香菇咸肉菜飯

今日煮有味飯~香菇咸肉菜飯，

簡單好味又易做，

飯味咸咸香香，

真係會添多幾碗飯架!

材料: 冬菇6隻、雲腿適量、米2.5杯、小棠菜3棵、雞湯2.5杯(量米杯)

做法: 將米浸洗15分鐘後隔水備用；小棠菜莖切粒，葉切小段；

冬菇浸軟去硬蒂切片；雲腿切小片；

凍鍋落油燒熱後，加冬菇先爆出香味後，落雲腿炒至出油，

落小棠菜莖和米炒勻後，加入雞湯後用中火煮至差不多乾水，

用湯匙攪攪煲底免飯黐底，轉小火煮多10分鐘左右，

其間需要將煲在煮食爐上下左右移動(平均受熱)；

加埋菜葉攪勻飯後熄火，唔好開蓋繼續焗5~8分鐘便成。

~因為呢個菜飯我加咗雞湯，所以呢個飯唔使落鹽，

如果唔落雞湯剩落清水嘅話，咁就要加少少鹽調味啦!

~呢個飯唔一定用煲仔煮架，用電飯煲都可以煮，其實步驟都係差不多架!

    

 

  

大家可以入嚟Facebook讚下我新開嘅Fans專頁呀!  
雀后(添飯)Facebook Fan Page