走流程

9月1日星期一

今日我和老公又返惠州一趟，

因為我哋要簽合同喇!

網簽後兼錢到位嘅話，

走哂所有流程後，

我哋就可以收樓喇!

不過未返惠州前，

我哋先去蓮塘口岸食早餐￥47。

去三聖食海鮮

今晚，

我哋一家同新抱仔一家食晚飯，

見見新抱仔嘅大姑媽和二姑媽，

可以講係見家長呀!

我哋去咗關財記買海鮮，

再拎去附近青山灣漁港加工煮嚟食呀!

又返惠州喇

8月28日星期四

我和老公又返惠州喇!

惠州舊屋徵收賠償出咗，

依家冇以前賠得咁多錢，

而且又分咗本地人和外地人賠償金額都有不同，

有安置房(等幾年)、房票和現金(賠償唔多)等3個方案，

最後我和老公揀咗房票，

直接用賠償金額嚟買現樓，

仲有少少現金獎勵咁啦!

簡易版~東北鐵鍋燉(粟米薯仔豆角炆排骨)

 

簡易版~東北鐵鍋燉(粟米薯仔豆角炆排骨)，

粟米買咗成個星期，

放係雪櫃都已經乾乾哋，

不過唔怕喎，

用嚟煮呢個鐵鍋燉，

粟米即刻變番飽滿又多汁；

加埋薯仔、唐排和豆角，

煮起一大鍋，

一個餸都有排食呀!

鹵水牛腱&雞翼

上星期五，

我買咗2條新鮮牛腱，

整咗鹵水牛腱，

星期六拎去大魔怪家一齊食，

可惜我哋大家都掛住食，

忘記了影相呀!

不過唔緊要，

我再買新牛腱再整多次，

仲加埋雞翼一齊鹵，

仲入味呀!

打邊爐

噚日，

我哋下午去咗大魔怪家，

攞齊嘢去佢家煲薑醋；

兩兄弟合力砌咗個櫃仔，

Easy job啦!

之後，

我哋見仲未食晚飯，

打番4圈消磨時間，

呢套麻雀係淘寶淘架!，

有小熊維尼樣，

好得意喎!

晚餐超豐富，

食剩好多嘢呀!

三色椒菜脯炒肉粒

屋企仲有三色椒係雪櫃，

拿拿臨要煮埋佢先得喇!

我仲摷到好耐之前去潮州旅行時買嘅菜脯乾，

加埋梅頭豬肉粒落去一齊炒，

炒完之後好似爭咁D嘢咁，

最後灑咗D鹽炒花生落去，

嘩，

好味道呀!

呢個餸送粥送飯都好好食架!

蝦仁肉片炒烏冬

噚日小魔怪WFH，

煮咗蝦仁肉片炒烏冬做午餐，

炒咗3包烏冬，

點知小魔怪話唔夠食喎!

平時我和老公食都係炒3包烏冬，

我哋兩個係食唔哂，

仲剩一大碗架!

估唔到依家小魔怪咁大食，

咁我下次要炒多D先得啦!

椰子排骨湯

2條唐排可以整咗2餸1湯，

計之前嘅蒜豆豉蒸排骨和豉椒炒排骨後，

我將厚骨部份嘅唐排，

先出水後落鹽醃咸佢，

用嚟煲湯就最啱喇!

之前係羅湖城買咗￥50有4包湯料，

其中一包就係呢包清潤椰子雞湯枓喇!

呢個湯我仲加咗紅蘿蔔、粟米和瑤柱落去一齊煲，

煲咗2個鐘頭，

啖啖椰子香味，

仲好清甜添架!

豉椒炒排骨

噚日買咗2條唐排，

將有厚骨部份留咗嚟煲湯，

其中一條唐排噚日整咗蒜頭豆豉蒸排骨，

今日用埋另一條唐排整咗呢碟豉椒炒排骨。

蒜頭豆豉蒸排骨

今日買咗唐排嚟蒸排骨，

老公話今次D排骨好味，

排骨唔肥又有肉味，

送飯一流呀!

來去匆匆返咗惠州

噚日同大魔怪和女朋友仔食咗飯後，

我和老公匆匆忙忙返咗惠州，

搭5點鐘永東巴士，

由蓮塘返到惠州的家，

估唔到呢班車有9成9滿座，

真係第一次見呀!

返到惠州的家都已經7點左右，

我哋係附近食埋晚餐先返屋企，

呢餐食咗￥90。

家常便飯

今日中午大魔怪和女朋友仔嚟食飯，

之後大家各自都有節目，

食完午飯坐一陣就去街喇!

我一早起身煲定湯，

今次煲湯好多料，

沙參玉竹蓮子百合淮山茨實圓肉，

加埋螺片花膠瑤柱煲豬腱，

啖湯好甜呀!

仲有自製蜜汁叉燒、香煎比目魚和生菜鮑魚。

家常便飯

呢排我都好似冇正正經經煮過一餐飯，

今日終於拎起心肝煮咗兩個餸做晚餐，

五香淮鹽煎雞翼和蝦仁炒青瓜，

簡簡單單又一餐。

皮蛋瑤柱瘦肉粥

呢排我腸胃唔多舒服，

胃酸特別多，

攪到胃口真係麻麻哋，

所以今日煲咗一大煲粥，

午餐和晚餐都係佢，

食清D，

希望可以舒緩下啦!

銀魚魷魚干蒸梅頭豬肉

呢排我胃酸倒流病又發作，

攪到我胃口麻麻哋，

晚餐我煮咗老公至愛嘅銀魚魷魚干蒸梅頭豬肉，

我只食咗少少，

一陣食藥早D瞓，

希望快D好番啦!

叉燒蛋炒飯

 

食剩幾件叉燒，

用嚟炒飯就最啱啦!

我加咗兩隻雞蛋和4棵菜芯落去一齊炒，

特別好味道呀!

馬蹄土魷蒸肉餅

呢個馬蹄土魷蒸肉餅，

我哋一家大細都鐘意食，

而且呢個餸送飯一流，

好味道呀!

遊車河

今日午飯後，

老公揸車車我和小魔怪返元朗舊屋執嘢，

未開車先食兩球雪糕解解暑先；

返到舊屋老公執咗好多大小魔怪嘅圖書，

又有佢哋嘅學生手冊和功課簿，

睇番佢哋寫嘅字好醜樣呀!

返到屋企5點半，

我哋去新北江食臺味冰點食下午茶餐，

呢餐食咗$130。

3月2夜惠州行

8月6日

我、老公和姑奶3個人，

返咗惠州小住3日呀!

係上水食完早餐後，

就去蓮塘口岸過關，

搭永東巴士去惠州，

一落車就去食午餐啦!

黑色暴雨的一天

呢幾日全香港經歷大暴雨，

不過今日特別嚴重呀!

我住嘅天水圍區都無一幸免，

我家附近嘅天瑞河都差不多滿瀉啦!

明天我和老公會返惠州，

所以簡單蒸咗碟馬蹄土魷蒸肉餅，

和灼埋碟菜芯做晚餐呀!

告別P牌仔

今日係小魔怪做P牌仔嘅最後一日；

買咗架車後，

老公有時間都會陪小魔怪練車，

一邊從旁指道，

小魔怪都學都唔少嘢架!

慢慢揸唔使急；

襯今晚停咗雨，

我哋又出發去練車啦!

佢哋揸咗去錦綉花園附近明悅軒食晚飯，

呢餐食咗$394，

之後又揸咗去天水圍行咗個圈就返屋企喇!

朱家豬腳薑

我見大家咁都鐘意食豬腳薑，

襯噚日去大魔怪家有聚會，

所以早在7月10日時，

我就開始準備整呢煲豬腳薑喇!

呢排天氣咁熱，

每次煲完薑醋待涼後，

我都會放番係雪櫃，

擺5~6日後，

又攞出嚟煲滾佢，

來來回回煲咗5次左右啦!

加咗豬腳和雞蛋後放雪櫃，

又浸多兩三日就食得啦!

家庭聚會

今日家庭聚會移師到大魔怪家進行，

我預早大半個月已經煮定一大煲薑醋，

前兩日加埋2隻豬手和30隻雞翼，

仲有一大盒咖哩豬皮蘿蔔魚蛋，

準備拎去大魔怪家開大食會呀!

豉汁涼瓜排骨

今日老公話想食涼瓜排骨，

必須安排啦!

買咗個雷公鑿苦瓜$11，

再買多$30腩排，

炆咗呢碟豉汁涼瓜排骨，

今餐1個餸2個人食，

足夠啦!

沙參玉竹蓮子百合淮山螺片煲豬腱

今日又有靚湯飲喇!

沙參玉竹蓮子百合淮山螺片煲豬腱，

我仲加咗瑤柱龍眼肉和蜜棗一齊煲，

呢淡湯好濃好香好好飲呀!

瑞士汁叉燒炒烏冬

噚晚買嘅燒味套餐實在太豐富，

我、老公和小魔怪根本食唔哂，

所以我將食剩嘅叉燒切絲，

用嚟炒咗呢個瑞士汁叉燒炒烏冬，

做咗我和老公嘅午餐呀!

燒味套餐

今日老公係屋企附近商場地下果間燒臘店，

買咗個燒味套餐，

燒鴨半隻和叉燒半斤，

仲送4隻豉油雞翼，

都係$135，

真係好抵食架!

新髮型

呢排天氣真係好熱，

日日都係35、36度，

所以我決定剪短頭髮喇!

今朝由早上9點坐到下午2點45分，

歷時5個小時45分鐘，

先剪短頭髮後局部漂染，

再做頭髮焗油兼拉直頭髮，

之後將頭髮染奶茶色和髮根染深色遮白頭髮，

仲有兩鬢染粉紅色，

好複雜呀！

蜜汁蒜蓉炒紅腸

 

打風前我已經買定紅腸做儲備，

不過儲備太多食物，

未有時間食呀!

今日終於有機會食，

係因為小魔怪突然話要返嚟食晚飯呀!

咸蛋黃雞翼

之前淘咗樽咸蛋黃醬返嚟，

今日就用佢嚟整咗咸蛋黃雞翼，

食落咸蛋黃醬唔係好咸，

但又有食咸蛋黃嘅流沙感覺，

又幾好喎!

兩個餸

今晚得兩個餸，

榨菜蒸豬肉和灼菜芯，

簡簡單單又一餐!

簡單食

呢排天氣真係唔知攪咩，

一時落大雨，

一時就曬到七彩，

日日34~35度，

熱到有哂胃口，

兼悶到唔想煮飯呀!

香煎叉燒

今日去豬肉檔買豬肉，

我叫肉檔哥哥幫我切3片梅頭肉$50，

梅頭肉用嚟整叉燒或豬扒就用啱啦!

今次我整叉燒呀!

懶得開焗爐和氣炸鍋，

最後落鑊慢慢煎，

都唔錯架!

冬瓜粟米紅蘿蔔薏米瑤柱煲排骨

 

今日大暑，

經過菜檔買咗2斤冬瓜嚟煲湯，

冬瓜連皮一齊煲，

有助祛去水腫呀!

韭菜花小炒皇

呢排街市賣嘅韭菜花特別脆嫩，

我買咗8蚊份量都唔少，

加咗甘筍、豬肉絲、魷魚乾和蝦乾一齊炒，

好惹味呀!

8、9和10號風球的一天

今日香港經驗8、9、10號風球，

再轉8和3號風球；

我早上落街唔覺大風但有雨，

食埋早餐就返屋企喇!

之後颱風來了，

天水圍大風又大雨，

老公自己落街感受10號風球嘅威力，

真係超級大風呀!

行路都有困難，

佢唔敢行遠，

只係附近行咗人個圈就返屋企啦!

打風就簡單煮，

豆豉鯪魚炒油麥菜、

豉汁涼瓜炒排骨、

香煎三文魚。

練泊車&大發餐廳

今日黃昏，

兩仔爺又去操車喇!

今次先去蝴蝶灣停車場練泊車，

來來回回練咗好幾十次，

小魔怪越來越進步了，

又去咗屯赤看日落；

之後揸車去洪口橋食晚餐~大發餐廳，

食飽飽落大雨，

佢哋車我先返屋企，

然後繼續去操車呀!

操車&銀龍茶餐廳

今日小魔怪終於攞咗部車喇!

我哋係元朗公園附近揸車，

之前老公揸慣日本車，

對歐洲車完全唔熟悉，

而且又冇揸車幾年，

所以真係要練多幾次車先可以出大馬路呀!

泊好部車，

就去天盛銀龍食晚餐，

今餐食咗$175。

青紅蘿蔔粟米螺片煲豬腱

今日煲咗青紅蘿蔔粟米螺片湯，

呢個湯全部材料都食得，

老公最鐘意架喇!

因為佢唔想嘥嘢，

可以食哂落肚就最好啦!

菜芯雞絲炆麵

之前買咗包蛋炒麵，

今日就用佢嚟整咗呢碟菜芯雞絲炆麵，

我煮咗兩個麵，

我和老公兩個人食量唔多，

啱啱好呀!

麵豉排骨蒸茄子

屋企有兩條幼身茄子，

用嚟炒係唔夠食，

所以今餐蒸麵豉排骨時，

用佢嚟舖底一齊蒸，

咁呢個餸就有茄子又有肉啦!

豆角午餐肉炒蛋

豆角午餐肉炒蛋，

我由細食到大，

食極都唔厭架!

沙爹洋蔥粉絲肥牛煲

小魔怪一向都係食肉怪獸，

所以每次佢係屋企食飯，

多多肉係唔少得架!

今餐有1磅肥牛煮俾佢食，

應該夠佢食啦!

近期食過咩

近期食過咩，

有買外賣，

又有自己煮，

總之以簡單為主啦!

豆角炒粒粒

其實我都幾鐘意煮炒粒粒嘅餸，

今日我就買咗$10豆角，

用咗一半嚟炒粒粒，

呢碟炒粒粒有豆角、豬肉粒、洋蔥和雞蛋，

全部炒埋一碟，

撈飯食一流架!

黑椒牛仔骨

噚日小魔怪WFH，

我除咗煲湯外，

仲煮咗佢至愛嘅黑椒牛仔骨添呀!

有黑椒汁和洋蔥撈飯，

今次仲唔添多D飯。

養生壺~花旗參石斛麥冬煲豬腱

今日靚湯，

養生壺~花旗參石斛麥冬煲豬腱，

配淮山玉竹蓮子百合龍眼肉蜜棗；

將所有材料(除花旗參外)放入養生壺內，

加入適量水按煲湯功能，

煲到最後15分鐘落花旗參，

熄火後落鹽調味便成。

花旗參有補氣養陰、生津清熱；

石斛有補腎養肝明目；

麥冬有抗心肌缺血、保護心腦血管、降血糖等功效。

元朗正記菜館

今日小魔怪終於做車主啦!

新牌仔唔使買咁貴咁靚嘅車，

等揸多幾年熟練下車技後，

再買新車都唔遲喎!

睇完車後，

老公請我哋去食飯，

慶祝小魔怪做車主，

小魔怪揀咗去正記食飯呀!

呢餐叫咗4個餸，

1碗白飯和2罐汽水，

加埋外賣盒一個，

呢餐食咗$533。

黑椒洋蔥豬扒

 

今日買咗4塊梅頭有骨豬扒，

用咗其中2塊整黑椒洋蔥豬扒，

估唔到2塊豬扒足夠我和老公兩個人食，

加埋黑椒汁，

老公添咗兩碗飯呀!