2022年8月30日 星期二

雜記


呢排我嘅腸胃出現問題,

星期日終於頂唔順走咗去睇急症,

等咗6個鐘先睇到醫生,

最後急症室醫生俾咗封轉介信俾我睇專科,

雖然已經排咗期,

但唔知要等幾耐,

所以最後我都係book咗去仁安醫院睇專科醫生。

呢排冇心情煮飯,

餐餐都係求其煮,

睇翻D相先知我原來餐餐都係煮排骨,

哈哈,

好彩大家都冇投訴咋!

2022年8月27日 星期六

休息


呢排我嘅腸胃出現問題,

久唔久就會一瀉千里,

慘不忍睹!😢😢😢

之前已經睇過急症都係咁,

冇改善呀!

噚日炆咗煲牛腩我哋都冇食到,

剩係煲咗瑤柱瘦肉粥食;

今日加個蘿蔔嚟炆煲牛腩,

我都冇份食,

簡簡單單煮咗麵條食算喇!

睇嚟我都要休息幾日先得囉!

2022年8月25日 星期四

照燒秋刀魚


老公鐘意食秋刀魚,

襯今朝仍然打緊風,

就整咗呢碟照燒秋刀魚俾佢慢慢嘆啦!

2022年8月22日 星期一

韭菜芯炒吊片肉絲虎蝦乾


虎蝦乾係流浮山買,

超大隻超鮮甜,

我姐姐推介俾我哋食呀!

記得老公初初反對我買架,

好彩我冇理佢咋!

今次炒呢碟韭菜芯炒吊片肉絲虎蝦乾,

浸咗幾隻虎蝦乾嚟炒,

老公食過話原來虎蝦乾咁好食,

真係冇買錯呀!


2022年8月21日 星期日

孜然雞膇配薯仔粒

 

屋企有3隻雞膇仔,

好似唔係好夠食咁喎;

唔怕,

我摷到屋企有個薯仔,

加埋落去一齊氣炸,

炸完出嚟香噴噴,

大魔怪話薯仔好好食呀!

2022年8月20日 星期六

出師有名~叫外賣

 

今日晚餐叫外賣,

點解嘅???

哈哈,

因為大魔怪收到退稅,

佢話請我哋食一餐,

今次有口福啦!

外賣係新北江嘅辣將軍呀!

2022年8月19日 星期五

清補涼煲節瓜豬腱湯


今日靚湯~清補涼煲節瓜豬腱湯;

今日小魔怪有口福啦!

因為佢中午先返工,

所以佢可以飲到頭啖湯,

連湯連渣成碗食哂,

一D都唔嘥呀!

2022年8月18日 星期四

蕃茄炒蛋


前兩日買嘅農場蛋,

雖然冇湖北蛋個蛋黃咁深色,

但奇就奇在呢兩日打嘅蛋都係雙黃的,

噚晚打果3隻蛋有6個蛋黃,

今朝煎雙蛋就有4個蛋黃,

連打5隻雞蛋有10個黃,

睇嚟我要買六合彩先得囉!

2022年8月17日 星期三

南乳蓮藕炆腩排


買咗2條腩排嚟炆蓮藕,

配料就加咗支竹豆腐卜和木耳,

炆起一大鍋,

肯定食唔哂,

唯有放入保鮮盒冰咗佢,

咁過兩日食都唔怕啦!


2022年8月16日 星期二

日式麵包制作精選實習中班~第六、七堂

 

第六堂~Expresso芒果芝士包&濃情軟心朱古力包,

食軟心朱古力包真係要好小心,

因為D朱古力係會漏哂出嚟架!

2022年8月15日 星期一

恭喜恭喜


噚日,

我哋黃氏一家又有聚會喇!

除慶賀妹妹榮升副校長外,

順便慶祝姐姐(7月)和我(9月)嘅生日。

多謝妹妹噚日升職請食飯,

仲有母親大人俾我嘅生日利是呀!

姐姐和我送咗個小擺設俾妹妹。

大人有大人打麻雀,

小朋友都係打牌呀!

限聚令下,

我哋12人分枱食飯,

年長朋友8人一枱,

年青人4人一枱。

2022年8月13日 星期六

豉汁蒸鯇魚腩


買咗舊鯇魚腩$42,

叫魚佬將魚切開4件,

蒸起嚟易熟D呀!

點知臨蒸魚時先發現屋企冇薑,

好彩仲有蔥和辣椒仔,

唔係都唔知點算囉!

鯇魚好新鮮,

用蒜頭豆豉醬(1湯匙)醃夠哂惹味,

咩調味都唔使落,

蒸熟魚後落辣椒仔和蔥粒,

贊熟油係魚面就食得啦!



2022年8月12日 星期五

家鄉煎薄罉


我突然好想食薄罉,

拿拿臨買齊材料開工啦喂!

麵粉、糯米粉、蝦米、菜脯、蔥粒,

簡簡單單攪好個粉漿落油鑊煎熟就得;

今日煎咗2個薄罉試下味道,

下次就可以煎多少少架啦!

食落裡面軟軟糯糯,

邊位就香香脆脆,

好有酒樓feel呀!


2022年8月11日 星期四

整色整水


近排天氣真係太熱喇!

所以我7月尾走咗去剪頭髮兼焗油,

足足剪短咗有5寸呀!

隔咗2星期左右,

今日我又去做顏色焗油,

遮哂頭頂嘅白頭髮,

成個人精神哂呀!

2022年8月10日 星期三

家常便飯


大魔怪呢兩個星期放大假,

所以佢多咗留係屋企食飯,

多咗一個人食飯,

今日煲咗老火湯~海底椰海星雪梨瑤柱煲西施骨

煮咗兩個餸~咖哩薯仔炆排骨和金絲白菜粉絲煮蝦米。

大魔怪讚碟咖哩好食,

添咗2碗飯,

飲咗一大碗湯呀!

2022年8月9日 星期二

氣炸蜜汁叉燒


噚日買咗1斤幾梅頭肉,

切起部份瘦瘦哋嘅肉用嚟炒菜,

其餘帶肥嘅梅頭肉就醃咗嚟做叉燒,

叉燒要有少少肥和燶燶哋先好食架!

不過我都有切咗D燶邊呀!


2022年8月8日 星期一

蒜蓉蜜糖炒紅腸


見冰箱仲有條紅腸係度,

今餐決定加餸,

炒多碟蒜蓉蜜糖炒紅腸,

簡單又好味,

一家人食搶下搶下就冇哂啦!


2022年8月7日 星期日

鹵水雜錦~豬肚、火雞腎、雞全翼、滷蛋


雪櫃仲有半支鹵水汁,

今日就買咗D材料返嚟整鹵水雜錦喇!

豬肚、火雞腎、雞全翼、滷蛋,

呢D都係大家鐘意食嘅鹵水食品呀!

2022年8月6日 星期六

芥菜咸蛋蝦乾咸排骨煲


前日買咗排骨諗住買嚟煲粥食,

點知老公話想食飯喎!

排骨已經醃咸咗,

點算好???

所以今日買咗芥菜返嚟整咗呢個煲仔菜喇!

芥菜咸蛋蝦乾咸排骨煲,

滾埋一大鍋,

下火靚湯水,

好飲架!

2022年8月5日 星期五

青瓜雲耳炒肉片


老公鐘意食呢款水果青瓜,

佢話呢款青瓜好爽口,

今日就用佢嚟整青瓜雲耳炒肉片呀!

快靚正,

好快有飯食架啦!

2022年8月4日 星期四

2022年8月3日 星期三

冬瓜袪濕茶


前兩日大魔怪話想飲涼茶袪濕,

真係好難想像年輕人話要飲涼茶喎!

老公拿拿臨去藥房買咗包袪濕茶$15,

今日我就買咗冬瓜嚟煲冬瓜袪濕茶喇!

將12碗水放入煲內,

加所有材料煲滾,

轉小火慢火煲45分鐘,

落1塊片糖煲多5~8分鐘便成。

2022年8月2日 星期二

鹽焗雞兩食


噚日朝早用鹽焗雞粉醃咗隻雞,

噚晚用氣炸鍋氣炸咗半隻嚟食,

今朝早蒸埋另外果半隻雞做午餐,

兩個食法各有特色呀!

雖然我買嘅係冰鮮雞,

但食起嚟皮脆肉嫩多汁,

認真唔錯架!

不過用氣炸方法有個好處,

佢炸咋D雞油出嚟,

原來半隻雞都好多油呀!@@"


2022年8月1日 星期一

蝦醬西蘭花炒魷魚


之前係元朗買咗3個西蘭花$10,

真係超級抵呀!

今次用佢嚟炒魷魚,

加咗蝦醬特別惹味呀!