2011年3月31日 星期四

孖寶飯+紫菜墨魚丸湯!

大家有冇擔心過日本核電廠會有事o架???


我有呀!仲好擔心添!


聽講D輻射已經飄到香港, 
雖然唔算太嚴重,

但始終係毒物,


都係小心D好!


依家局勢咁嚴峻,



係咪真係有得食好食,


有得玩好玩呢???


今日想滿足自己嘅食慾,
整咗個孖寶飯,



仲有紫菜湯呀!



聽講話紫菜可以預防輻射,
呢個我就唔係咁信,
 
不過大小魔怪鐘意飲,



冇計啦!



2011年3月30日 星期三

長期糧尾~印尼沙爹雞配蝦片

大日子,大日子, 

明天係出糧嘅大日子呀!


而且嚟梗4月學校有好多假期, 


超期待啊! 


大家有冇諗去邊度玩呀??? 


我就冇啦! 


因為4月收到好多紅色炸彈,


要儲錢做人情。


今日整個慳錢餸, 


好味又唔貴呀!

2011年3月29日 星期二

柱候牛筋腩蒸陳村粉!

自上次食過蒜香排骨陳村粉之後,
我對佢念念不忘呀!
今日我又心思思去咗買嚟食,
今次唔蒸排骨啦!
改用牛筋腩呀!
先炆好柱候牛筋腩後,
加埋陳村粉蒸10分鐘,
灑上蔥粒就食得啦!
依家買條蔥都要錢呀!
不過就儲存唔耐,
大家有冇好嘅方法等D蔥唔好咁快爛呀!


2011年3月28日 星期一

七彩炒粒粒!

一年前係街市買三色椒都係$5-6, 


依家D三色椒竟然賣$12,


真係足足貴咗一倍,



點解我份人工冇加一倍呀!



百厭BB!

 


依家差不多個個星期六或日,

我哋都會抽時間去探姨甥女。

BB幾日唔見,

又大個咗,

又得意咗,

仲識認人添!

尤其BB女專蝦母親大人,

夜晚通常唔俾人瞓覺,

會眼碌要人抱呀!

個個人都話BB唔可以抱咁多,

但母親大人唔想嘈醒妹妹妹夫,

所以咪抱佢囉!

抱得多自然會蝦人o架啦!

講完BB,開飯啦!



2011年3月27日 星期日

黑芝麻蛋糕!

見好耐冇整蛋糕啦!
有D手痕添!
拿拿臨攞哂D材料出嚟,
又攞埋係廚安居買嘅焗兜,
開工!


2011年3月26日 星期六

蝦醬蒸豬腩肉!

一連兩個星期六,
學校為我們老師安排兩個朝九晚五嘅講座,
題目係認識自己嘅性格,
從而提昇團隊精神。
講者提出一個好得意嘅問題,
問大家用一種動物來形容自己,
妳哋會揀咩動物呢???
而我就揀咗......


2011年3月25日 星期五

七彩雞粒玉子豆腐蒸蛋!

昨晚大魔怪已經話唔舒服所以冇食飯;
老公見佢成晚都冇咩落過肚,
於是一早吩咐工人姐姐炒飯俾佢食,
點知食完冇耐就全部獲利回吐,
嚇死工人姐姐囉!
今晚要食清D,
唔食咁油膩啦!




2011年3月24日 星期四

又炸!

過年時炸咗半盒蝦片,
今日想一次過炸埋其餘的,
點知最後都係有剩,
留番遲D再炸過!
食唔哂可以用密實袋封好,
可留一個星期o架!

蝦醬蒜蓉粉絲蒸鮮魷魚!

繼續清雪櫃裡嘅醬料,
俾我摷到樽係流浮山買嘅蝦醬, 
一於清埋佢先得!


2011年3月23日 星期三

亂嚟!

今次整呢個餸係亂嚟o架!
因為要清一袋新薯、雪櫃裡嘅南乳醬和豬仔骨呀!
唔知好唔好食o架!
不過整咗先算啦!

2011年3月22日 星期二

煎蠔餅!

今日見得閒又落元朗行咗一轉。
去到合益街市,
見到D蠔仔好鬼靚,
於是買咗一斤嚟整蠔餅,
點知哥哥仔攞埋一包粉俾我, 
嘩!白粉???

原來係蕃薯粉,
哥哥仔仲教我點整蠔餅添!
嘻嘻!真係唔該哂喎!


2011年3月21日 星期一

深圳半日遊!

 
今日下午我放工約咗sand sand、Annie 和Annie家姐、好子、如月,
一齊去深圳書城和東門廚安居買嘢,
未去之前梗係醫肚先,
行咗好耐搵到呢間飲茶!

2011年3月20日 星期日

大小魔怪生日派對兼祈祈BB滿月啦!

 
今次大小魔怪嘅生日派對,
本來預咗燒嘢食,
可惜昨日燒嘢食先嚟落雨,
唔通連個天都唔鐘意我哋。
於是決定去妹妹家煎和焗熟哂D嘢嚟食啦!
婆婆托姨媽買咗個芒果流心蛋糕俾大小魔怪食呀!
驚唔夠食咪買多3件芒果蛋糕囉!
呢日兼慶祝祈祈BB嘅滿月,
妹妹話遲D會擺雙滿月酒,
想BB大個D先帶佢出街呀!

腰芒!

今日我同老公落元朗買嘢,
去咗俊賢坊買水果,
(即往元朗朗屏村天橋底)
果度有間洋蔥頭,
專賣蔬菜和水果呀!
見到D腰芒都幾靚,
咪買嚟食囉!
自己揀就10蚊2磅,
免揀就10蚊3磅,
點知老細話清貨,
依家益我20蚊7磅喎!
就係咁,
我買咗成籃腰芒啦!
D芒果真係好鬼香o架!
我都忍唔住食咗5個呀!


2011年3月19日 星期六

Pancake!

"點解妳兩個仔成日都處於飢餓狀態o架!"
母親大人成日投訴咁話;
我都唔知點解???
我已經俾哂佢哋食o架啦!
餐餐大小魔怪都起碼食2-3碗飯,
不過食完飯冇兩個鐘又話肚餓,
唉!我都唔想o架!
今次整咗個簡單pancake俾佢哋做宵夜。
老公鐘意咩都唔搽,
而我最鐘意搽花生醬和煉奶啦!


2011年3月18日 星期五

大小魔怪的生日晚餐!

 
 
年年我哋都會為大小魔怪做生日,
今年好特別,
因為妹妹啱啱生完BB,
唔方便出遠門嚟我哋屋企,
所以明天決定去妹妹屋苑會所BBQ,
希望唔好落大雨啦!
今日係大小魔怪正日生日,
簡簡單單整咗一餐俾佢哋食呀!

2011年3月17日 星期四

謠言止於智者!

 
大家今日有冇搶嘢呀???
搶鹽、搶豉油、搶米,搶搶搶呀!!!
我個人認為,
散播謠言者可恥,
聽信謠言者可悲!
如果真係世界末日,
大家可能一瞬間已經消失,
搶咁多鹽、豉油有鬼用咩???
今日食碟頭飯和煲例湯:

2011年3月16日 星期三

蒜香排骨蒸陳村粉!

其實我好鐘意食陳村粉,
次次返親中國,
飲茶時一定會叫嚟食,
真係百吃不厭呀!
今日路經元朗,
好似有吸力咁吸我去吳壁記買陳村粉,
真係手快有,手慢冇得買呀!

2011年3月15日 星期二

鹽酥雞!

嘩嘩嘩!
今日日本核電廠又發生爆炸兼洩漏幅射,
好驚好危險呀!
唔知對身在香港嘅我哋有冇影響呢???


2011年3月14日 星期一

芒果布甸!

星期日係元朗買芒果5個$10,
好鬼抵呀!
見屋企仲有3盒啫喱粉,
咪整咗呢個芒果布甸囉!
我噚日下午已經整咗,
不過俾大小魔怪"鵝"足成晚,
點解咁耐都冇得食o架???

2011年3月13日 星期日

焗叉燒!

昨日玩咗成日,
今日我要留番係屋企做工人,
因為工人姐姐放假呀!
一朝買咗一大舊梅頭豬肉返嚟整叉燒;
醃咗大半日,
焗完出嚟香噴噴,
我都忍唔住偷食咗幾舊添!
焗咗咁多叉燒,
大小魔怪今次實冇投訴啦!

化學!

近日睇住日本地震海嘯嘅消息和電視畫面,
真係覺得人好化學,
一個咁先進嘅國家,
都抵受唔住大自然嘅洗禮,
變成一個個廢墟,
願死去的人安息!
不過值得讚的是日本人到便利店門外排隊買食物或水
真係好有禮貌和守秩序,
值得學習;
換了我國人民,
已不敢想像!
一個簡簡單單的午餐,
感覺幸福唔係必然o架!
珍惜眼前人!


2011年3月12日 星期六

錦田鄉村俱樂部~士多啤梨園!

 
今日約埋lonely+囡囡、好好過日子、sand sand和我,
一齊入錦田鄉村俱樂部摘士多啤梨,
呢度唔單只摘士多啤梨,
仲有好多嘢玩,
啱哂一家大細消磨一日,
睇吓幾時我哋又約去再玩過呀!

2011年3月11日 星期五

紫菜四寶米線!

係咪呢!
我成日都叫大小魔怪著衫o架啦!
次次都唔聽我講,
今朝小魔怪一起身頭暈暈腳軟軟,
梗係感冒啦!
佢又唔肯去睇醫生,
剩係食咗粒必理痛,
唯有請假係屋企休息;
瞓咗一個上午,
佢又開始有精神打機啦!


2011年3月10日 星期四

鹽焗烏頭魚!

大小魔怪都幾鐘意食魚o架!
不過次次蒸親魚,
都會要求落好多豉油,
有時我都會懷疑佢哋鐘意食魚定鐘意食豉油呀!
今次整呢個鹽焗烏頭魚,
一滴豉油都唔落,
睇吓佢哋鐘唔鐘意食啦!


2011年3月9日 星期三

脆皮燒肉!

見好耐冇焗燒肉,
咪去街市買舊靚靚腩肉囉!
點知今次又俾大小魔怪投訴,
佢哋話~~點解得咁少燒肉喎!


2011年3月8日 星期二

蠔油薯仔炆雞翼!

呢個薯仔炆雞翼,
真係由細食到大,
雖然係一個好普通嘅餸菜,
不過食咁耐一D都唔覺厭,
尤其我最鐘意食薯仔,
好腍甜o架!



2011年3月7日 星期一

漢和韓國料理~韓式燒烤自助餐!

 
上星期六晚上6點半唱完K之後,
Annie、EE、Terryma和我,
去咗食韓式燒烤自助餐!
漢和韓國料理地址係旺角銀城廣場三樓。
食物種類OK啦!
味道OK啦!
不過可能係星期六,
好多人呀!
每人平均消費$152。

咖哩豬皮魚蛋魷魚什丸!

昨日我和老公又去探姨甥女~允祈。
唔見一個星期,
佢又抵打咗啦!
BB都算俾面我哋D姨媽,
我哋咁嘈咁打麻雀和唱K,
佢都瞓得好舒服,
一D都冇扭計,
剩係到咗夜晚先開始眼仔睩睩望住我哋班大人!
母親大人話BB近排半夜1點幾食完奶後,
可以捱到早上6點幾先再食奶,
抵抵抵錫呀!
  
我昨日整咗一大盒咖哩豬皮魚蛋魷魚什丸,
仲以為有剩可以留番俾大小魔怪食,
點知妹夫話不如留番俾佢第日煮麵做早餐喎!
佢哋話最好味係D豬皮,
因為索哂D咖哩汁呀!

2011年3月5日 星期六

家鄉煎薄餅!

又一款茶樓食品~家鄉煎薄餅!
我鐘意食軟軟的,
而老公就鐘意食脆脆哋,
好難就啊!
呢個家鄉煎薄餅好簡單,
話咁快就做咗我哋噚晚嘅宵夜啦!


Neway唱K!

 
今日約咗一班blog友仔唱K~Annie、Terryma、EE、如月和我!
EE和如月係我第一次見,
好高興認識妳哋呀!
唱K有buffet食o架!
我哋攞咗好多嘢食,
一面食嘢,
一面唱唱唱唔停呀!


2011年3月4日 星期五

棉花雞!

睇番嚟梗3、4、5月嘅星期六,
差不多日日都要返工,
除咗正常當值外,
要開始準備新學年新生面試,
仲要參加教師講座,
朝九晚五,
好攰呀!
今日整呢個餸,
係我鐘意食嘅茶樓點心之一,
不過好耐食過啦!
我將D雞皮起咗,
睇落健康好多呀!


2011年3月3日 星期四

8分鐘~紫菜墨魚丸湯!

一向懶煲湯嘅我,
一個月都唔知有冇煲4次老火湯,
不過間中我都會滾湯o架!
簡簡單單,
呢個紫菜墨魚丸湯就最啱我呢個懶人啦!
仲有依家買嘅紫菜好少有沙,
唔使係爐上烘o架!

2011年3月2日 星期三

派錢!!!

今朝聽到財爺話派錢$6000,
開心到跳起啦!
有實錢落袋喎!
諗諗點洗先得!
不過,
又見到有D人上台襲擊特首,
嘩!好暴力呀!
香港日後點可以由呢班人揸fit o架!


2011年3月1日 星期二

簡單有味菜飯!

呢兩日真係好熱呀!
太陽伯伯一出嚟就起碼有成24度;
不過聽講明天開始涼番D,
得15度左右,
仲會落埋雨添,
忽冷忽熱嘅天氣,
大人細路都要小心身體呀!
今日懶唔想整太多餸,
簡簡單單用個電飯煲已經攪掂一餐啦!