今日中秋節，
我祝大家中秋節快樂，
人月兩團圓!
噚日中午係惠州返嚟，
經過羅湖城，
緊係要去買燒肉和雞返嚟啦!
咁啱大小魔怪兩個都返嚟食晚飯，
所以噚晚我哋朱家提早做節呀!
燒肉和白切雞，
灼菜芯和節瓜鱆魚眉豆花生排骨湯。
9月26日(星期二)
今朝9點半我同老公去做義工，
因為嘉湖民生事務會遲下有個長者茶聚，
我哋幫忙去賣票，
我負責登記老公就負責收錢，
經過嘉湖銀座商場附近公園，
見到好多白兔公仔，
好靚呀!
記得我生大小魔怪時係短髮外，
大大話話二十七、八年都未試過剪短頭髮，
由於近期我嘅脫髮情況好似嚴重咗，
把心一橫，
去剪頭髮呀!
我剪短頭髮邊個最開心???
緊係老公啦!
佢話可以慳好多洗頭水呀!
今早用咗半包鹽焗雞粉醃咗兩塊雞扒，
大小魔怪鐘意食薑蔥蓉，
簡簡單單煎香塊雞扒，
將薑蔥蓉淋上面，
嘩，
呢碟雞扒真係好送飯架!
老公話想食生炒糯米飯，
米飯班主叫到點可以托手踭呀!
拿拿臨買齊材料，
開工啦!
兩個人食，
炒咗一大碟，
食剩留番明天再食過。
新北江開咗間章魚無雙，
大魔怪噚日買咗返嚟試下，
佢買咗蟹子章魚燒，
8粒$42，
好耐冇食章魚燒，
食咗3粒已經飽哂!
今日買咗節蓮藕嚟炆腩排花生，
已經揀兩頭有蓮藕蒂嘅蓮藕(防止有泥)，
點知切開都係有泥，
唯有用個新牙刷，
慢慢刷乾淨佢啦!
原本小魔怪話唔食晚飯去做運動，
點知見到有呢碟餸，
即刻坐低食埋先走呀!
今餐又嚟家常便飯啦!
噚日包咗餃子，
大小魔怪即刻話今晚想食，
除咗食餃子外，
我仲整咗滷水雞翼和火雞腎，
加多碟菜芯炒牛肉，
開得飯啦喂!
今日我見冰箱有空位，
又差不多有4個月冇包餃子，
所以拿拿臨買材料，
包我至愛嘅韭菜豬肉雞蛋餃。
1斤餃子皮，
包咗56隻餃子，
仲有餃子皮剩，
睇下明天整咩好；
午餐食湯餃，
我灼咗12隻同老公一齊食，
正呀!
噚晚晚餐三餸1湯，
客家釀豆腐卜炆冬瓜、自製叉燒&豬頸肉、
白灼菜芯和雪梨海底椰雪耳湯，
大魔怪和女朋友仔最鐘意食叉燒和豬頸肉，
佢哋食得好開心呀!
小魔怪中午去踩單車，
話唔使等佢食飯，
我就誤會佢唔返嚟食飯，
當小魔怪7點半返嚟話食飯時，
大件事喇!
冇留餸俾佢添!
唯有煮出前一丁俾佢食啦!
好彩仲有湯咋!
下次一定要問清楚佢返唔返嚟食飯先得。
原本呢碟XO醬海鮮炆伊麵係我嘅生日會其中一個餸，
點知打風取消咗，
所以冇煮到呀!
攪到今日先煮嚟食，
咁啱大魔怪女朋友仔又嚟咗，
佢有口福了；
今朝煲埋煲雞粥，
買埋油炸鬼和牛脷酥，
開得飯啦!
傳統客家人會在8月初一拜山祭祖，
今年又係朱家祖先晉金大日子，
所以大伯、大伯娘、老公和我4個人，
預早一日星期四就返惠州住一晚，
好讓星期五一早入老家石垻拜山。
未返惠州之前，
先去羅湖城丹桂軒飲茶，
呢餐食咗313人仔，
少少貴。
大小魔怪兩個都鐘意食肥牛，
所以今餐整咗呢個沙茶肥牛金菇粉絲煲，
肥牛留番俾大小魔怪食，
而我就食粉絲和金菇，
皆大歡喜呀!
屋苑商場有個細街市，
有幾細???
菜、魚、豬肉、凍肉、生果和雜貨舖，
每樣都係得一檔，
有時唔想行去其他街市，
我就會去呢度買餸；
今日去魚檔買咗2份鯇魚，
1份$18，
2份$34，
落咗惠州甜梅菜一齊蒸，
老公話佢平時如果出外食飯都會叫份蒸魚餐，
最平都要$50，
今次$34真係超抵食呀!
响759亞信屋買咗包意粉醬，
細細包啱哂我和老公兩個人食呀!
加咗塊雞扒(切粒)落去，
灑埋芝士粉係意粉面，
簡簡單單又一餐!
不過呢餐都係爭少少，
爭咗呢件西蘭花呀!
又係清雪櫃物資時間啦!
雪櫃有帆立貝、蝦仁和金菇，
浸埋D粉絲，
蒸咗呢碟蒜蓉粉絲金菇蒸海鮮，
小魔怪話好有街邊風味，
可惜係蒸，
佢話如果係燒烤嘅話，
肯定仲惹味呀!
噚晚果場暴雨真係好犀利，
雨由噚日黃昏後不停咁落，
雨大到睇唔到窗前景象，
天文台係短時間已經掛咗黃、紅和黑雨，
直到今朝起身睇到新聞，
先知道外面水浸情況非常嚴重，
百年一遇嘅大雨，
黑雨直到今日下午3點幾先轉黃雨呀!
今朝一早就出去買定餸，
早午煮粉麵食，
晚餐就整咗氣炸叉燒雞翼、椒鹽豆角和紫菜雜丸湯。
呢個餸原本係生日party煮俾家人食，
點知因颱風影響取消咗，
所有準備咗嘅材料唯有自己煮嚟食啦!
冬菇鴨腳炆排骨，
炆咗一大鍋，
分咗兩餐食呀!
今日約咗朋友仔去深圳食嘢，
福田口岸過關，
搭地鐵10號線去崗夏站B出口卓悅中心，
朋友仔專程嚟呢度~Tomacodo花廚，
網上睇到食評唔錯，
而且環境佈置以花為主，
打咭真係好靚架!
我哋3個人點咗3個午餐單人餐，
即時微信關注即送1小支桂花果凍，
大眾點評分享兼寫埋食評，
就送小罐薯條和一杯果凍呀!
今日我生日，
一切由美食開始!
早上食咗個豐富早餐；
中午就同老公搭輕鐵去天一商場閒逛，
老公請食午餐，
之後慢慢行過去天水圍銀座，
順便去東海棠買咗個小小生日蛋糕返屋企；
晚餐就食得簡單，
海鮮炒飯、蜜汁雞翼和灼菜。
成日整節瓜粉絲蝦米，
食到有少少厭呀!
所以今次浸咗瑤柱和雲腿，
用嚟炆呢碟節瓜，
呢個餸咸咸香香又有汁，
送飯一流呀!
原本噚日我嘅生日party，
可惜因颱風取消了，
9月份開學嘅大日子，
家人們都好忙碌難約齊人呀!
今日大魔怪女朋友仔，
話請我食午餐慶祝生日，
大魔怪揀咗去食火鍋~牛大人(元朗形點II)。
我哋叫咗$218放題90分鐘，
(平時$208星期六日和假期加$10)
蔬菜、丸類、飲品、麵食和調味都係自選自助，
肉類和熟食就要用手機落單呀!
今日大部份時間都係8號風球，
直到下午4點左右轉番3號風球；
老公落街行咗一個圈，
佢話市面已經開始好熱鬧，
有好多市民都去商場食嘢和行街街，
一齊如常了。
今晚食酸菜魚配肥牛鍋，
加埋一大堆配菜，
食到大小魔怪Lam Lam脷呀!
今次呢個超級颱風蘇拉，
上午對我哋真係冇咩影響，
冇風又冇雨；
但到下午開始，
有雨但感受唔到有風；
到依家晚上8點左右，
出面狂風又暴雨，
呼呼風聲，
都幾嚇人架!
希望大家都平平安安啦!
早餐如常出街食，
仲買咗少少菜和肉返屋企添!
