2010年7月30日 星期五

部腦又壞啦!

唔係嘛!
 
買咗幾日嘅新電腦又壞咗,
 
放咗工拿拿臨攞去整啦!
 
好彩未過保養,
 
唔使俾錢咋!
 
唔夠時間整咁多餸,
 
剩係整個魚批,
 
碟雞翼係買現成醃好嘅,
 
買番嚟焗熟佢就食飯啦!
 

 

2010年7月29日 星期四

打到嚟啦!

 
放工時,
個天都已經開始落雨,
點知當我準備晚餐時,
嘩!我睇見舊黑雲慢慢飄過嚟,
跟住就開始落大下,
仲不停咁閃電,
我都好想影低D閃電o架!
可惜次次都慢半拍,
影唔到呀!

2010年7月28日 星期三

黑色暴雨!

 
原來今日又有黑色暴雨啦!
 
我真係唔知喎!
 
我剩係知今日落雨落唔停咋!
 
可能係學校太多野整啦!
 
我哋將個課室D櫃裡嘅玩具、書和雜物等擺咗出嚟,
 
要嘅留底,唔要嘅即棄,
 
跟住又將D嘢全部放番入櫃,
 
咁就用咗我哋1日時間呀!
 
出面落雨落到七彩,
 
好彩唔使買餸,
 
因為昨日我已經買哂啦!
 

2010年7月27日 星期二

脆炸雞軟骨!

 
今日我都算幾好彩,
 
出街3次個天都冇落雨,
 
仲有少少陽光添!
 
點知次次當我踏入門口,
 
外面已經落雨落到七彩,
 
有帶傘都會成身濕哂果種呀!
 
明天我又要開始返工,
 
準備8月初開學啦!
 
咁快就過咗11日暑假,
 
有D唔捨得呀!

 

2010年7月25日 星期日

藥膳雞腳!

 
上次blog聚時,
 
藍媽媽整咗個藥膳雞腳請我哋食,
 
一個字嚟形容~正呀!
 
原來係酒樓食呢個雞腳好貴o架!
 
得果幾隻雞腳,
 
食到我到喉唔到肺,
 
唯有今日自己整咗嚟食啦!
 
整咩嘢都要多係我嘅特色,
 
整咗一大煲,
 
邊個有興趣就埋嚟食啦喂!
 

2010澳門狂食之旅~手信篇!

 
今次過澳門真係全程食食食冇停口o架!
唔單只食,
我哋仲買唔停手,
睇吓我哋買咗咩嘢返嚟啦!
鉅記~ 杏仁餅、紫菜鳳凰卷、花生糖、蝦子花生、沙爹豬柳條、
   合桃酥,仲有買酒店船票package裡送嘅鉅記禮物2份!(每間房1份)

2010年7月24日 星期六

雙拼pizza&冬瓜粒燕麥湯飯!

 
上次整pizza已經係6月頭嘅事啦!
 
見屋企剩得少半包麵粉,
 
而雪櫃又有少少材料係度,
 
整1個pizza咁多啦!

 

2010澳門狂食之旅!(第二天)

 
第二天早上,(7月23日)
澳門朝早下著細雨,
不過當我哋出門搵食時,
天氣又開始放晴啦!
可惜個個都仲未瞓醒,
得4個人包括我、老公、母親大人和姨甥仔,
去咗附近食早餐!
又買咗2個杯麵俾大小魔怪頂住肚先。

2010年7月23日 星期五

煎魚餅!

 
煎魚餅要用新鮮鯪魚起肉才會好味道,
但人懶冇計啦!
唯有退而求其次用攪碎魚肉代替,
加入冬菇和蝦米,
用慢火煎魚餅,
配上魚露好好味道o架!
     

  煎魚餅(冬菇、蝦米)
     

炸菜蒸豬肉
     

蠔油生菜
     

仲有今朝煲嘅冬瓜湯,
大小魔怪每人飲咗3大碗湯,2大碗飯。
咁又一餐!
 
 
 

  
 
  
大家可以入嚟Facebook讚下我新開嘅Fans專頁呀! 
 


 

2010澳門狂食之旅!(第一天)

 
我哋一行十人出發之前大家都好驚會落大雨,
好彩一路都係天黑黑、微微雨咋!
第一餐梗係中港城M記啦!
跟住坐中午12點船過大海~澳門啦!

2010年7月20日 星期二

魚露香草吞拿釀雞翼!

 
我係少年宮書城買咗本有關整雞翼嘅書,
 
啱哂大小魔怪啦!
 
因為佢哋係雞翼怪,
 
每逢我煮雞翼都啱哂佢哋胃口o架!
 
我見又未整過釀雞翼,
 
咪又試吓整囉!
 
原來拆雞翼又唔係難喎!
 
真係話易但又唔簡單啊!
 
好彩又俾我拆掂咗佢囉!
 

2010年7月19日 星期一

芝士肉醬焗茄子螺絲粉!

 
今日係我放暑假嘅第一個星期一,
 
真係唔明點解我都係5點幾已經醒咗,
 
超冇癮啊!
 
晨早起身便上網周圍八吓,
 
然後順便落街嘆個超標雞扒早餐,
 
嘻嘻!我唔食早餐唔安落呢!
 
 
跟住我當行晨運咁行咗去嘉湖銀座百佳超級廣場買餸,
 
一來一回出咗成身汗,
 
補番做運動條數啦!
 
係放假嘅日子,
 
如果得閒許可嘅話,
 
我會出多過一篇blog,
 
記低我呢幾日所整過嘅嘢食o架!
 
 

又出蕉啦!

 
呵呵呵!
 
今日我又出蕉啦!
 
用咗2隻香蕉、自發粉、糖、鮮奶和牛油,
 
加埋自己隨意嘅份量,
 
用焗爐180度焗25分鐘,
 
咁就焗咗3個六瓣杯和一個長型嘅香蕉蛋糕啦!
 
喂!開餐啦!
 
有下午茶食呀!

 

2010年7月16日 星期五

中式焗羊排!

 
放假啦!放假啦!
 
忙咗成個月咁耐,
 
返埋今日終於可以抖抖囉!
 
開心!
 
今日呢餐可以講係小魔怪愛吃篇。
 
因為今日我焗羊排,
 
小魔怪聽到話焗羊排,
 
已經笑哂出嚟!
 
不過大魔怪就唔鐘意食羊,
 
所以一早講明唔食;
 
好彩今日學校老師們開扒地食pizza,
 
食剩咗大半個pizza俾我攞咗返屋企,
 
食到佢飽飽唔使再食飯呀!

 

2010年7月15日 星期四

芝麻雞絲紅薯粉絲!(冷麵)

 
呢排熱到真係連煮都冇咁起勁呀!
 
最好日日有冰凍嘢食就好囉!
 
每次食親熱嘢我D汗就勁流,
 
有時我仲要開埋冷氣和風扇一齊吹先涼番咋!
 
老公都話我好誇張o架!
 
今日見打唔成風,
 
我整咗個冷麵嚟食,
 
不過唔係用烏冬、拉麵或蕎麥麵,
 
而係紅薯粉絲!
 
 

2010年7月14日 星期三

醬!醬!醬!

 
昨日清咗樽柱候醬,
 
今日又清埋樽叉燒醬,
 
少咗2樽後,
 
點解雪櫃仲有7樽醬醬未清完o架!
 
今日整嘅豬仔骨和青口,
 
都係雪櫃個冰箱度剿出嚟o架!
 

2010年7月13日 星期二

孜然焗雞膇!

 
今日我哋老師和小朋友到運動館舉行運動日,(有冷氣o架!)
 
玩競技、接力等等遊戲,
 
小朋友非常投入和踴躍參與,
 
連老師嘅我都玩得好開心呀!
 
不過返到學校超攰囉!
 
成個人散哂呀!
 
無力添!
 
唔想買餸,
 
唯有求求其其剿雪櫃有咩食咩啦!
 

2010年7月12日 星期一

開扒地~食KFC&涼拌炸菜腎片!

 
大小魔怪由今日起開始放暑假!
 
而嚟梗新學期佢哋會升中四啦!
 
2個仔對理科都冇咩興趣,
 
剩係鐘意睇歷史書,
 
所以如無意外佢哋都會選讀文科呀!
 
美其名話慶祝佢哋放暑假,
 
實際係由於我昨日睇波睡眠不足,
 
唔想郁唔想做,
 
所以今日叫KFC食呀!
 
1個檸辣脆雞桶餐$188、4個葡撻$16(特價)和4隻蜜蜜燒雞翼$42,
 
合共$246,
 
不過用匯豐信用咭有九折,
 
即係$221.4咋!
 

2010年7月11日 星期日

好串!報串???

 
呵呵呵!
 
依家我真係懷著期待的心情等放假啦!
 
呢幾日返學唔使做教學嘢,
 
剩係安排活動與小朋友一起玩,
 
超輕鬆!
 
之不過肯定明天我一定唔夠瞓,
 
因為要較定鬧鐘,
 
2點半起身睇世界杯冠軍戰~荷蘭對西班牙!
 
荷蘭必勝!
 
 

2010年7月10日 星期六

未放假先興奮!

 
終於鬆一口氣啦!
 
連續兩個星期六嘅畢業禮和家長日,
 
完滿結束!
 
過埋下星期5日嘅夏日活動後,
 
我就可以正式放10日暑假啦!
 
好期待啊!
 
唔得,
 
攞定支紅酒出嚟,
 
慶祝一下先得!
 
哈哈!
 
其實係費事半支紅酒擺係度咋!
 

2010年7月9日 星期五

是日小暑!

 
小暑即係小暑,
 
雖然今日都有番少少D風,
 
不過都係熱到我死死吓!
 
仲要煲埋冬瓜湯,
 
個廚房超熱呀!
 
唔想食飯食咩好,
 
梗係食沙律啦!
 
昨日除咗整咗個泰式酸辣鳳爪外,
 
我仲用新鮮粟米、薯仔、蘋果、青蘋果和青瓜粒,
 
整咗個超簡易沙律。
 
配上燒雞髀,
 
嘩!簡直透心涼到痺呀!
 

2010年7月6日 星期二

明天小暑!

 
各位blog友仔,
 
明天小暑呀!
 
記得要煲冬瓜去濕湯啦!
 
所以話中國時令真係幾準o架!
 
呢幾日熱到飛起,
 
日日都成33度以上,
 
真係人都顛呀!
 
唔想食熱嘢,
 
整咗個冷盤食呀!

 

2010年7月5日 星期一

攪攪新意思!

 
攪咩好呢???
 
係元朗買咗D細細粒嘅薯仔,
 
賣嘢嘅哥哥仔話薯仔唔使去皮,
 
就咁烚嚟食好正喎!
 
於是咪買咗2袋嚟試吓囉!
 
不過又唔想齋烚,
 
唯有諗諗計攪D花臣啦!

 

2010年7月1日 星期四

為食之禍!

 
噚晚老公剝咗3粒荔枝俾我食,
 
今日竟然喉嚨痛呀!
 
呢排真係得閒死唔得閒病,
 
星期六又要做畢業禮司儀,
 
點都唔可以俾自己病o架!
 
好彩今日放假,
 
食埋感冒藥,
 
瞓足成個下午,
 
焗一身汗,
 
希望頂得住啦! 
 
今次我真係有得睇冇得食啦!
 
人哋話感冒唔可以食雞,
 
睇住大小魔怪食得咁滋味,
 
慘情!