客家炆豬肉配咸酸菜

小魔怪要食健康餐，

咁老公食咩好???

今日我就炆咗客家炆豬肉配咸酸菜，

買嘅五花腩唔太肥，

將有軟骨部份切開，

咁老公可以食有皮嘅五花腩，

而我就食有軟骨較瘦嘅部份喇!

不過配埋咸酸菜、豆腐卜和木耳一齊食，

感覺唔係好肥膩呀!

 

材料: 五花腩2條、木耳3朵、豆腐卜10個、咸酸菜適量、薑4片、

乾蔥頭(切片)、南乳1/4件、紹酒1湯匙

調味(炆豬肉): 蠔油1湯匙、老抽1湯匙、冰糖粒1湯匙、水2.5碗

調味(咸酸菜): 糖1茶匙、麻油少許

做法: 將五花腩肉出水5分鐘後，取出沖洗乾淨，將有軟骨部份切開後切件；

木耳浸軟去硬蒂切件；咸酸菜浸30分鐘；豆腐卜切半；

南乳用紹酒半湯匙搓勻；燒熱油鑊落乾蔥片和薑片先爆香，

倒入南乳醬炒勻，加入五花腩肉快炒後贊半湯匙紹酒，

落埋調味和木耳炆豬腩肉40分鐘，放入豆腐卜炆多5分鐘後熄火；

將咸酸菜切小段，用白鑊(即不需落油)炒至咸酸菜乾身，

落糖和麻油炒勻後，把咸酸菜盛起，放入已炆好嘅客家炆豬肉係面便成。

大家可以入嚟Facebook讚下我新開嘅Fans專頁呀!

雀后(添飯)Facebook Fan Page