自製燻蹄

話說上星期六，

我係百佳超市嘅肉檔買咗隻新鮮豬手和豬腳，

肉檔亞姐超好人，

幫我將隻豬手多肉部份起咗舊骨，

其餘豬手和豬腳就幫我斬件；

豬手豬腳就用嚟煮鹵水，

豬手肉就用咗嚟整燻蹄喇!

材料: 豬手1隻、薑6片

調味: 鹽2湯匙、八角2粒、薑3片、紹酒1湯匙、

香葉4片(如有花椒粒可以少少)

做法: 豬手洗淨去毛後，放入熱水鑊內，加入薑3片和紹酒1湯匙，

出水15分鐘後，撈起豬手洗淨瀝乾水份；

將豬手放入鍋內，加入調味和水(需要蓋過豬手)，

用中火滾煮後轉小火煲1.5小時，唔好開蓋待豬手完全涼後先從鍋內取出；

準備多張保鮮紙，將豬手中間界開，將厚肉部份切開，填入薄肉位置上，

然後用保鮮紙把豬手卷好扎實，重覆從唔同方向將豬手包好，

放入冰格雪隔夜，早上從雪櫃取出放回雪櫃普通格，

晚上就可以攞出嚟切薄片架啦!

~白醋蒜蓉汁做法: 白醋3湯匙、蒜蓉、魚露2茶匙、糖2茶匙、

辣椒粒(自行調節酸甜度)

~去肉檔買新鮮豬手時，記得問問可唔可以幫手起埋舊骨，

咁就唔使自己做多一個步驟啦!

~用新鮮豬手做嘅燻蹄，食落口感會硬少少，如改用急凍咸豬手煮的話，

就唔使點落鹽煮喇，因為咸豬手本身已經夠哂咸呀!

而且食落肉質都會腍身少少，可以一試架!

  

大家可以入嚟Facebook讚下我新開嘅Fans專頁呀!

雀后(添飯)Facebook Fan Page