬唔好咁大件,

用嚟炆蓮藕最啱喇!

今次加埋個木耳落去一齊炆;

我試咗味喇,

嘻嘻,

真係好惹味架!


2019年10月31日 星期四

2019年10月29日 星期二


我鐘意買嘢係人都知,

日積月累下,

買埋買埋一大堆唔得使嘢後,

屋企可以用一個字嚟形容~亂!

上幾個月襯朋友仔得閒,

肯幫我哋做咗個新櫃,

我將D嘢全部執哂落個櫃裡面,

成間屋望落去整齊哂呀!


2019年10月28日 星期一

上海炒烏冬


上網睇咗視頻,

大師傅教煮上海粗麵,

簡單又易煮,

啱哂我呢個懶人呀!

不過今次我冇用上海麵改炒咗烏,

我覺得一樣咁好食呀!


2019年10月27日 星期日

柱候蘿蔔牛筋腩炆金錢肚


今朝炆咗一大鍋柱候蘿蔔牛筋腩金錢肚,

呢個餸係小魔怪至愛,

尤其係金錢肚,

留番俾佢做帶飯餸就啱哂啦!