三色椒炒牛肉

今餐食牛肉，

買咗三十蚊牛肉炒埋應該唔夠食，

好彩加埋三色椒和洋蔥先炒夠一碟餸；

今次加咗幾隻辣椒乾落去一齊炒，

辣辣哋好惹味呀!

蝦仁餐肉蛋炒飯

今餐hea煮，

齋食炒飯咋!

不過話時話，

百佳買嘅蝦仁真係唔錯，

我鐘意用嚟煮蝦仁炒蛋，

又可以好似今餐咁用佢嚟炒飯，

等下次特價時又要再去入貨先得。

蕃茄雞蛋燴肉碎

老公好鐘意食蕃茄煮蛋，

我見雪櫃仲有半碗豬肉碎，

於是加埋落去一齊煮；

呢個餸濕濕哋，

大人細路都鐘意食。

客家芋頭蒸腩排

講開蒸排骨，

想食腍滑嘅緊係買飛排，

因為飛排點蒸都咁滑而且肉多骨少，

但價錢較貴和好快賣哂；

想食爽口彈牙就要買腩排，

因為腩排有少少肥，

食落好甘香兼有咬口；

唐排就骨多肉少，

但肉味比較香濃；

最後就係一字排骨，

適合用嚟整金沙骨呀!

西芹腰果炒雞丁

兩個人開餐食咩好???

見雪櫃仲有半棵西芹，

緊係要炒番碟西芹雞丁嚟食下啦!

加咗現成焗腰果係面，

開得飯啦喂!

螞蟻上樹

好耐冇炒粉絲嚟食，

見屋企有齊材料，

拿拿臨今晚就煮鍋螞蟻上樹嚟嘆下啦喂!

氣炸蜜汁燒排骨

噚日1.5磅豬仔骨，

一半整咗椒鹽骨，

另一半就醃咗燒排骨，

醃咗成晚，

好入味啊!

椒鹽骨

之前買咗1.5磅豬仔骨，

今朝早攞出嚟解凍，

比較細件的就用嚟整椒鹽骨，

另外大件的就用嚟整另一款餸呀!

素湯~印度椰子海底椰栗子馬蹄粟米紅蘿蔔湯

原來今日係中國廿四節氣中嘅處暑，

即係代表炎熱天氣即將完結了。

但今日街外天氣一樣咁悶熱，

行一陣公園已經出哂汁，

連口罩掛耳帶都濕到扭得水出呀!

所以我今朝一早煲定煲素湯，

等個廚房冇咁熱呀!

金銀蒜香辣蝦

我見呢排疫情開始冇咁嚴重，

所以今日又可以落街買餸了；

買餸之前我緊係又去公園行番幾個圈先啦!

雖然戴口罩行公園好悶熱又辛苦，

但為咗家人健康，

一定要好好保護自己呀!

今日買咗急凍蝦，

整咗碟金銀蒜香辣蝦，

超級惹味好送飯呀!

閒話家常

今日晨早去咗行公園，

呼吸一下新鮮空氣，

影下花園D花，

休休閒閒咁行咗成個鐘，

出咗一身汗，

爽呀!

鹵水雜錦(雞翼、鳳爪、腸仔)

呢包鹵水料係屋企樓下雜貨舖買的，

鹵水料內有兩個鹵水包，

攞咗其中1個鹵水包嚟煮雞翼、鳳爪、腸仔呀!

黑椒洋蔥牛仔骨

今日係凍肉舖買咗3條牛仔骨，

竟然要成$85，

唉，

依家D物價真係越來越貴呀!

(不過咁，一塊牛仔骨可以切4件!!!)

豬扒蛋印尼撈麵

抗疫午餐~豬扒蛋印尼撈麵。

之前買定10包印尼撈麵俾大小魔怪食，

點知佢哋一聲話減肥，

所有澱粉質嘅嘢完全唔食；

佢哋唔食我和老公食，

簡單煮咗呢碗豬扒蛋印尼撈麵做午餐，

間中食下都唔錯架!

糖醋蓮藕小丸子(氣炸)&香煎蓮藕餅

前幾日見朋友仔整蓮藕餅，

挑起我條為食筋添!

今日即刻落街買齊材料整嚟食喇!

我鐘意食酸酸甜甜，

小魔怪就鐘意食香香脆脆，

所以整咗呢兩碟糖醋蓮藕小丸子(氣炸)和香煎蓮藕餅呀!

今整只係用咗半份蓮藕餡整咗2個餸，

明天仲有得食。

絲瓜芋絲燴肉碎

抗疫晚餐~絲瓜芋絲燴肉碎。

一個簡易配搭嘅餸菜，

有菜又有肉，

而芋絲又可以當飯食，

真係唔錯架!

粟米魚肚肉碎羹

抗疫晚餐~粟米魚肚肉碎羹。

依家豬肉咁貴，

想煲一鍋老火湯，

起碼要買一百幾十蚊豬骨或豬腱，

啖湯先好飲；

想慳D錢，

改滾罐頭湯都唔錯架!

普通一罐粟米湯，

加埋魚肚、肉碎和雞蛋，

咁平平無奇嘅粟米湯，

即刻升呢啦!

蝦醬肉碎炒飯

抗疫午餐~蝦醬肉碎炒飯。

呢排大小魔怪減肥，

真係一粒米都唔食呀!

全日我只係洗一杯半米，

足夠我和老公食到2餐；

有時連我都唔食飯嘅話，

咁剩咗嘅話就會第二朝用嚟炒飯食架啦!

加埋我至愛嘅豆奶，

今日午餐又食飽飽囉!

青瓜蝦仁

抗疫晚餐~青瓜炒蝦仁。

百佳急凍蝦仁又有特價，

$32.9有2包(180g)，

即刻買咗4包做存貨；

今餐就簡單炒咗碟青瓜蝦仁，

清清爽爽，

好味道!

白灼肥牛

小魔怪話想打邊爐，

大佬呀，

咁熱打邊爐好難頂啫!

而且佢又話減肥，

不如退而求其次，

我灼碟肥牛俾佢食算喇!

加埋有機芽菜墊底，

淋上自製蒜蓉辣豉油，

好正架!

氣炸五香雞扒

哈哈，

我諗呢塊氣炸五香雞扒，

就係影響我牙肉腫痛嘅原凶嚟架啦!

前兩日氣炸咗呢塊五香雞扒做午餐，

雞扒焗起嚟咸咸香香，

塊雞皮仲好鬼脆卜卜添；

食完之後，

我D牙肉就開始痛，

隔日仲腫埋添!

一定係除非唔係

蠔皇冬菇炆鴨腳配生菜

抗疫晚餐~蠔皇冬菇炆鴨腳。

我呢兩日牙肉腫痛到冇哂胃口，

唔係食白粥就係煮米粉和卷蛋糕，

硬嘅食物咬唔到，

只可以食軟軟嘅嘢；

雖然我唔食到嘢啫，

但老公佢哋都要食架!

今餐就炆咗蠔皇冬菇炆鴨腳配生菜，

冬菇我就肯定食唔到架喇，

希望可以啜到D鴨腳趾啦!

雪菜肉絲炆米

抗疫午餐~雪菜肉絲炆米。

無論煮湯米或炆米粉，

我都鐘意用天鵝牌米粉，

米粉夠韌性，

唔易炒到碎哂呀!

炒咗2個米粉，

足夠哂3個人食架!

香煎粟米墨魚餅

抗疫晚餐~香煎粟米墨魚餅

噚日專登留咗少少粟米粒，

今日拿拿聲去買半斤($40)墨魚滑嚟整呢碟粟米墨魚餅喇!

墨魚餅彈牙爽口，

食到唔停得口呀!

青瓜粟米炒雞粒

抗疫晚餐~青瓜粟米炒雞粒。

呢個餸簡單又易煮，

材料自由配搭，

真係大人細路都啱食架!

加多碟油鹽水灼生菜，

開飯囉!

客家菜~黃豆醬支竹炆五花腩肉

噚日我個肚唔係咁舒服，

食咗兩餐白粥清腸胃，

依家已經好咗好多喇!

今日炆咗呢鍋黃豆醬支竹炆腩肉，

老公食腩肉，

我就食支竹。