11月21日星期五，
因為大仔和新抱仔去咗旅行，
所以我就去咗大仔屋企，
同工人姐姐一齊湊朱小B五日；
第一眼見到朱小B，
佢影帝上身即刻扁咀，
一抱即收聲，
仲好好笑容添呀!
今次我買咗好多零食去大仔屋企，
平時牙痕我就隨時都有得食啦!
我每樣都分咗一半俾工人姐姐，
齊齊分享嘛!
老公食埋個午餐就返屋企，
我就繼續留底湊朱小B，
可能我肉地多，
佢扒係我身上特別易瞓得著呀!
晚餐工人姐姐整咗煎雞翼和炒西蘭花。
11月22日星期六，
一早朱小B見到我就微微笑，
由於工人姐姐每日都要去親家奶奶家照顧貓咪，
等佢一返嚟我就要去拜父親大人，
之後去咗沙田禾輋海港酒樓飲茶，
6個人食咗$865，
好似有D過份囉!
之後去妹妹新家打牌，
晚餐食壽司、pizza&chicken、
南京買嘅醬鴨和灼菜，
亞仔車我去大仔家都已經晚上11點幾，
朱小B已經瞓咗啦!
11月23日星期日，
等工人姐姐照顧完貓咪後，
我就輕輕鬆鬆去食個Brunch，
然後就買餸，
等老公和細仔過嚟探朱小B和食晚飯；
見仲有時間，
我、細仔和工人姐姐，
推朱小B落會所和公園行個圈，
朱小B見有得落街好興奮呀!
晚餐我親自教工人姐姐整鹽焗手撕雞、
蒜頭豆豉南瓜蒸排骨、蒜蓉炒菜心和松發肉骨茶，
工人姐姐第一次學整呢類餸，
佢大讚Yummy!
11月24日星期一，
今日朱小B呢一身造型好似條香腸咁，
好攪笑呀!
午餐我叫工人姐姐唔好煮，
我落會所買外賣，
順便我可以落街行下當做運動呀!
可能朱小B感應到爸爸媽媽都唔係屋企，
呢幾日超級嗲，
下下都要人抱先肯瞓，
一放底就喊，
好似好可憐咁；
晚餐就教咗工人姐姐煮咗蕃茄滑蛋燴牛肉碎、
煎倉魚和灼菜芯，
工人姐姐鐘意食蕃茄清滑蛋牛肉，
佢話撈飯食最啱呀!
今朝朱小B造型好可愛，
成隻老鼠仔咁，
好得意呀!
今晚大仔和新抱仔半夜返嚟，
我食埋個午餐後，
睇埋朱小B沖涼後，
老公大約3點半就嚟接我走喇!
唔知幾時又可以霸住玩朱小B幾日呢???
大家可以入嚟Facebook讚下我新開嘅Fans專頁呀!
沒有留言 :
張貼留言
如果大家覺得我煮嘅餸菜啱哂口味嘅話，不妨留個言，鼓勵下我啦!