2017年11月21日 星期二

2017年11月20日 星期一

蟲草花淮山圓肉百合杞子紅棗燉瘦肉湯


買咗個燉盅返嚟,

緊係要即刻剪綵啦!

簡簡單單燉咗個~蟲草花淮山圓肉百合杞子紅棗燉瘦肉湯;

呢個燉盅放咗料後可以放2碗半水,

啱哂我和老公慢慢嘆啦喂!


2017年11月19日 星期日

返鄉下


噚日星期六,

大伯、大伯娘、老公和我齊齊返惠州,

原因係我哋第3次做伯公和伯婆了,

返去睇下BB,

順便食薑醋和雞酒呀!


2017年11月17日 星期五

返廣州探親


前排突然知道住係廣州嘅叔父肺炎入院,

今日終於抽到時間陪母親大人返廣州探佢,

未夠時間探病就先去搵食。



2017年11月16日 星期四

豉汁排骨蒸飯


呢個星期真係幾忙架,

唔係約咗人就係要返學,

明天陪母親大人返廣州探亞叔,

星期六日又要返惠州,

所以就得今晚能夠正正經經煮餐飯食咋!

兩個人食D咩???

食蒸飯係一個好好嘅選擇嚟架!


2017年11月15日 星期三

可喜可賀


今日我哋一家全藍班,

出席大魔怪大學畢業典禮,

母親大人湊大大魔怪,

緊係都要嚟襯下熱鬧啦!

大魔怪好叻仔,

除咗一級榮譽畢業外,

仲攞到優異學業獎學金添呀!

大小魔怪兩人都學有所成,

我哋真係老懷安慰囉!

P.S小魔怪都係一級榮譽畢業架! 💕💕💕

畢業禮後有個少型聚餐,

食少少嘢就返屋企囉!

大魔怪就繼續留係學校同同學一齊影相呀!



2017年11月14日 星期二

Blog聚~常悅素食


Yahoo年代識落好多Blog友,

但到依家仲聯絡的真係所剩冇幾囉!

我哋呢班間唔中都會約出嚟食下飯,

吹下水咁啦!

昨晚就約咗去食齋喇!

出席有:EE, Angel, Terryma, 靚婆婆和我,

揀咗嚟呢度~常悅素食,

旺角登打士街32~34A歐美廣場2樓。

呢餐每人食咗$130左右呀!


2017年11月13日 星期一

鮑汁蝦仁蛋炒飯


今晚約咗Blog友仔去食飯,

所以炒定個飯俾老公和小魔怪食,

雖然睇落好似好簡單,

但落咗鮑魚汁去一齊炒,

食落都幾惹味架!

2017年11月12日 星期日

麻辣雞煲


小魔怪自英國返香港之後,

竟然連口味都轉埋;

記得以前佢對濃味嘅嘢唔多鐘意食,

如芹菜、西芹和芫茜等,

另外對辣亦都好抗拒架!

依家佢竟然冇辣不歡,

尤其係麻辣添呀!

今日整呢個麻辣雞煲,

一定啱哂佢口味啦!



2017年11月11日 星期六

時款日式麵包製作精選中班~第六堂


杏仁脆皮牛角包&吞拿魚芝士酥盒,

每次搓親酥皮,

一定好受歡迎,

整完拎番屋企已經食咗一半,

留到朝早做埋早餐,

咁就食清哂啦!


2017年11月10日 星期五

一人前~香菇薯仔炆雞翼


香菇薯仔炆雞翼,

呢個本來係小魔怪嘅今日飯盒嘅餸嚟架!

所以今朝一早起身就即刻走去炆雞翼,

點知佢突然話可以食埋午飯先出門,

就係咁,

呢個餸就做咗我哋嘅午餐喇!

話時話,

呢個餸特別在於我冇專登去醃雞翼,

雞翼解凍後先出水,

直接用醃汁去炆,

食落味道都唔差喎!


2017年11月8日 星期三

十全十美~粉葛紅蘿蔔粟米栗子馬蹄湯(素湯)


每次想煲素湯,

一定諗起煲呢個十全十美粉葛湯,

集合十種材料所煲成,

係清熱、袪濕、解毒湯水中之首選呀!


2017年11月7日 星期二

飯盒


大、小魔怪依家開始帶飯返工,

好在大魔怪逢星期二和四先帶飯(素飯盒);

而小魔怪呢就話要減肥喎!

所以帶飯只有一個要求,

就係要多菜少肉呀!

雖然係隔夜煮定,

但所有菜和炒粉麵都係朝早新鮮煮的,

我一D都唔馬孚虎架!


2017年11月6日 星期一

2017年11月5日 星期日

一年一度~大閘蟹宴


噚晚係一年一度大閘蟹宴,

今年老公同學話攞蟹真係幾辛苦,

因為初期運來數量少而且政府驗檢又嚴格,

真係噚日朝早先知有冇大閘蟹食呀!

雖然今次大閘蟹冇往年咁大隻,

但一樣咁多膏呀!

(大閘蟹每隻$150)


2017年11月4日 星期六

時款日式麵包製作精選中班~第五堂


流沙芒果芝士竹炭包&竹炭芝士方包,

呢兩款包雖然"黑媽媽",

但內裡一個有流心芝士餡,

一個就加咗芝士碎係入面,

好鬼正架!


2017年11月2日 星期四

冬菇土魷豬肉蒸飯


今日用蒸焗爐嚟蒸飯~冬菇土魷豬肉蒸飯,

有冇咩秘訣呢???

緊係有啦!

就係落洗米水時記得要落熱水喇,

咁個飯蒸出嚟會香軟好多架!

平時普通蒸飯大約用30分鐘就得,

但今次我加埋冬菇土魷豬肉落去蒸,

時間就加多少少啦!


2017年11月1日 星期三

生炒臘味糯米飯


噚日係萬勝節,

我哋成班麵包班同學仔乘機開大食會,

每個同學都整咗拿手小食返學,

我就整咗生炒臘味糯米飯呀!

今次我哋都好醒,

冇咩點食晚餐,

清得哂枱上嘅食物呀!


2017年10月31日 星期二

鮑魚


近日市面上有好多款唔同牌子但平平哋嘅罐裝鮑魚賣,

大約$38~$40左右有1罐;

好多朋友仔試過都話幾好食,

我緊係唔執輸啦!

搵朋友仔幫我買番罐試下先得!

呢罐鮑魚係元朗祥德買,

$38罐有5隻呀!

好唔好食???

食落應該係真鮑魚嚟,

個鮑魚汁味道咸咸哋,

用嚟撈飯都唔錯架!



2017年10月30日 星期一

大雜會


今日食大雜會,

大雜會係咩???

哈哈,

咪就係雪櫃有咩就煮咩囉!

裡面有菜有肉有海鮮(蝦米和魚蛋),

我仲加埋十幾隻餃子添!

嗱嗱嗱,

我係想清下個雪櫃,

千祈唔好諗我係打斧頭呀!


2017年10月29日 星期日

素湯~甘筍栗子腰果湯


今日煲素湯~甘筍栗子腰果湯

只係用咗簡單嘅材料,

唔使落調味個湯已經好好飲,

食埋湯渣嘅話仲夠哂飽肚添,

可以唔使食飯都得呀!


2017年10月28日 星期六

時款日式麵包製作精選中班~第四堂


原粒栗子北海道包&黑糖合桃軟包,

呢堂係中秋節前一日整的,

我有攞去俾母親大人試食架,

佢讚話又軟又好味道呀!


2017年10月27日 星期五

蜜汁燒豬頸肉


噚日係百佳超市裡面嘅豬肉檔,

買咗2塊靚靚新鮮豬頸肉,

咁大塊又唔貴喎,

都係收我$42咋!


2017年10月26日 星期四

童年照


今日係屋企執嘢,

俾我摷到幾本大小魔怪兒時相簿,

大小魔怪細細個就俾人話似混血兒,

(哈哈其實係惠州混番禺就真。)

好鬼cute架!

唔怪得以前奶奶咁鐘意揸住本相簿睇相啦!

原來睇番真係有好多美好回憶架!

俾大家估下邊個大???

邊個細啦???

提示就係大魔怪影相係正經好多架!


2017年10月25日 星期三

蜜汁雞翼


雞翼,

真係點煮都咁好食架!

今次冇整得太複雜,

只係落咗簡單醃料,

再撲少少蕃薯粉落鑊半煎炸,

最後淋上蜜糖和灑幾粒炒香芝麻,

一碟蜜汁雞翼就出爐啦!



2017年10月24日 星期二

一個人的午餐~咸雞薑蓉撈麵


一個人的午餐,

呢個人唔係我,

而係小魔怪;

話說星期日我包緊素餃子時,

佢話想食肉,

好彩雪櫃有半邊咸雞,

簡簡單單煮咗呢碟咸雞薑蓉撈麵俾佢食喇!

小魔怪加咗少少麻辣醬和蒸魚豉油撈勻食,

一路食,

一路話超好食,

睇落佢都幾易滿足喎!


2017年10月23日 星期一

臘味煲仔飯


麵包班同學仔真係好好,

係外面買咗D靚臘腸,

俾咗幾條請我食;

襯依家開始秋涼,

都係時候整臘味煲仔飯啦喂!


2017年10月22日 星期日

素餃子


襯星期日清閒少少,

包定D素餃子放係雪櫃都好喎!

今次個素餃子餡加咗雪菜落去,

特別惹味呀!

包咗60隻煎餃和11隻水餃,

等大魔怪放工返嚟就隨時都有餃子食啦!



2017年10月21日 星期六

2017年10月20日 星期五

韓式牛仔骨


本來預咗整呢個韓式牛仔骨俾小魔怪帶飯的,

但今日佢要返深圳考察,

下星期又要去上海上堂,

未正式入行工作就已經咁忙,

咁日後入職咪好難見佢一面囉!


2017年10月19日 星期四

蕃茄薯仔甘筍豬肉碎湯


簡單滾咗個蕃茄薯仔甘筍湯底,

唔加肉就啱大魔怪飲,

加咗肉就啱小魔怪和老公飲,

其實間唔中我都會滾下呢個湯架!

增加維他命C都好吖嘛!

2017年10月18日 星期三

廚餘~茄子豆角炒雞粒


其實每次買菜時,

我都買預咗買好多,

但最後緊有買多咗用唔哂嘅時候呀!

今次雪櫃就有條幼身茄子和幾條青豆角,

於是加埋少少雞髀肉,

炒炒埋埋又一碟餸啦喂!


2017年10月16日 星期一

梅菜蒸茄子


大魔怪出嚟做嘢都差不多2個月,

通常都會出外午餐,

但由於食素嘅關係,

所以選擇真係唔多囉!

佢話想嘗試帶飯,

對我嚟講easy job啦!

2017年10月14日 星期六

普寧豆醬焗雞


屋企有樽普寧豆醬,

除咗用嚟伴食鹽焗烏頭外,

仲可以用嚟醃雞架!

今次就用佢嚟整普寧豆醬焗雞喇!



2017年10月12日 星期四

一個人的晚餐~雜錦叻沙麵


好鐘意食呢個牌子嘅叻沙麵,

麵質彈牙,

湯底濃郁,

襯今晚得一個人食飯,

緊係要煮番碗嚟嘆下啦!


2017年10月11日 星期三

椰汁芋頭仔炆雞翼


中秋節前後,

都會有呢款細細粒嘅芋頭賣,

我鐘意買嚟炆雞翼,

加埋我鐘意嘅椰汁,

個芋頭雞翼汁好香椰奶味,

用嚟撈汁送飯就最啱啦!


2017年10月10日 星期二

外食~譚仔雲南米線(天水圍)


今日同小魔怪出街食午餐,

求其係屋苑商場搵食算啦!

好耐冇去譚仔食嘢,

叫咗一個雜錦清湯米線(大),

加個土匪雞翼和蒜泥白肉,

再叫杯凍華田和可樂,

咁就食咗$120喇!


2017年10月9日 星期一

上湯海鮮浸絲瓜


我好鐘意食上湯浸絲瓜,

今次就加咗雜錦海鮮和粉絲一齊煮,

簡單得嚟又有啖湯飲,

都唔錯架!



2017年10月7日 星期六

鮮豆漿雲吞雞


小魔怪話想食雲吞雞,

咁啱雪櫃有齊雲南火腿、無糖豆漿和急凍雲吞水餃,

我只係買半邊新鮮雞返嚟,

加埋幾棵靚白菜仔,

咁就整咗呢鍋鮮豆漿雲吞雞喇!



2017年10月6日 星期五

2017年10月5日 星期四

中秋節BBQ

每年中秋節,

我哋都會去咗姐姐家BBQ架!

雖然成朝天氣都唔係咁好,

間中仲落大雨添,

好彩當我哋夜晚BBQ嘅時候就冇落雨咋,

圍住個火爐,

仍然好熱囉!

不過有把萬用大風扇,

咩都唔使怕啦!


2017年10月3日 星期二

醬爆魷魚鬚


原本呢磅魷魚鬚係星期日要拎去姐姐家,

加落D咖哩豬皮蘿蔔魚蛋裡面架!

點知出門口唔記得攞去,

咁唯有自己煮咗佢嚟食啦!


2017年10月2日 星期一

國慶兼姨甥仔生日會


今年10月1日國慶日,

又係姨甥慶祝生日嘅大日子,

唔經唔覺姨甥已經19歲啦!

大個仔喇,

都係果句啦~學業進步,孝順父母呀!

今年我又整咗咖哩豬皮蘿蔔魚蛋和素春卷餡料。

呢個生日會,

最開心唔係壽星仔,

而係母親大人呀!

因為大魔怪出咗第一份糧,

俾咗少少錢婆婆買嘢食,

婆婆好感動,

仲眼濕濕添呀!


2017年9月30日 星期六

XO醬三色椒炒蝦仁



屋企個雪櫃緊有幾包急凍蝦仁放係度,

因為隨時加餸都有材料嘛!

今次唔用蛋炒囉,

改炒三色椒,

啖啖蝦肉,

一樣咁好食呀!


2017年9月29日 星期五

無水蒸椰菜排骨


無水蒸,

唔一定要用鑄鐵鍋,

用玫瑰鍋都可以做到呢個效果架!

今次一滴水都冇落,

因此煮嘅過程中,

椰菜和排骨都會出水,

所以唔使怕會蒸乾水呀!


2017年9月28日 星期四

2017年9月27日 星期三

雪菜火鴨絲炆米


今日午餐食雜糧,

將食剩咗嘅燒鴨折肉,

煮咗呢個雪菜火鴨絲炆米,

兩人個人煮咗一大鍋,

睇怕又要分兩餐先食得完囉!



2017年9月26日 星期二

2017年9月25日 星期一

時款日式麵包製作精選中班~第一堂


上兩個星期二開始,

我又要上麵包班啦!

睇過下嚟緊呢個課程,

堂堂麵包都幾啱我食架!

嘻嘻,

因為好多麵包都有我鐘意食嘅餡料呀!

第一堂學整日式紫菜肉鬆包&芝士肉鬆卷。