家鄉米粉~雞蛋肉碎炒米粉

今晚晚餐食家鄉米粉~雞蛋肉碎炒米粉，

炒咗4個惠州買返嚟嘅河源米粉，

米粉口感係爽口彈牙的，

用咗菜芯、豬肉碎和雞蛋炒勻就食得，

簡簡單單又一餐啦喂!

菜遠牛肉炒河粉

平時我和老公兩個人食嘅午餐，

有冷飯就炒飯食，

冇冷飯就會煮粉麵嚟食，

今餐就煮咗菜遠牛肉炒河粉，

加少少辣椒醬拌勻嚟食，

好惹味架!

例湯~青紅蘿蔔粟米花膠螺片煲排骨頭

真係好耐冇煲過青紅蘿蔔湯，

大家都明白點解(明嘅就明啦)!😢😢😢

今日買齊材料煲呢個朱家家常例湯，

加埋花膠仔和螺片，

升級版青紅蘿蔔湯出爐喇!

又又又係惠州

8月26日星期六，

中午2點左右，

我和老公兩個人趕返惠州，

攪埋新屋裝修D手尾，

當日經羅湖口岸過關超多人呀!

返到惠州匯合姑奶佢哋，

4個人去搵食啦!

男人的浪漫~冬菇豆腐炆火腩

男人的浪漫~冬菇豆腐炆火腩，

唔單只男人鐘意食，

哈哈，

我係女人都鐘意食呀!

清清哋~絲瓜炒潮州魚卷

今晚煮咗碟絲瓜炒潮州魚卷，

清清哋都唔錯架!

我好鐘意食絲瓜，

清甜又爽口，

夏天食就最啱喇!

我落咗少少鹽和糖調味，

非常簡單又好味道呀!

又係家常便飯

今日又係家常便飯篇，

馬拉盞炒通菜、

馬蹄土魷蒸肉餅、

香煎三文魚，

簡簡單單又一餐啦喂!

菜乾羅漢果煲豬腱

今日七夕情人節，

煲咗個甜甜蜜蜜嘅湯水，

菜乾羅漢果煲豬腱，

秋天天氣乾燥，

飲番碗潤喉湯水，

特別好味道架!

又返惠州

 

噚日星期日，

我哋又返惠州喇!

姑奶之前幫手買咗部份傢俬，

但我哋主人房嘅床仲未買，

所以噚日就返咗惠州買傢俬。

日式氣炸雞肉

今日下午5點左右，

小魔怪話返嚟食飯，

拿拿臨摷下雪櫃有咩食材先得!

攞咗2塊雞扒出嚟解凍，

用日式炸雞粉醃咗一陣，

就用氣炸鍋炸一炸佢，

油都唔使落一滴，

好快有炸雞食，

快靚正!

好味道呀!

家常便飯

原本今晚我想煮洋蔥豬扒，

點知小魔怪話想食粟米粒，

所以即刻變成粟米粒燴豬扒，

佢話想飲罐頭蘑菇湯，

OK全完冇問題呀!

炒埋碟菜芯炒牛肉，

開得飯喇!

黑椒牛肉炒意粉

今晚食黑椒牛肉炒意粉，

前排買咗塊牛仔肉，

切片嚟炒意粉，

配埋洋蔥一齊炒，

特別惹味呀!

咸魚蒸肉片

噚日有網友問我買咩肉整叉燒，

我買嘅係梅頭肉，

肉檔哥哥話叫第一刀，

食落爽口兼有少少肥，

用嚟整叉燒、炒或蒸都好好食；

今晚就蒸咗碟咸魚蒸肉片，

又係一個送飯一流嘅家常菜嚟架!

氣炸蜜汁叉燒

今日買咗舊靚靚梅頭肉，

拿拿臨醃咗嚟整叉燒，

舊叉燒又腍又滑

連大魔怪都讚好食呀!

南乳蓮藕支竹木耳炆五花腩肉

 

今日炆咗一大鍋南乳蓮藕支竹木耳炆五花腩肉，

呢個配搭真係冇得輸，

南乳汁送飯一流呀!

我食得最多唔係五花腩肉，

而係蓮藕和木耳呀!

粟米肉碎燴豆腐

今晚得我和老公兩個人撐枱腳，

所以簡單煮咗碟粟米肉碎燴豆腐，

呢個餸撈飯食一流，

大人細路都鐘意食呀!

家常便飯

今日大魔怪女朋友仔嚟食晚飯，

佢前排去咗日本旅行，

攞咗D日本手信俾我哋呀!

真係好多謝呀!😄😄😄💗💗💗

中山三日兩夜hea遊

8月9日星期三，

我和老公約咗妹妹一家和姐姐，

齊齊上中山，

參觀妹妹和姐姐在中山的家，

由於妹夫要返工，

祁祁又要上堂，

所以約咗黃昏5點係港珠澳香港口岸等，

坐金巴去珠海，

再網約6人車上中山。

立秋~清補涼豬腱湯

今日係廿四節氣之一嘅立秋，

簡單煲咗清補涼豬腱湯，

有清熱除濕、健脾潤肺、袪水腫等功效，

配埋紅蘿蔔、粟米、瑤柱、和蜜棗，

煲1個半小時，

落鹽調味就飲得喇！

香煎豆腐燴肉碎

香煎豆腐燴肉碎，

間中食得清淡都唔錯架!

炒多碟菜就食得，

正呀!

新手機

用緊部華為手機，

影相功能開始short short哋，

影相對唔到焦呀!

今次換咗HONOR magic4(金色)，

店員話我用開華為，

呢個電話一定啱哂我用呀！

承惠$5999，

兼做埋會員，

送咗一大堆禮品俾我，

有按摩捧、手提風扇、藍牙耳機、無線充電器和保暖杯，

今次大豐收了。

又嚟返惠州

8月3日星期四，

我、老公和姑奶3個人返咗惠州，

因為新屋已經裝修得八八九九，

仲有少少手尾就可以買傢俬喇!

水和電一早已經開通，

依家要盡快攪煤氣、電視網絡，

至於全屋傢俬和其他濕濕碎碎野，

真係買極都買唔完，

好彩唔急，

唯有慢慢添置啦!

外賣~芙蓉德好味手撕雞(天瑞街市)

今晚同小魔怪撐枱腳，

大家都唔想出街食，

唯有叫foodpanda，

今次叫咗芙蓉德好味手撕雞(天瑞街市)，

每逢我和老公返大陸，

大小魔怪好鐘意叫呢間嘅手撕雞，

佢哋食過好多次，

而我第一次食，

又唔錯喎!

叉燒醬豬頸肉&雞翼

小魔怪係屋企食飯，

唔煮肉係唔得架!

因為佢係食肉獸，

整咗呢碟叉燒醬豬頸肉&雞翼，

呢餐啱哂佢口味呀!