豉汁煎釀尖椒

1蚊雞人民幣可以買到咩???

我係惠州就用咗1蚊雞買咗10隻尖椒返嚟啦!

抵到你唔信呀!

老公話要食釀尖椒，

其實可以釀魚肉，

不過老公唔多like食魚肉，

所以今次整咗豬肉蝦米冬菇餡呀!

材料: 尖椒6隻、梅頭豬肉$25、蝦米3湯匙、冬菇仔10隻、

蒜蓉、即食豆豉粒

醃料: 豉油1.5湯匙、糖1茶匙、生粉1.5茶匙、麻油少許

調味: 蠔油1湯匙、豉油半湯匙、老抽少許、糖1茶匙、生粉1茶匙、水6湯匙

做法: 蝦米浸軟切碎；冬菇浸軟後切粒；

將豬肉碎放入大碗內加蝦米碎和冬菇粒，落調味攪勻後放雪櫃雪1小時；

尖椒沖洗乾淨後切開去籽，將豬肉餡釀入尖椒內；

燒熱油鑊，落尖椒慢慢火煎肉餡至金黃色，再煎另一面至金黃色後盛起；

原鑊落蒜蓉和豆豉粒爆香，加調味和將尖椒回鑊，略炆煮至汁濃便成。

~梅頭豬肉最好有少少肥先好食架!

~煎尖椒肉餡時要用小火慢慢煎，太大火會好易燶架；

~雖然煎到肉餡金黃色，但肉餡內裡可能仲未熟透，唔怕架，因為會用豉汁再炆煮；

~想易熟可以將尖椒切半，咁豬肉餡就更易熟啦；

~用剩咗嘅豬肉餡，可以用嚟釀苦瓜、茄子、豆腐和豆腐卜都得架；

~唔想釀，刨D蓮藕蓉整蓮藕餅都得呀!

 

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page