香煎雞扒

噚日挑起條筋想食煎雞扒，

用咗超級簡單嘅醃料

(鹽、雜香草、黑椒碎、蒜蓉、橄欖油)，

落鑊煎香佢就食得，

小魔怪一邊幫我切塊雞扒，

就一邊偷食d雞皮，

佢話脆卜卜好鬼正喎!

又話減肥，

仲食???!!!

材料: 雞扒2塊、蒜蓉

醃料: 鹽1.5茶匙、雜香草半湯匙、黑椒適量、橄欖油少許

做法: 雞扒解凍後用廚紙索乾水份，用刀把雞扒厚肉位置界幾刀，

落醃料和蒜蓉醃半日(醃隔夜仲入味)；從雪櫃取出雞扒放室溫1小時，

燒熱鑊落好少油，先煎帶皮雞扒2~3分鐘(其間需要蓋上鑊蓋)，

待雞扒出油後，後轉煎另一面2~3分鐘(也需蓋上鑊蓋)，

用筷子插入厚身雞肉面，插得穿和冇血水出就代表雞扒熟，

插唔穿和仲有血水出，就要煎多1~2分鐘啦!

最後再反轉煎帶皮雞扒，咁塊雞皮就更加脆口啦!

~燒熱油鑊後，記得轉中火煎雞扒，唔係D蒜蓉就會好易燶，燶就有苦味架啦!

~用煎下焗下嘅方式煎雞扒，咁塊雞扒會冇咁乾身，肉質好juice架!(重要係唔使D油彈到周圍都係嘛!)

     

 大家可以入嚟Facebook讚下我新開嘅Fans專頁呀!

 雀后(添飯)Facebook Fan Page