烚下烚下~支竹馬蹄羊腩煲

見到凍肉舖有急凍羊肉賣，

買咗2磅半返屋企炆嚟食，

本來諗住夜晚先食，

但小魔怪要出街，

所以改咗中午就烚下烚下囉!

姐姐好耐之前幫我淘咗呢個新玩具~小熊多功能電烤爐，

打邊爐和燒烤兩用都得架!

材料: 羊腩2.5磅、馬蹄18粒、炸乾支竹1包、薑10片(拍扁)、蒜蓉、

紹酒2湯匙、冰糖1粒(乒乓球咁大)、老抽少許(調色用)

調味: 大南乳一磚、腐乳4件、柱候醬1湯匙

腐乳醬: 腐乳4件、糖1茶匙、腐乳汁適量

做法: 羊腩用4片薑和1湯匙紹酒出水10分鐘，洗淨後瀝乾水份備用；

馬蹄去皮；乾支竹浸軟切段備用；

落油爆6大片薑、蒜蓉和調味，落羊腩炒勻後贊1湯匙紹酒炒數十下，

落馬蹄和5~6碗水(水需要蓋過羊腩面)，水滾後轉最小火炆1.5小時；

落支竹和加少許老抽調色，炆多10分鐘後熄火，

唔好開蓋繼續焗羊腩2~3個鐘(如有時間炆定隔日食仲入味)；

將羊腩轉入電鍋煮至翻滾，加埋生菜和響鈴一齊烚下烚下便成。

~滾到咁上下冇汁嘅話，可以加少許熱水落架!

~響鈴，我鐘意放入湯汁內浸1~2秒，食落外軟內脆，好鬼正架!

    

  

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page