日式炸雞

係咪衰呢，

今日我見好番少少又開始為食喇!

今晚得小魔怪和我兩人個人食晚飯，

簡單整咗碟炸雞一齊嘆下，

炸粉係用日本旅遊時買嘅日清炸雞粉，

唔需要預先醃肉，

廿零分鐘就有炸雞食，

係咪好正呢!

材料: 雞扒2塊、日清蒜味醬油炸雞粉1包、水110CC

做法: 雞扒解凍後，用廚紙索乾水份，

係雞扒厚肉位置界幾刀(易入味)，切件備用；

將炸雞粉放入大碗內，按包裝上落110CC水攪勻，加入雞件醃10分鐘；

用中大火燒熱油鑊後即轉小火，放入雞件(有皮)炸至定型後，

反轉炸另一面雞件至金黃色後上一碟；待炸完全部雞後，

調至中火，再次放入雞件炸多30~40秒至雞件脆身後撈起便成。

~提提大家，呢個炸雞漿都幾黐鍋，一定要用易潔鑊先好炸呀!

大家可以入嚟Facebook讚下我新開嘅Fans專頁呀!

雀后(添飯)Facebook Fan Page