再接再厲~Oreo芝士蛋糕!

 

近排見blog友整芝士蛋糕係用Oreo底，
我未試過喎，
睇落好似好好味道咁，
襯上星期六得閒少少，
咪整個嚟食吓囉!
點知雪完之後，
個oreo餅底好鬼濕，
而且中間好creamy，
好似糊仔咁呀!
超超超失敗......
雖然昨日鼻敏感又發作，
不過帶住口罩我都要再整多次o架啦!
問過幾位高人意見後，
再接再厲，
希望今次成功啦!

                                                Oreo芝士蛋糕
材料: 忌廉芝士250g、忌廉200g、鮮奶200g、糖4湯匙、牛油25g、
          Oreo餅1條14塊、3隻蛋、麵粉4湯匙
做法: 將Oreo餅裡的cream挖走，餅乾放入密實袋裡搓成碎粒狀，
          加入已叮溶嘅牛油，放入餅模內壓平後，入雪櫃冰箱雪一陣；
          將蛋白打勻至起泡備用；忌廉芝士放於室溫一小時，
          用叉搓散忌廉芝士，加蛋黃、牛奶、忌廉和糖打勻；
          然後再逐次加入蛋白和麵粉打勻；預熱焗爐170度15分鐘，
          並加水入焗盆；將芝士粉漿過篩入蛋糕模內，輕輕"凳"佢幾下，
          等D氣泡浮面後，用牙籤刺穿D泡泡，用鍚紙包好蛋糕模底，
          座在水焗盆中用上下火焗45分鐘，最後10分鐘轉上火焗蛋糕面，
          取出蛋糕後待涼放入雪櫃雪6小時或隔夜。         

P.S. 今次我"凳"蛋糕"凳"得唔夠，
        所以焗出嚟個芝士蛋糕好多窿窿；
        而且切得又唔夠靚；
        不過個芝士蛋糕雪咗大半日之後，
        餅底俾以前實咗，乾身咗，
        唔使講大小魔怪讚到不得了啦!
        話係人間極品喎!
        都唔知係咪佢氹我，
        等我下次再整俾佢食呀!

***最最最梗要係多謝幾位高人嘅指導，
      真係唔該哂佢哋呀!

 

 

 

 

 

 

  

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page