湯湯湯~冬瓜粒湯&羅宋湯

新加坡返嚟呢幾日，

我都好乖咁煲咗兩餐湯嚟飲架!

不過兩款湯水都係要切切切，

冬瓜粒湯和羅宋湯，

唔知大家鐘意飲邊款呢???

梗有一款啱你口味架!

冬瓜粒湯:

材料:冬瓜1斤半、冬菇15隻、瑤柱8粒、梅頭肉$20、咸蛋1隻、蜜棗3粒

醃料:豉油、糖、鹽和麻油各少許

做法:冬瓜去皮切粒(留冬瓜皮)；冬菇浸軟去蒂切粒；

梅頭肉切粒後，用醃料醃半小時；

燒熱水，加冬瓜、冬菇、瑤柱、肉粒、咸蛋黃和蜜棗煲1小時30分鐘，

最後加埋咸蛋白攪勻，隨個人口味加鹽調味。

羅宋湯:

材料: 牛筋條1磅、蕃茄3個、甘筍2條、薯仔3個、西芹4條、椰菜半個、

香葉4塊(唔落都可以)、蒜蓉、薑片、紹酒、牛油適量

做法: 牛筋條解凍後，燒熱水加入薑片和紹酒，

落牛筋條出水10分鐘後沖水，把牛筋條切粒；

薯仔、甘荀、西芹去皮切粒；蕃茄切件；椰菜切片；

凍鍋落牛油和蒜蓉炒勻，加入牛粒炒出香味後落蕃茄快炒出茄油，

然後落薯仔、甘荀、西芹炒勻後，加香葉和10碗熱水，

用大火煮滾後轉細火煲45分鐘，落椰菜煲多30分鐘，

最後落鹽調味便成。

(隨個人口味可灑少許黑胡椒碎、胡椒粉或parsley碎)

 

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page