2010年6月30日 星期三

沙爹雞翼尖!

 
明天是7月1日公眾假期,
 
係咁忙碌嘅日子可以休息番一日,
 
超爽呀!
 
不過嚟梗星期五又再忙過啦!
 
我仲可能唔可以返屋企食飯添!
 
 

2010年6月29日 星期二

忙!

 
連續兩個星期六,
 
對我哋幼稚園嚟講係大日子啊!
 
因為畢業禮和家長會都會係呢兩個星期六舉行呀!
 
身為老師嘅我,
 
呢段時間係最最最忙碌o架!
 
日日要與小朋友排練表演節目,
 
又要寫下學期評估報告,
 
好忙呀!
 
不過點忙都要食!
 

2010年6月27日 星期日

懶人版~焗魚批!

 
我好鐘意上網睇煮食blog,
 
因為有好多烹飪高手係度,
 
等我可以有唔同靈感,
 
煮多D唔同款式嘅餸俾大小魔怪食嘛!
 
今日我就跟咗V女整咗個魚批,
 
V女個魚批整得好鬼靚和超吸引呀!
 
可惜有好多材料我屋企都冇,
 
惟有改改用屋企已有嘅材料啦!
 
Sorry呀V女,
 
我將妳整得咁靚嘅魚批,
 
改頭換面呀!
 
整得唔靚唔好介意呀!

 

2010年6月23日 星期三

冰梅豬手!(話梅豬手)

 
今日老公請假去睇牙醫脫智慧齒。
 
因為老公是公務員的關係,
 
所以選擇到免費嘅政府牙科。
 
脫牙時,
 
醫生幫老公打了2支麻醉針,
 
吩咐他10分鐘後開始脫牙;
 
當10分鐘過後,
 
老公再次進入手術室,
 
佢唔係脫牙,
 
而係同醫生講:
 
 
醫生,D麻醉藥冇料到喎!點脫呀???
 
醫生即刻為老公補多2支麻醉針後,
 
即時開始脫智慧齒。
 
事後我問老公痛唔痛o架???
 
少少啦!男人忍得痛呀!
 
俾我,我暈咗好耐啦!
 
 

2010年6月20日 星期日

父親節快樂!

 
Happy Fathers Day



Papa Bear
 


今日是父親節,
祝天下父親父親節快樂!
嘻嘻!包括我老公在內呀!
我為咗要做個好老婆,
所以呢餐餸全部都係老公鐘意食嘅。

蕃茄燴豬扒

麵豉蒸鯇魚

木瓜眉豆花生雞腳紅棗排骨湯
 
 
 
 

 
  
大家可以入嚟Facebook讚下我新開嘅Fans專頁呀! 

 


 
 

2010年6月19日 星期六

雜菜燒汁焗魚柳!

 
今日我把聲依然好磁性啊!
 
而且仲好攰添!
 
下午同老公去元朗走咗轉之後,
 
嘩!熱到死死吓,
 
休息完又要煮飯啦!
 

2010年6月18日 星期五

瑞士汁炒牛展拉麵!

 
今朝起身,
 
感覺喉嚨好唔舒服,
 
拿拿臨飲杯暖水落肚,
 
不過依然冇咩改善,
 
返到學校我把聲仲沙埋添,
 
放假先嚟病,
 
激死人啦!
 
口啖啖唔想食飯,
 
諗起blog友Tomato整嘅瑞士汁牛肉絲炒意粉
 
嘻嘻!有得食啦!
 

 

2010年6月17日 星期四

薑蔥爆雞!

 
細細個真係好少食到雞,
 
只有大時大節先有得食,
 
仲唔係一餐食哂o架!
 
起碼要留半隻第日食。
 
好喜歡用薑蔥爆嘅方法食雞,
 
因為超超超惹味呀!
 

2010年6月16日 星期三

醬燒豬仔骨&雞粥!

 
呢個豬仔骨,
 
 
早幾日已經買咗返屋企,
 
 
 
不過老公入咗醫院,
 
攪到我冇哂心機整嘢食,
 
呢兩日嘅晚餐都係工人姐姐煮咋!
 
昨日終於可以攞出嚟解凍啦!
 
 

2010年6月13日 星期日

一年一度糭歸來!

 
一年一度糭歸來!
今日係包糭嘅大日子,
之前幾日我已經買定包糭材料,
糭葉、水草、糯米9斤、開邊綠豆4斤、咸蛋30隻、
蝦米、豬腩肉2斤半和乾蔥頭1包。
昨晚我和工人姐姐已經開始準備~剪糭葉、洗糭葉,
豬腩肉用五香粉、豉油、糖和少少紹酒醃一晚;
今朝我4點幾起身洗糯米、洗綠豆,
浸米和豆6個鐘,
加3匙羹鹽和油撈勻。
跟住烚糭葉和草、咸蛋黃開半、蝦米浸軟。
我包嘅係客家糭,
所以會先將乾蔥頭剁碎、爆香加豬腩肉和蝦米略煮。
開始包糭啦!
今年總共包咗68隻,
每轉烚咗3個鐘左右啦!
每次烚15隻,
嘩有排烚呀!
其中有8隻糭係冇咸蛋黃,
因為小魔怪唔食蛋黃呀!
P.S.今年買嘅糭葉特別靚,
       塊塊都好大塊,又冇咩爛,
       最重要係1斤$28咋!
       有D糭我用咗2塊葉已經包好啦!
       隻隻都好似枕頭咁,
       好型呀!

2010年6月9日 星期三

香茅豬扒and雞翼!

 
今個星期開始,
 
大小魔怪又要早放學啦!
 
因為佢哋依家考梗試,
 
10點幾已經放學返屋企等食午飯。
 
我放咗工返嚟,
 
大魔怪第一句對我講嘅係:
 
「媽咪,好肚餓呀!」
 
「2碗飯點夠我食o架!」
 
仲哋仲將我屋企所有食得嘅嘢全部清哂,
 
2隻蝗蟲又再出動啦!
 

2010年6月8日 星期二

芝士洋蔥煙肉焗青口

 
本來我都唔想講工人姐姐D嘢,
 
因為今次太勞氣啦!
 
唔講唔得!
 
話說每次有舊餸,
 
工人姐姐都唔會第二餐攞出嚟話我知,
 
有時仲儲埋3-4日嘅餸係雪櫃添!
 
次次都要我提佢清理,
 
或要工人姐姐第二日攞出嚟俾老公做早餐。
 
今日老公突然話大魔怪昨日食剩咗半罐五香肉丁,
 
想話攞出嚟做餸,
 
點知工人姐姐話倒咗啦!
 
佢佢佢竟然倒咗我嘅至愛呀!
 
我D火已經上哂腦啦!
 
我即刻走出廚房,
 
費事發生命案呀!
 
 

 

2010年6月7日 星期一

粟米墨魚煎餅!


嘩嘩嘩!

真係估唔到呢幾日冇收電郵,

竟然一次過俾我睇番哂,

有成三佰幾個呀!

嘻嘻!唔睇唔知我咁八喎!

同事母親幫我買咗支酸辣汁,

佢哋話用嚟點魚餅、蝦餅或墨魚餅好正喎!

於是我又要專登去街市買餸啦!
 
 

2010年6月6日 星期日

絕緣!

 
雞髀,
 
我細細個成日都有得食,
 
父親大人實第一時間留番俾我哋食。
 
但係,
 
自從大小魔怪出咗世兼懂性知道雞髀呢樣嘢之後,
 
我與雞髀已經絕緣了! 
 
一隻雞得2隻髀,
 
大小魔怪1人1隻,
 
唉!我有得睇冇得食!
 
今日,
 
我買咗6隻雞髀返屋企,
 
實行1人1隻唔使爭!
 
買咗6隻雞髀都係$25,
 
抵過出街食啦!
 
 

2010年6月4日 星期五

Very good!

 
我日日都見到blog友仔整pizza,
俾佢哋挑起我條pizza筋添!
今次轉轉口味,
買咗pack雜錦海鮮嚟整pizza,
加埋千島醬、粟米、蟹柳和蘑菇,
正呀!
明知大小魔怪剩食pizza唔夠飽,
整多個白汁香草雞絲三色螺粉,
咁就very good啦!

2010年6月2日 星期三

再焗德國咸豬手!

 
自上次試焗德國咸豬手後,
 
小魔怪成日話好想再食,
 
見今日學校又訂凍肉,
 
順便訂2隻急凍咸豬手啦!
 
兩隻大大隻嘅咸豬手都係$47.5咋!
 
雖然仍然焗得唔靚,
 
D皮唔太脆呀!
 
不過焗出嚟味道唔太咸,
 
又有蜜糖味,
 
正呀!
 
 

焗德國咸豬手
 
 

材料: 咸豬手一隻、蕃茄3個、紅蘿蔔1個和薯仔2個
 
調味: 黑椒碎、蜜糖
 
做法: 將咸豬手出水;煲滾半煲水落咸豬手、蕃茄、
 
紅蘿蔔和薯仔煲1小時,撈起咸豬手瀝乾水份;
 
預熱焗爐200度15分鐘;用針刺豬皮表面,灑上黑椒碎焗1小時,
 
每隔20分鐘反一反豬手,焗至兩面金黃色,最後搽蜜糖再焗多5分鐘便成。



 



用咸豬手煲嘅蕃茄薯仔紅蘿蔔湯,
 
鹽都唔使加,
 
好飲!
 
 

 
 
  
大家可以入嚟Facebook讚下我新開嘅Fans專頁呀!