今日自己調咗個蒜頭豆豉醬嚟蒸排骨，
買咗2條一字排骨，
我和老公都食唔哂，
咪睇我哋大大隻，
其實我哋好細食架!
小魔怪今朝食埋午餐先返工，
我煮咗兩個餸，
薯仔炆雞翼和椰菜蝦米煮粉絲，
日常家常便飯，
簡單又好味道呀!
今日整咗薑蔥手撕雞，
啖啖肉，
我哋成家都鐘意食，
小魔怪一見到有手撕雞食，
佢即刻問今日咩日子，
點解咁好餸，
哈哈，
我日日都咁好餸架啦!
前幾日用咗新方法去蒸花膠，
花膠經過2蒸2浸後，
真係脹大咗好多呀!
今日就用咗其中一隻浸發好嘅花膠，
炆咗呢鍋冬菇花膠炆鴨腳。
提提大家，
蒸花膠時要加薑和蔥去腥，
但我忘記了，
係姐姐事後先話我知要薑蔥呀!
小魔怪臨時返嚟食飯，
拿拿臨摷雪櫃有2塊牛仔扒，
加埋個薯仔就整咗呢碟黑椒薯仔牛肉粒。
今日我係股票市場裡有少少斬獲，
所以有餸加；
之前買開嘅燒味餐加咗價，
半隻燒鴨加半斤叉燒$135，
不過加送4隻豉油雞翼，
咁就抵番哂啦!
响呢個復活節假期裡，
我哋終於有時間，
食呢盒係山姆買嘅蟹四寶蟹黃麵喇!
按包裝指示用熱水浸熱蟹黃醬、禿黃油、蟹腳、蟹肉，
然後煮熟麵條，
按次序加入禿黃油、蟹黃醬、蟹肉和蟹腳，
再加入蟹醋撈勻麵條就食得，
個人覺得啱哂我口味，
好味道呀!
唔知係咪呢排天氣唔好，
時濕又時熱，
我見今日仲係假期，
拿拿臨買咗包土伏苓牛大力地老鼠，
呢個湯水有清熱袪濕解毒等功效架!
前兩日係凍肉舖買咗3隻大雞髀，
今日攞咗其中兩隻嚟整咗呢碟豉油雞髀飯，
加埋灼學斗菜，
開飯啦!
今日午餐好簡單，
整咗一大鍋芝士卡邦尼蘑菇肉碎火腿意粉；
買咗罐卡邦尼蘑菇意粉醬，
加上自己喜歡嘅食材，
今次我就加咗蘑菇、豬肉碎、火腿和芝士片，
以上3個人食，
每人食咗2碟，
好滿足呀!
今日襯復活節，
我哋去咗拜祭父親大人，
姐姐和姐夫去咗中山，
所以派咗姨甥亞諾做代表；
拜祭完父親大人後，
我哋去咗第一城飲茶，
10個人總共食咗$1623，
原本我哋叫咗半隻燒鵝，
點知落錯單斬咗一隻燒鵝出嚟，
我哋見一隻燒鵝都唔係好貴$498，
最後都係要咗成碟燒鵝，
酒樓亞姐送咗糖水俾我哋食呀!
晚餐就去妹妹家食飯，
工人姐姐煮，
味道都唔錯架!
自從大魔怪搬咗出去住，
而小魔怪又好少返嚟食晚飯，
得返我和老公兩個人，
真係唔想煮囉!
我哋屋苑商場兩餸飯賣$43，
只要叫多飯(唔使加錢)，
大大盒足夠我和老公兩個人食啦!
今日煲朱家例湯，
青紅蘿蔔粟米螺片煲西施骨，
小魔怪話想飲湯，
緊係冇問題，
即刻可以滿足到佢呀!
噚日第一次試整潮州蝦棗，
其實一D都唔難整；
响惠州買咗包正方形腐皮返嚟，
將調好嘅蝦和肉餡卷入腐皮中，
蒸熟佢後再煎或炸番佢，
咁就食得啦!
噚晚去咗大仔和女朋友新居食晚餐，
我帶咗茶葉蛋和潮州蝦棗過去一齊食。
响韓國廣藏市場買咗2pack蟹肉棒，
我用咗其中1包(4條)蟹肉棒，
拆絲嚟炒蛋，
真係好好食，
唔知香港有冇得賣呢???
經過星期一大跌市，
聞者傷心，
聽者流淚，
有貨更傷身添，
响股市風高浪急之際，
星期二我就同老公兩個人返咗大亞灣，
洗滌心靈呀!
响蓮塘口岸過關後，
係離境大堂停車場，
等大巴車去十里銀灘；
去到十里銀灘3期落車先搵食。
今朝返舊屋牛潭尾拜山，
拜完山大魔怪話今晚會返嚟食飯，
佢話想食手撕雞，
所以我就將拜山果隻雞拆咗絲，
加埋包海蜇落去，
整咗碟海蜇手撕雞，
焗埋佢至愛嘅叉燒，
炒多碟菜就食得飯啦!
老公前兩日返咗元朗舊屋，
鄰居摘咗2個木瓜請佢食，
今日我就用咗其中一個木瓜嚟煲湯，
青木瓜眉豆花生雞腳煲西施骨，
好甜好好飲呀!
今日買咗2塊梅頭豬扒，
不過唔記得買洋蔥，
所以冇得整洋蔥豬扒，
點算好???
我見雪櫃仲有碗粟米粒，
有計啦!
晚餐整咗呢碟粟米雞蛋炒豬肉粒，
大人細路都鐘意食呀!
今日又用養生壺煲湯，
五指毛桃麥冬螺片湯，
加咗豬腱、淮山、蓮子、百合、茨實，
仲有瑤柱仔和蜜棗，
用煲湯功能煲到最後5分鐘，
加埋杞子落去撈勻，
最後按個人口味落鹽調味便成。
今日係街市買咗墨魚滑，
4兩真係好鬼少，
所以加咗2湯匙粟米粒落去一齊煎，
煎完得6塊，
我和老公每人3塊，
啱啱好夠食呀!
3月22日星期六
今晚我哋要返香港啦!
朝早又係瞓到自然醒，
食咗少少早餐後，
執好哂所有行李，
Hea到11點左右，
就落樓check~out，
將行李放係酒店，
我哋就行去附近廣藏市場行街街兼食嘢。
