咖哩薯仔牛筋腩

呢個咖哩薯仔牛筋腩，

係參考肥媽食譜做的，

食落真係同平時用咖哩醬整嘅好唔同，

咖哩胆好濃郁，

配上洋蔥碎、蕃茄蓉、乾蔥碎和蒜蓉，

加埋咖哩粉、黃薑粉和辣椒粉，

我冇落印度五香粉和芫茜粉，

不過我覺得已經好好味道呀!

蠔油薯仔炆雞膇

今晚食得好簡單，

就係蠔油薯仔炆雞膇喇!

我鐘意用呢個蠔油汁撈飯，

真係會唔覺唔覺添多咗飯架!

蒸和烚

响我病後呢段時間，

如果我煮飯嘅話，

通常都係一碟蒸餸和一碟烚菜，

好似咁晚咁，

就食蒸榨菜肉片和烚菜芯，

我用個鑊蒸完餸就順便烚埋菜，

真係好方便架!

食飯盒

依家每逢星期二和星期三晚，

大魔怪要去浸會大學返學，

而小魔怪平時返工又好少返嚟食晚飯，

所以我和老公兩個人，

我懶得晚飯煮喇!

屋企樓下商場兩餸飯$43，

加埋噚日嘅羅漢果菜乾紅蘿蔔粟米湯，

咁又一餐喇!

羅漢果菜乾紅蘿蔔粟米煲西施骨

我病咗成個星期，

雖然退咗燒，

但都仲係好鬼咳，

我見屋企有幾個羅漢果，

所以買咗西施骨嚟煲啖湯飲下，

潤番下個喉嚨呀!

沙田萬怡酒店momo cafe週末自助午餐

噚日，

我哋黃氏一家齊齊去拜父親大人，

之後，

姐姐請大家1行12人食自助午餐，

沙田萬怡酒店momo cafe，

我啱啱病好，

食力減半呀!

晚餐就叫陳根記外賣，

大家都話中午食得好飽，

但都叫咗9個餸，

另外炒多一碟菜呀!

休息下啦

失蹤咗幾日，

唔係出去玩，

而係病足咁多日呀!

 

話說上星期五和六已經開始骨痛，

我以為天氣唔好老人病發作，

點知星期日早上開始覺得唔多妥，

頭重重、喉嚨乾涸、流鼻水和咳，

下午仲開始發燒添38.8度，

叫大魔怪幫我買個6合1測試劑，

check過又冇中招，

星期日冇私家醫生睇，

只好食住退燒藥先，

要捱到星期一先睇到醫生；

食咗藥簡直大昏迷，

感覺成個人好似坐在船上，

响個大海度蕩來蕩去咁樣；

連續燒咗3日，

到今日星期三先退燒咋!

呢幾日我過冇咩嘢食過，

喉嚨痛完全冇胃口，

老公每日買個麵包俾我吊命，

至於老公和大小魔怪食咩，

佢哋自己攪掂喇!

再唔係就買飯盒，

今日我精神好D，

就煲粥食呀!

做義工

今日中午1點，

我和老公要去做義工呀!

就係幫忙派愛心湯水俾嘉湖南區內老人家，

所以11點半左右就煮咗個雪菜榨菜湯麵做午餐呀!

呢幾日食咁多海鮮，

係時候要食清D喇!

帶母親大人去大亞灣飲飲食食

4月11~12日，

我和老公帶母親大人去大亞灣飲飲食食，

我哋去到蓮塘關口後先call滴滴，

大約要175人民幣左右(單程)，

返到屋企放低行李，

就同母親大人搵食喇!

蜜汁叉燒

 

呢排叉燒好紅，

全因近排係觀塘出現10蚊免切叉燒飯；

我唔使出去買，

自己整嚟食都得，

我買咗1斤梅頭瘦肉，

整咗呢碟蜜汁叉燒，

嘻嘻，

真係好鬼正架!

芥末籽蜜糖烤雞扒

去日本旅行時買咗樽芥末子醬返嚟，

今日就用佢嚟整芥末籽蜜糖烤雞扒，

今次又係用氣炸鍋嚟整，

好方便呀!

焗蒜香豆豉排骨

 

蒜頭豆豉蒸排骨食得多，

今次改用焗嘅方法嚟整呢碟排骨，

老公話味道濃郁咗，

焗出嚟嘅排骨好香，

話下次都可以咁整俾佢食呀!

麻辣香鍋

 

今日香港下午開始落大雨，

所以大小魔怪都唔願出街，

佢哋話晚餐想食麻辣香鍋喎!

咁我拿拿臨落街買材料，

肉類就買咗雞、雜丸和芝士腸，

蔬菜就買咗蓮藕、萵筍和青瓜，

呢類香鍋落咩材料都得，

各有所愛呀!

蝦醬炸雞翼

今日買咗12隻大雞翼，

用蝦醬醃咗佢，

今晚就落油鑊炸嚟食，

脆卜卜，

好惹味架!

芫茜魚片皮蛋豆腐湯

今晚大魔怪由日本飛返香港，

佢同女朋友仔响日本奈良和京都玩咗6日，

日日都食得好豐富，

返到嚟我緊係要煲番個芫茜魚片皮蛋豆腐湯，

個湯煲到奶白奶白，

好下火架!

收到好多日本手信，

好多綠茶食品，

哈哈，

特別有盒綠茶咖哩，

好特別呀!

清湯蘿蔔牛腩

噚日買咗1.5磅牛肋條，

買埋蘿蔔整咗煲清湯蘿蔔牛腩，

做法非常簡單，

個湯都俾老公和小魔怪飲埋呀!

窑雞

上次响惠州行街市時，

買咗包窑雞粉返嚟，

今日就用佢嚟醃雞，

放入焗爐焗熟佢嚟食，

食落又真係好有係大陸食窑雞嘅味道喎，

塊皮仲有少少脆身添架!

瑞士汁叉燒炒烏冬

前排食剩咗半盒叉燒，

我就買咗幾包烏冬返嚟，

炒咗呢碟瑞士汁叉燒炒烏冬，

我和老公兩個人食咗3包烏冬，

好味道呀!

2024日本大阪6日5夜之旅~第五、六日(完結篇)

3月23日星期六

今日天氣認真麻麻哋，

落雨落到九彩(日本氣象預測堅準)，

所以我哋前兩日已經行哂所有戶外景點，

今日只有係酒店附近閒逛和重頭戲~蟹道樂!

早在今年年初已經訂咗位，

嚟到日本又改咗兩次時間(好彩有位咋)，

訂咗今朝11點；

全部團友都冇食酒店早餐，

但我早起身見冇咩嘢做，

就獨自一人落去輕食和嘆杯咖啡喇!

家常便飯

噚日復活節假期開始，

我哋預咗會好多人過關返大陸，

所以呢個假期我和老公都會留番係香港；

不過大魔怪和女朋友仔就襯呢個假期，

今朝飛咗去日本玩6日，

呢餐係噚晚嘅晚餐，

紅燒肉鵪鶉蛋、魚露雞翼、蕃茄炒蛋和灼菜芯，

湯就有竹蔗茅根雪梨乾海底椰粟米紅蘿蔔煲西施骨。

2024日本大阪6日5夜之旅~第四日

3月22日星期五

今日陽光普照，

最適合去京都奈良呀!

我哋搭近鐵由難波去奈良公園，

團友們好多都係第一次去奈良，

見到鹿仔好興奮呀!

2024日本大阪6日5夜之旅~第三日

3月21日星期四

今日天氣晴朗，

我哋食過早餐後就即刻出發去京都伏見稻荷大社。

今次用南海電鐵3 day pass，

搭地鐵御堂筋線去淀屋橋，

轉京阪電鐵由淀屋橋去丹波橋再轉車去伏見稻荷站落車。

2024日本大阪6日5夜之旅~第二日

3月20日星期三

今日原本plan咗去京都，

一早起身落緊大雨，

所以我哋臨時改咗行程去outlet，

食完酒店早餐後返上房休息到9點左右就出發。

帶兩位老DAD去旅行

今日我哋4位travel buddies，

帶埋2位老Dad，

一行6人，

齊齊去大亞灣霞涌食海鮮兼大購物，

早一日Book咗架7人車，

由蓮塘口岸出發去大亞灣霞涌海鮮市場，

來回車費500人民幣。

2024日本大阪6日5夜之旅~第一日

3月19日星期二

今朝我哋8位travel buddies，

要搭早上8:55飛機去日本大阪，

所以早在6點半左右已經到達機場，

寄完行李後就去食早餐。

2024日本大阪6日5夜之旅~手信篇

自疫情後，

我已經4年冇出國外旅行，

今年我聯同7位travel buddies，

8人齊齊去日本大阪玩6日5夜呀!

咁耐冇出去玩，

手仔又痕痕哋，

朋友仔笑我好多嘢759亞信屋都有得賣，

不過，

日本紙水低，

唔買好似對唔住自攞!

天水圍新北江~芝士麵

今日係大小魔怪兩個嘅29歲生日，

大魔怪約咗女朋友仔慶祝，

而小魔怪就陪我哋兩老食晚飯呀!

小魔怪鐘意啖啖肉，

所以我哋揀咗去新北江商場嗁芝士麵鋸扒呀!

我哋3個人叫咗3個鐵板燒，

和1份吉列魚柳芝士撈麵，

總共食咗$313，

好抵食呀!

黑椒牛仔骨

今晚大魔怪女朋友仔嚟食飯，

煮咗黑椒牛仔骨、香煎三文魚和亞一鮑魚冬菇燴生菜，

簡單3餸飯，

開飯啦!

大小魔怪29歲啦!

今日我哋同大小魔怪做生日呀!

唔經唔覺大小魔怪佢兩個已經29歲啦!

今年都係响傳統餅店訂生日蛋糕2磅$310，

攞返嚟個蛋糕大到有成5磅，

好抵食架!

今餐都係家常菜，

大家食得開心又滿足。

魷魚絲蒸肉片

 

好喜歡係惠州大亞灣買嘅魷魚片和魷魚筒，

用嚟清蒸又或蒸豬肉特別好食呀!

今日就用佢嚟蒸梅頭豬肉片，

好惹味好送飯呀!

咖哩薯仔炆雞全翼

呢兩日香港天氣都唔錯，

早上藍藍天空下涼涼哋約14度，

到中午出猛太陽，

都唔覺得熱呀!

今晚整咗咖哩薯仔炆雞全翼，

呢個餸真係好送飯架!

青紅蘿蔔粟米螺片湯

自從某單命案發生後，

我都成年冇煲呢個朱家例湯喇!

咁啱小魔怪前日話好想飲青紅蘿蔔湯，

所以今日就煲咗呢個湯俾家人飲呀!

Happy Sunday又返咗惠州喇

Happy Sunday，

噚日我和老公又返咗惠州喇，

今次同埋姑奶和2位朋友，

一行5人齊齊去惠州飲飲食食。

中午去屋苑樓下湘菜館食嘢，

我哋全部餸菜免辣，

呢餐食咗313人民幣。

冬菇栗子炆排骨

 

呢排香港天氣真係玩死人啦!

前幾日又濕又熱，

今日開始又雨又凍，

所以攪到好多人病呀!

大家真係要多多保重。

今日買咗2條腩排嚟炆冬菇栗子，

成鑊上懶得再用碟裝，

慳水慳力呀!

蟲草花胡椒豬肚雞湯

今日38婦女節，

祝大家繼續開開心心，

永遠美麗動人；

話說今朝我突然間好想食豬肚雞煲，

所以拿拿臨即刻去買齊材料煲嚟食呀!

响facebook睇番當年今日，

原本我係2020年都係煲呢個湯，

真係有咁啱得咁橋囉!

黑椒薯仔雞翼

今日香港天氣涼番少少17~18度左右，

而且濕度亦都冇咁高大約80%左右，

比起前兩日已經超爽啦!

今朝買咗5隻雞全翼，

整咗碟黑椒薯仔雞翼，

真係好惹味，

正呀!

薑蓉雞扒

 

今日買咗一大舊薑，

即刻摷下冰箱攞咗塊雞扒出嚟，

整薑蓉雞扒食呀!

平時我會煎香塊雞扒連埋薑蓉一齊食，

今日懶唔想煎雞扒，

最後簡單蒸熟塊雞扒再淋上薑蓉，

仲好味道呀!

竹蔗茅根海底椰雪梨湯

香港呢排天氣濕到冇朋友，

又濕又熱，

噚日曬晾嘅衫都唔乾，

尤其係D厚衫褲，

再唔乾就會霉味架啦!

所以今日我終於扚起心肝摷番個古董乾衣機出嚟，

屋企細唔可以長期開住，

所以只係潮濕天氣先會攞出嚟用呀!

今晚仲煲咗係大陸美團優選買嘅湯包，

竹蔗茅根海底椰雪梨湯，

好滋潤，

好好飲呀!

家常便飯

買咗舊鯇魚腩，

用我至愛嘅大頭菜蒸嚟食，

好惹味架!

炒埋碟西芹牛肉，

開得飯喇!

支竹炆火腩

每次經蓮塘過關返香港，

我都會買埋燒肉和鹽焗雞架!

大小魔怪最鐘意食架啦!

噚日買咗1斤幾燒肉，

晚上食咗半盒，

剩番半盒留番今晚食；

我煮咗支竹炆火腩，

呢個餸真係好送飯架!

3日2夜惠州行

2月29日星期四，

香港天氣又霧又有微雨，

但仍未開始凍呀!

突然有急事要即刻返惠州，

我同老公拿拿臨要趕搭12點半嘅永東巴士，

真係有D趕，

未試過呢個時間經蓮塘過關，

超多人呀!

好彩最後都順利搭到大巴，

如果搭唔到就要等多1小時先有車呀!

返到屋企2點幾鐘，

附近粉麵檔已經關門午休，

唯有叫美團外賣，

我叫咗華萊士漢堡，

呢餐食咗34.9蚊人仔，

好抵食呀!

醬香牛筋腩肚

今日炆咗一大鍋醬香牛筋腩肚，

今次冇落柱候醬，

剩係落咗黃豆醬、辣豆瓣醬、蠔油、豉油、老抽和冰糖，

仲有加咗個鹵水包落去一齊炆，

呢個牛筋腩肚真係簡單又易做，

我留起咗部份牛筋腩肚，

聽日用嚟煮麵食呀!

木耳雞蛋豬肉餃

唔知係咪最近covid病毒弱咗好多呢???

老公前兩日有少少病症外(流鼻水和骨痛)，

今日佢話已經冇咩事，

佢連續兩日朝早食咗4粒蓮花清瘟，

行得食得走得又痾得，

雖然自我檢測仍然係兩條線，

不過佢有信心過多兩日就會好番哂架啦!

今日我又買咗豬肉碎嚟食餃子，

用咗上次剩番嘅餃子皮，

包咗52隻木耳雞蛋豬肉餃，

午餐煎咗10隻餃子嚟食，

又幾好味道喎!

荷蘭豆炒臘腸臘肉

呢幾日都老公感到有D唔舒服，

流鼻水和周身骨痛，

冇發燒不過感覺沾寒沾凍，

佢即刻check下有冇中招，

Oh no，

雙紅線!!!

食咗一日粥，

今晚炒咗碟小菜俾佢送粥呀!

韭菜雞蛋豬肉餃子

今日我突然好想食餃子，

於是即刻拿拿臨買材料嚟包餃子喇!

買咗約1斤半皮$20，

1斤豬肉碎和$5韭菜，

炒咗3隻雞蛋(切碎)加埋落去做餃子餡，

呢度包咗63隻餃子咋!

仲有餃子皮剩，

明天再買料包其他餡先得。

午餐煮咗18隻餃子嚟煮河粉，

其餘的放入冰箱，

隨時再食都得呀!

新春行大運

今日約咗老公舊同學一齊飲早茶，

之後就由元朗西鐵站行入去大樹下天后古廟；

途經元朗熱門打咭點~綠色隧道，

緊係要影相留念啦!

適逢今日正月十五，

好多善眾入嚟大樹下天后古廟拜太歲，

香火鼎盛，

人山人海!

附近木棉花盛開，

好靚呀!

食埋個下午茶就返屋企囉!

蝦醬肉粒蝦仁蛋炒飯

 

今晚食炒飯，

雪櫃有咩就攞嚟炒，

豬肉粒、蝦仁、雞蛋和蔥粒，

仲有我至愛嘅蝦醬，

炒埋一齊就食得啦!

朱家小炒

朱家小炒，

鐘意食邊款呀???

魚香茄子、XO醬西芹蝦仁炒肉片、韭菜花炒魷魚肉片。

麻辣手撕雞

噚日大小魔怪叫咗半隻外賣手撕雞，

份量少到我哋3個人夾咗幾次已經冇哂，

食得超唔夠喉囉!

所以我今日即刻買咗1隻冰鮮雞嚟整麻辣手撕雞，

隻雞拆完肉舖滿成個碟，

淋上麻辣油和炸花生粒，

越食越惹味呀!

西洋菜咸鴨腎紅蘿蔔粟米煲西施骨

 

老公話好耐冇飲西洋菜湯，

今日見有西洋菜賣，

拿拿臨買咗2扎，

仲買埋南安鴨腎，

煲咗西洋菜咸鴨腎紅蘿蔔粟米煲西施骨，

呢個湯係朱家例湯之一嚟架!

話時話，

今日天氣超級潮濕又冇風，

煮完餐飯我成頭和身都出哂汗，

唔知係咪我有病呢???