今日鼻敏感又發作，
好辛苦呀!
一起身連打十幾個噴嚏，
D鼻水又不停咁流；
唔單只我，
連大魔怪都開始作病，
又咳又流鼻水，
好似仲嚴重過我添!
老公即刻去藥房配咗隻超難食嘅咳藥水俾佢食，
希望唔使睇醫生啦!
今日整呢個咖哩雞，
小魔怪話想食好耐，
佢話要食有椰汁味，
要杰身果種咖哩，
最好似大家樂大快活果D喎!
亞仔，你老豆即我老公，
又話唔鐘意椰汁味o架!
你叫我點算好呀???
材料: 雞一隻、薯仔3個、快達牌椰汁一罐(小)、鹽少許、
蒜蓉和乾蔥蓉
醃料: 咖哩粉1湯匙、豉油1.5湯匙、糖和粟粉1茶匙、麻油和紹油各少許
做法: 雞洗淨斬件，用醃料醃半天；薯仔滾刀切角；
落油爆香蒜蓉和乾蔥蓉，加雞件和薯仔快炒數十下，
加入2碗水炆20分鐘，最後加椰汁和少許鹽調味，攪勻翻滾後即成。
P.S. 今晚整得超多餸，
唔係因為朝早被人投訴冇餸食，
而係我要清雪櫃物資；
另外，
最重要係老公讚我，
佢話我整嘅椰香咖哩雞好好食呀!
大家可以入嚟Facebook讚下我新開嘅Fans專頁呀!
沒有留言 :
張貼留言
如果大家覺得我煮嘅餸菜啱哂口味嘅話，不妨留個言，鼓勵下我啦!