雪梨海底椰雪耳紅蘿蔔粟米煲豬腱湯

燒完雞翼燥燥哋，

即刻煲番煲滋潤湯水飲下先得，

雪梨海底椰雪耳紅蘿蔔粟米煲豬腱湯，

有滋陰、潤肺、通便、健脾、清潤止咳等功效。

天水圍綠田園

呢三年疫情和限聚令影響下，

真係好難得12個人一齊聚會呀!

我哋選擇咗嚟天水圍綠田園嚟燒嘢食，

由於有旅行團嘅關係，

所以都幾多人架!

我早一個星期已經Book定2個燒烤爐，

叫咗個8~9人套餐$1000+2人套餐$380，

我哋由中午11點半玩到晚上6點半，

呢度唔只有得燒嘢食，

仲有好多適合小朋友玩嘅活動遊戲呀!

又嚟韭菜蝦仁豬肉餃+煎餅

大小魔怪話要encore食我包嘅餃子，

今朝買齊材料又做熟手女工呀!

買咗1斤餃子皮，

包咗42隻有蝦仁嘅韭菜豬肉餃，

18隻韭菜豬肉餃，

仲有韭菜豬肉餡剩點算，

拿拿臨用麵粉、鹽和熱水(冇份量求其整)，

搓咗個麵糰，

包咗6個餅煎嚟食，

灼埋18隻餃子做午餐。

蝦醬腩肉兩食

買咗一大舊玻璃腩肉，

全部用蝦醬嚟醃咗佢，

一餐就腩肉蒸粉絲(揀肥肥哋嘅肉)，

一餐就用嚟腩肉炒茄子(揀瘦肉)，

兩款都好惹味，

正到痺呀!

豆卜炆魚頭煲

哈哈，

今日我去街市買餸，

行到魚檔見到D新鮮魚頭個咀開合開合，

好似叫緊我買佢哋返去咁，

我見$60斤又唔貴，

買咗2個魚頭都係$104，

拿拿臨買返去整煲豆卜炆魚頭煲，

嘆下啦喂!

老公鐘意食魚頭，

所以食得好滋味，

但小魔怪話冇肉食，

得，

下次我買一個魚頭，

一個舊魚腩再整俾佢食啦!

有肉冇肉食唔緊要，

我覺得D豆卜煮哂D汁係最好食架!

咸菜胡椒豬肚排骨煲

近期我愛上冰鮮豬肚，

起碼食處理佢唔使洗得咁辛苦呀!

今日就用佢嚟整咗鍋咸菜胡椒豬肚排骨煲，

老公和小魔怪食得津津有味，

一大鍋俾佢哋兩個食得八八九九，

剩番少少留唔留俾大魔怪食好呢???

瑤柱炆節瓜

 

之前買咗4個節瓜$10，

2個用咗嚟煲清補涼湯，

剩番果2個就煮咗呢碟瑤柱炆節瓜；

老公話D瑤柱好多好好味，

我唔敢話俾佢知我浸咗12粒瑤柱炆呢個餸，

唔係老公實會話我敗家呀!

3餸1湯，白飯任裝

哈哈，

真係唔係誇張，

自星期一打完第4針新冠疫苗後，

疫苗對我反應太大，

痛到真係難以形容呀!

懵懵懂懂咗成個星期，

今日終於好番九成喇!

好耐冇正正經經煮一餐飯，

今晚3餸1湯，

白飯任裝，

開得飯啦!

蔥花雞蛋煎韭菜蝦仁豬肉餃子

今日屋企男丁們全部出哂街，

剩番我一個人食午餐，

攞埋冰箱果幾隻韭菜蝦仁豬肉餃煎嚟食，

加少少麻辣油、醋和蒸魚豉油點嚟食，

簡簡單單又一餐!

茄子肉碎燴粉絲

噚晚煮咗一大碟茄子肉碎燴粉絲，

有菜有肉有粉絲，

老公和我食咗半份，

留番半份俾大魔怪返嚟食飯呀!

因為冇油炸茄子，

煮出嚟茄子顏色冇咁靚，

不過咁，

好食就得啦!

涼瓜菜脯炒蛋

打第4針的第三日，

今日終於冇發燒喇!

但就好似俾人打咗一身咁，

燒咗兩日，

針口紅腫兼赤赤痛，

瞓覺唔敢側身瞓，

掂到都覺痛呀!

今日不停冰敷，

希望快D好呀!

梅菜蒸鯇魚腩

 

弱雞，

我話我自己，

噚日打完第4針(復必泰)，

前3針打科興，

我嘅手臂除咗腫痛外，

今朝仲開始有微燒添，

已食退燒藥兼狂飲水，

希望快D好番啦！

成日暈陀陀，

冇咩胃口食飯，

求其蒸咗碟梅菜蒸鯇魚腩俾老公食就算喇!

新奧爾良烤雞膇(香辣味)

上次試咗新奧爾良烤雞翼(蜜糖味)，

噚晚就試咗新奧爾良烤雞膇(香辣味)呀!

買咗1磅雞膇，

落咗2湯匙新奧爾良粉(已有調味)再加1湯匙水，

醃咗隔夜，

用氣炸鍋200度焗15分鐘，

反轉另一面焗多12分鐘，

灑上紅辣椒粉和搽蜜糖，

再氣炸多3分鐘就食得啦!

味道香辣甜，

越食越想食呀!

呢樽新奧爾良烤雞翼粉，

係網上淘返嚟架!

西洋菜咸鴨腎紅蘿蔔粟米排骨湯

今朝去買餸見到D西洋菜$16斤好鬼嫩，

條條都卜卜脆架!

於是買咗2扎西洋菜返屋企，

煲我至愛嘅西洋菜西洋菜咸鴨腎紅蘿蔔粟米排骨湯，

配埋瑤柱、南北杏、蜜棗、陳皮，

我哋連湯連湯渣，

每人食咗一大湯碗呀!

白汁蘑菇意粉(素)

今日整咗白汁蘑菇意粉(素)做午餐，

我和大小魔怪3個人食，

所以煮咗半包意粉(約250g)，

加罐大嘅白汁蘑菇湯，

啡菇和西蘭花，

煮起一大鍋全部食哂，

清盆行動完成。

氣炸蒜香雞扒配茄子

兩個人食飯，

真係越簡單越好呀!

氣炸咗1塊雞扒加2條幼身茄子，

咁又一餐喇!

雲腿旺菜

屋企有個旺菜，

落咗少少雲腿落去一齊炒，

清清甜甜咸咸香香好送飯，

唔錯架!

韭菜蝦仁豬肉餃

大小魔怪都鐘意食我包嘅餃子，

今日我見冰箱仲有位放個餃子盒，

拿拿臨買材料包餃子啦喂!

今次包咗66隻韭菜蝦仁豬肉餃，

中午就煮咗14隻同小魔怪一齊食呀!

咸酸菜炒豬肚絲

今日買咗個澳洲冰鮮豬肚$35嚟炒咸酸菜；

買冰鮮豬肚嘅好處，

就係最污漕嘅程序已經處理好，

冇咩異味又冇肥膏，

簡簡單單用鹽和生粉洗2次就可以落熱水鑊內出水架啦!

今次第一次買散裝咸酸菜，

雜貨舖亞姐推介話冇沙又好食，

咁就要買嚟試下喇!

咸菜配白粥，

絕配呀!

蠔皇冬菇炆鴨腳

前兩日買咗十隻大鴨腳，

本來想炆俾大魔怪女朋友仔食，

但大魔怪話唔好整到好似過年咁啦!

驚我嚇親人喎!

所以就留番俾我哋自己食喇!

家常便飯

噚日我哋响雲泉仙館食完齋後，

大魔怪就帶埋女朋友仔一齊返嚟食晚飯，

未夠鐘食飯有咩好做???

哈哈，

就係睇大小魔怪嘅BB相喇!

睇番佢哋細個嘅相，

嘩，

真係好多回憶番哂嚟呀!

粉嶺坪輋雲泉仙館

今日我哋一家四口齊齊去粉嶺坪輋雲泉仙館拜奶奶，

仲約埋大魔怪女朋友仔係粉嶺火車站等，

搭52K小巴入坪輋雲泉仙館呀!

我哋由天水圍去上水有個小插曲，

就係搭276A落上水時，

唔使俾錢搭巴士，

因為部八達通機壞咗呀!

T.Park 源.區環保遊

 今日有幸參加環保組織起動社區齊減廢活動，

參觀T.Park 源.區，

中午12點45分屋苑集合，

下午5點30分屋苑解散，

全程費用全免，

仲有旅遊巴士接送呀!

如果大家有興趣嚟呢度參觀，

可以去佢哋網址預約架!

雙拼蒸飯(豉汁排骨&榨菜豬肉)

呢兩年疫情關係，

老公都冇得去政府牙科洗牙，

今日終於有得去喇!

洗牙後，

牙醫話兩年冇洗牙，

可以排個快期再洗牙，

哈哈，

排期到2023年9個月，

已經算快架啦!

XO醬韭菜花炒魷魚

買咗包一口魷魚嚟炒韭菜花，

處理魷魚花咗不少時間，

食就唔使10分鐘就食哂，

哈哈，

等下次買隻大魷魚再炒嚟食先得。

重陽登高&元朗成記

今日重陽節，

太陽高高掛，

真係熱到不得了；

我哋返元朗舊屋拜山，

由於山路太難行，

我乖乖坐係舊屋涼冷氣，

等佢哋慢慢爬山。

拜完山就落元朗交通廣場旁邊冬菇亭成記食飯。

叫咗3碟瑞士雞翼豬扒飯和2碟豬扒雞球飯，

配埋5杯凍飲，

總共食咗$245。

我記得2016年嚟食雙拼飯配飲品$42，

到依家2022年每份餐$49，

豬扒冇以前咁大塊，

味道又好似冇以前咁好食，

我哋仲食剩咗唔少飯餸，

好彩有自備伸縮盒，

拎返屋企唔好嘥呀!

氣炸南乳腩肉

今日買咗條靚腩肉，

整咗超惹味嘅氣炸南乳腩肉；

炸哂D豬油出嚟，

腩肉香脆唔油膩，

用嚟送啤酒一流呀!

蓮藕鱆魚綠豆馬蹄紅蘿蔔排骨湯

襯今日一家人都係屋企食飯，

拿拿臨攞個特大湯煲出嚟，

煲個老火湯先得；

蓮藕鱆魚綠豆馬蹄紅蘿蔔排骨湯，

係我家至愛湯水之一嚟架!