今日去肉檔買咗條五花腩肉，
叫肉佬幫我起埋塊豬皮，
腩肉都幾厚身，
有肥有瘦，
底部仲有少少軟骨添，
分開切咗佢出嚟一齊炆，
炆出嚟腩肉就唔使咁大件喇!
材料: 去皮腩肉1條、甜梅菜2棵、薑6片、紹酒1湯匙、冰糖粒適量
調味: 老抽1.5湯匙、豉油半湯匙(可自行調節)、熱水4碗
做法: 豬腩肉洗淨後，將豬腩肉、薑3片和紹酒1湯匙放入鑊內加水煮滾，
出水10分鐘後沖洗後切件備用；梅菜浸30分鐘後洗淨後切碎；
燒熱鑊(不需落油)落梅菜炒至乾身後，落少許麻油撈勻盛起；
燒熱鑊落少少油，加腩肉和薑3片炒勻後，加入冰糖粒繼續炒，
至腩肉有焦糖色後，落埋梅菜繼續快炒勻，
加入4碗熱水(或水蓋過腩肉)和調味，煮滾後轉小火炆1小時，
熄火唔好開蓋，飯前再開中小火炆多5分鐘便成。
大家可以入嚟Facebook讚下我新開嘅Fans專頁呀!
沒有留言 :
張貼留言
如果大家覺得我煮嘅餸菜啱哂口味嘅話，不妨留個言，鼓勵下我啦!