2021年11月30日 星期二

十全十美~粉葛紅蘿蔔粟米栗子馬蹄湯(素湯)


講開素湯,

每次母親大人入親嚟天水圍我家,

都會要求我煲素湯俾佢飲,

尤其係呢款十全十美~粉葛紅蘿蔔粟米栗子馬蹄湯(素湯),

十款材料煲成,

有清熱袪濕毒等功效。


2021年11月29日 星期一

栗子冬菇炆雞翼


噚日買咗1磅栗子,

半磅用嚟煲素湯,

其餘果半磅就用嚟炆雞翼,

加埋十幾隻冬菇仔,

一大碟栗子冬菇炆雞翼出鍋啦!


2021年11月28日 星期日

家常便飯


今日朱家齊人食飯,

簡簡單單3餸1湯,

蒸水蛋、蒜蓉炒白菜、馬蹄蒸豬肉餅,

粉葛赤小豆扁豆花豆栗子粟米馬蹄素(陳皮、蜜棗)。


2021年11月27日 星期六

吉澳鴨州一日遊

今日我同老公參加咗金球旅行社舉辦嘅吉澳鴨州一日遊。

晨早6點15分出發去大學站,

食埋個早餐差不多8點15分集合,

全團28人,

就齊齊行去馬料水3號梯台,

坐渡輪先去鴨州,

全程要坐1.5小時呀!

為慶祝香港聯合國教科文組織地質公園成立10周年,

今日鴨州有慶祝活動,

所以連續有2隻渡輪(應該有成3百幾人)抵達鴨州,

成個鴨州都人山人海,

想影張靚相真係插針都插唔入呀!

2021年11月26日 星期五

蒜頭豆豉芋頭蒸排骨


今日小魔怪放假,

煮咗碟佢至愛嘅蒜頭豆豉芋頭蒸排骨。

芋頭蒸到軟軟棉棉,

真係超級好送飯架!

揀芋頭要揀輕身和內裡紫紋多嘅,

咁通常呢類芋頭會較粉甜呀!

2021年11月24日 星期三

棉花臘腸蒸雞


雪櫃有齊魚肚、雞扒和臘腸,

一碟棉花臘腸蒸雞出爐啦!

魚肚索哂D雞汁,

真係好正架!

2021年11月22日 星期一

黑椒洋蔥豬柳條


759亞信屋買嘅無激素豬扒真係好方便,

今朝去睇$100包有4包,

又係入貨嘅時候喇!

簡簡單單將豬扒切條,

加半個洋蔥和落少少黑椒汁一齊炒,

呢個餸真係好惹味架!


2021年11月21日 星期日

烚下烚下~支竹馬蹄羊腩煲


噚日買咗4磅幾冰鮮羊腩,

拿拿聲炆定D羊腩雪一晚,

今晚就攞嚟烚下烚下,

唔講咁多,

開餐喇喂!

2021年11月20日 星期六

蕃茄雞蛋煮肉碎


老公鐘意食蕃茄,

所以間唔中我都會煮蕃茄餸菜俾佢食,

最簡單緊係整蕃茄煮蛋啦!

今次加埋少少豬肉碎落去一齊煮,

呢個餸最啱撈飯呀!


2021年11月19日 星期五

收貨啦!

 

今次避開雙11先嚟去天貓落單,

11月15號落單,

11月18日到屋企,

都唔算好耐呀!

專登去搵特價嘢買,

真係俾正價平好多喎!

不過特價嘢只可以買一件,

唯有等下次睇下仲有冇優惠啦!


2021年11月17日 星期三

屯門美心皇宮大酒樓


今晚大伯大伯娘請食晚飯,

我哋一行6人去咗屯門美心皇宮食呀!

套餐有龍蝦伊麵、冬菇鮑魚、燒鵝、海星班外,

仲有西蘭花花枝帶子、杏汁螺片豬肺湯和紅豆芝麻湯丸糖水;

唔好講笑,

呢餐碟碟精品,

菜餚色香味俱全,

初初我哋驚唔夠食所以叫多碟蒜蓉炒豆苗,

點知最後都係食唔哂,

好彩我有自備餐盒,

明天又有碟餸喇喂!



2021年11月16日 星期二

柱候蓮藕炆排骨


今晚我要返學,

所以要煮定碟餸老公做晚餐呀!

我見雪櫃仲有少少柱候醬,

就整碟柱候蓮藕炆排骨啦!

2021年11月15日 星期一

氣炸蜜汁叉燒


噚日買咗冰鮮梅頭半肥瘦肉,

用嚟整叉燒就最啱喇!

醃咗一日一夜,

超級入味呀!

一餐食唔哂,

剩番嘅用嚟整叉燒炒蛋,

好食呀!


2021年11月14日 星期日

麻辣香鍋


今晚食麻辣香鍋,

材料豐富有肥牛、魷魚、雜丸和腐皮絲,

配料就有蓮藕、西蘭花、福花菜和金菇;

其實鐘意落咩料都得呀!

煮起一大鍋,

麻麻香香辣辣,

好惹味架!

2021年11月12日 星期五

蒜香香草烤雞


今餐食烤雞;

原來諗住我和老公每人食半隻雞,

不過老公話咁大隻雞,

我哋係食唔哂架!

所以到最後都係留番半邊雞明天再食呀!

2021年11月11日 星期四

生炒臘味糯米飯


天氣開始涼涼哋,

第一時間就諗起食生炒臘味燸米飯啦!

雖然好耐冇炒糯米飯,

好彩都冇失手,

炒到粒粒分明,

唔錯啊!

2021年11月10日 星期三

老火湯~粉葛紅蘿蔔赤小豆扁豆排骨湯

 

上次食大閘蟹時

飲得1碗粉葛湯,

唔係好夠喉添!

所以今日自己買材料煲嚟飲呀!

天氣涼涼哋,

有碗熱湯飲真係好鬼正架!

話時話,

有冇人好似我咁鐘意食粉葛呀???

2021年11月9日 星期二

紅燒黃立鯧

 

之前係百佳買嘅黃金鯧,

1包有2條$29.9,

唔貴喎!

買咗幾包返屋企,

最後食剩呢包咋!

用嚟煮紅燒黃金鯧,

送飯一流呀!

2021年11月8日 星期一

恭喜恭喜


噚晚妹夫請食飯,

慶祝佢晉升為校長呀!

四時恭候,

七時入席,

恭喜恭喜!

另外,

叫咗碟羅漢齋炒麵俾大魔怪食呀!

2021年11月7日 星期日

一年一度~大閘蟹宴


一年一度~大閘蟹宴又嚟啦!

舊年2020年因疫情關係停辦了一次,

今年老公班舊同學又有機會出嚟聚一聚喇!

我哋總共有16人,

分咗3圍枱呀!

今年D蟹好靚好多膏,

每隻大閘蟹有成7兩半以上,

約$125隻。

我和老公都唔敢食太多,

淺嚐一下都好滿足呀!

呢餐兩個人合共食咗3隻大閘蟹,

加埋其他餸菜,

呢餐食咗$945。

2021年11月5日 星期五

雜糧


話說今晚正想煮飯時,

屋苑管理員襟鐘話我哋廚房外牆水喉管漏水喎!

吓,

唔係掛我哋全屋裝修時連全屋喉管都已經更換,

冇理由咁化學D喉管得幾年貨仔掛;

老公和我都很懷疑,

於是攞個大電筒係客廳個窗照向廚房,

發覺係樓上單位廚房外牆水喉管漏水,

唔係我哋單位呀!

攪清楚事情後管理員就上樓上單位了解情況喇!

過咗煮飯時間添!

晚餐就求其煮餃子麵食算啦!

2021年11月4日 星期四

秘撈薯仔雞翼


今日整呢碟秘撈薯仔雞翼,

係用咗母親大人買俾我嘅大孖秘撈魚蛋醬整架!

用平時用開嘅李錦記咖哩醬有少少分別,

顏色比較深,

有香料味道兼微辣;

佢叫秘撈魚蛋醬,

下次搵日用佢嚟整咖哩豬皮魚蛋先得。

2021年11月3日 星期三

欖菜肉鬆炒四季豆


今次煮呢碟欖菜肉鬆炒四季豆,

四季豆冇走油,

只用熱水灼熟四季豆先嚟炒,

咁就冇咁多油,

食得健康呀!


2021年11月2日 星期二

咸魚雞粒炒飯

 

今晚我要返學學搓麵包,

所以噚晚專登洗多少少米,

留番D冷飯嚟炒俾老公做晚餐呀!

今午炒起時我食咗少少,

個飯咸咸香香,

都幾惹味架!

2021年11月1日 星期一

歐式天然酵母麵包制作精選實習中班~第六堂


第六堂~狄準麵包&彭帕尼可粗裸麥麵包。

原本呢個兩款包係冇餡架!

亞sir知我哋心意,

所以加咗幾條蟹柳俾我哋呀!