2017年6月30日 星期五

白汁芝士蘑菇焗西蘭花


依家每餐我都會準備一至兩個素菜俾大魔怪食,

今次就焗咗呢個白汁芝士蘑菇焗西蘭花,

簡單又好味,

開飯啦!


2017年6月29日 星期四

素雜菜湯


大魔怪耳仔唔舒服,

噚日睇咗醫生,

醫生話佢"耳屎"塞耳,

俾咗樽olive oil佢滴耳軟化"耳屎",

但滴耳後令佢更唔舒服,

仲開始頭暈暈添;

今日好想搵耳鼻喉科醫生睇下架,

點知原來天水圍和元朗區係冇耳鼻喉專科醫生,

最近要去屯門睇,

仲要等到明天先book到睇醫生,

大魔怪唯有捱多一日頭暈暈嘅日子了!

佢冇哂胃口食嘢,

唯有煲個素雜菜湯和買咗條法包俾佢,

等睇完醫生先去食好嘢啦!

P.S. 睇專科醫生原來都唔平,

睇醫生收$600,

洗耳每隻$700,

藥費另計,

佢唔暈我暈喇!@@"


2017年6月28日 星期三

蜜糖豆三色椒炒腰果


依家大小魔怪都返哂嚟屋企,

食飯就真係好熱鬧囉!

以前2杯米可以夠我哋兩個人食兩餐,

依家就每餐起碼要煮3杯米以上;

哈哈,

名副其實大小魔怪真係飯桶嚟架!


2017年6月27日 星期二

漢和韓國料理

今日老公專登請假,

同小魔怪和我一齊去旺角買西裝,

準備7月去英國參加小魔怪畢業典禮時用的,

難得出城一次,

緊係要食埋嘢先返屋企啦!

揀咗小魔怪至愛之一~韓燒,

平日下午$118位,

連加一3個人$389,

飽到上心口呀!


2017年6月25日 星期日

韭菜豬肉煎餃


噚日買咗1斤半餃子皮嚟包餃子,

見屋企仲有餃子皮剩,

拿拿臨買幾蚊韭菜返嚟包埋佢先得!

整咗韭菜豬肉煎餃,

今次包得23隻,

又包又煎用咗我大半個鐘,

但唔使5分鐘,

D韭菜豬肉煎餃已經俾我哋KO哂囉!


2017年6月24日 星期六

餃子日


好多時街買返嚟嘅包裝素餃子,

唔係好啱大魔怪口味,

佢話都係我包嘅餃子好食D喎!

咁賣口乖,

緊係要即刻開工啦!

總共包咗23隻放湯嘅素餃子,

40隻煎素餃子,

仲有18隻係加咗豬肉嘅餃子呀!


2017年6月23日 星期五

蝦醬焗雞翼


今日醃咗D蝦醬雞翼,

又唔想落油鑊炸,

所以放咗焗爐度焗啦!

臨焗雞翼之前發現屋企冇哂蕃薯粉

唯有改用生粉,

好彩都有少少脆架!


2017年6月22日 星期四

咸檸檬蒸烏頭魚


小魔怪係英國咁耐,

真係好少會自己蒸條魚嚟食,

所以一返到嚟佢就話要食蒸魚,

今次買咗元朗烏頭加埋一個咸檸檬落去一齊蒸,

超級開胃啊!

話說魚檔亞姐醒多幾粒"魚扣"俾我,

我就未食過喇!

老公試咗話好腥,

小魔怪就話好爽喎!



2017年6月21日 星期三

元朗邦美蜀越式工房


今日約咗朋友仔出街食飯,

我哋去咗食越南菜,

朋友仔上網搵到度食評都唔錯,

最吸引係個原個西瓜汁和菠蘿汁,

係咁熱嘅天氣飲個西瓜汁,

爽呀!

呢餐3個人食咗$308呀!

地址:元朗泰祥街20號,

電話: 24778288。


2017年6月20日 星期二

2017年6月19日 星期一

父親節快樂


昨日父親節,

我哋去咗妹妹家一齊慶祝;

個個見到小魔怪都話佢成熟咗生性咗喎!

昨晚晚餐,

我哋每家人各準備食物開大食會,

好豐富啊!

可惜大魔怪歐遊仲未返,

要等明年先齊人啊!


2017年6月17日 星期六

日本餐


小魔怪由英國一返到嚟,

除咗話要飲老火湯和食炆腩肉外,

仲話要去食日本嘢,

因為佢話係英國食日本嘢太貴又食唔飽喎!

其實呢餐都食咗$320左右,

以佢咁大食緊係會食唔飽啦!

下次都係帶佢去食日式放題好D,

咁先食得盡興呀!


2017年6月16日 星期五

小魔怪,愛,回家



小魔怪終於返嚟啦!

其實佢2月中已經完成課程,

不過佢想繼續番係英國周圍玩,

所以攪到今日先返香港;

小魔怪係英國已經要我今晚炆定腩肉和煲老火湯俾佢飲,

呢個要求太簡單啦!


2017年6月15日 星期四

蝦仁蛋炒飯


其實每次出街食飯,

我好少會叫炒飯,

因為感覺上碟飯會落好多油和鹽,

唔係好啱我嘅口味囉!

所以想食炒飯嘅話,

都係自己整好過啦!

哈哈,

講咁多費話,

咪又係俾藉口自己懶得就懶,

午餐整咗個炒飯啦喂!



2017年6月14日 星期三

冬菇魚肚炆雞翼


魚肚唔一定用嚟煮粟米羹,

仲可以用嚟炆或蒸雞都可以架!

今日就用咗佢嚟炆咗呢碟冬菇魚肚雞翼,

魚肚索哂D汁,

真係好鬼好味架!

2017年6月13日 星期二

時款特色麵包製作精選實習班~第八堂


肉鬆麵包&沙拉醬做法&附加芝士粒方包,

今次整呢兩款麵包,

都係我至嘅愛嚟架,

簡單越食越停唔到口呀!



2017年6月12日 星期一

客家梅菜炆腩肉


真係唔知道今日會打得成風,

之前天文台好似話過好似打唔成架,

估唔到轉個頭仲話會掛8號風球添;

今日時晴時雨,

濕濕淋淋,

快快手買咗少少餸就返屋企囉!


2017年6月10日 星期六

咖哩海鮮火腿蛋炒飯


雪櫃有一大碗冷飯,

唔使諗緊係用嚟煮炒飯啦!

今次炒咗碟咖哩海鮮火腿蛋炒飯,

辣辣哋都幾開胃架!


2017年6月9日 星期五

辣味豆腐燴肉碎


平時煮豆腐燴肉碎,

通常我都剩係落蠔油作主要調味,

不過今次落咗少少豆瓣醬,

辣辣哋,

又幾好餸飯喎!

2017年6月8日 星期四

粟米魚肚肉碎羹


每次煮魚肚時,

我都會浸多幾隻,

出水後就可以放入冰箱,

咁就隨時都有得用啦!


2017年6月7日 星期三

XO醬青瓜雲耳炒肉片


由於要去醫院抽血,

所以冇專登去街市買餸,

經過屋苑商場嘅菜檔,

買咗2條青瓜就返屋企,

好在屋企仲有碟醃好嘅豬肉,

一碟快靚正嘅XO醬青瓜雲耳炒肉片,

做咗我哋嘅午餐喇!



2017年6月6日 星期二

2017年6月5日 星期一

節瓜冬菇蝦乾瑤柱肉絲湯飯


識我嘅人都知我怕熱唔怕冷,

所以今日有成32~33度,

簡直攞我命呀!

熱成咁,

冇咩胃口食飯添!

俾個藉口自己繼續偷懶,

煮咗個湯飯食算喇!



2017年6月4日 星期日

又返鄉下


噚日又返咗鄉下~惠州,

一個字形容成個旅程~熱!

內陸地區天氣又悶又熱,

真係唔係好想出街行架!

簡單係屋企附近食個快餐,

有菜有飯有湯,

每款都係12蚊人民幣,

超抵啦!


2017年6月2日 星期五

魚香茄子


魚香茄子,

係一個超級好送飯嘅餸菜之一,

真係唔覺唔覺會食多咗飯架!


2017年6月1日 星期四

芥菜咸蛋排骨湯


每年包糭都會買廿幾隻咸蛋返嚟,

用咗個蛋黃嚟包糭,

咁D蛋白又點算好呢???

唔通全部倒哂佢???

NO啦!

我次次都會留起一大湯碗咸蛋白,

一係用嚟蒸豬肉,

就係用嚟滾湯,

大家仲有冇好提議呀???