兩餸飯

 呢排老公買親兩餸飯，

都好鐘意揀食魚，

佢話魚好抵食，

食極都唔厭呀!

星期日記趣

之前我去大仔家煲嘅薑醋差不多食哂，

噚日我又買咗2隻豬手和2隻豬腳過去，

繼續煲薑醋呀!

朱小B出生咗17日，

每次見佢都唔同樣，

仲越來越抵打，

抱起佢都幾墜手架!

中午大仔去大埔街市買餸兼買外賣，

晚餐我就教工人姐姐包粟米木耳豬肉餃，

大仔話要食芝士煎餃，

所以又包咗幾隻滿足下佢啦!

姨甥生日會

 姨甥仔亞諾27歲生日啦!

我哋提早幾日同佢一齊慶祝，

正日緊係留番俾佢同女朋友仔渡過啦!

姐姐叫咗到會美食加2個pizza，

焗咗M記雞翼、蒸蝦和西瓜，

仲有生日蛋糕，

呢餐好豐富呀!

香煎雞扒

老公夜晚要開業主會，

所以拿拿臨解凍2塊雞扒，

醃咗佢2~3個鍾就煎嚟食啦!

煎到塊雞皮脆卜卜，

真係好鬼正架!

粟米雞蛋炒雞丁

 

打風前我都冇去街市搶物資，

我見菜檔賣成$50斤菜，

好誇張囉!

我唔食菜都得，

咪食一餐罐頭粟米囉!

今餐煮呢個粟米雞蛋炒雞丁，

大人細路都啱食架!

樺加沙打到嚟

颱風樺加沙打到嚟，

噚日掛3和8風球期間，

成日都好似風平浪靜，

我好乖又煲湯又焗叉燒，

直到黃昏天水圍先開始有風有雨，

到半夜9和10號時，

我先俾D風雨聲嘈醒呀!

瞓醒先知個風破壞力都好強大喎!

探朱小B

朱小B過咗12朝啦!

噚日襯未打風，

我就陪母親大人一齊去探佢呀!

太婆第一次見朱小B，

佢話佢真係好抵打，

仲好似大仔添，

我哋食咗少少薑醋後就走，

因為下午佢哋小帶朱小B去健康院做檢查。

我就同母親大人去大埔新達廣場搵食，

仲買咗包瑤柱俾佢做中秋禮物。

晚餐叫pizza外賣，

呢間pizza都唔錯，

好味道呀!

飯聚

近日Anita由英國返咗嚟，

擇日不如撞日，

我哋噚晚約咗去沙田禾輋海港酒家食晚飯，

我哋11個人，

叫咗個$3999套餐~長腳蟹鮑魚龍躉套餐，

加$380轉燒鵝，

一路食一路傾，

好開心!

期待下年再聚一齊去旅行呀!

南乳芋頭炆腩排

就嚟中秋節，

呢排D芋頭特別粉，

今日我就買咗半個芋頭嚟炆腩排，

呢個餸細仔特別鐘意，

因為有佢至愛嘅芋頭，

飯都食多碗呀!

紫菜粟米墨魚滑雞蛋湯

突然好想飲湯，

屋企冇肉，

剩係有包759買嘅墨魚滑和罐頭粟米湯，

咁唯有飲罐頭湯啦!

家常便飯

今日係朱小B出生第九日，

原本我諗住明天過去大仔家煲豬腳薑，

但因為打風關係，

所以我提早一日過去呀!

等星期日12朝後，

親朋好友就可以食到豬腳薑啦!

晚餐我負責煮，

順便教下工人姐姐煮餸，

大仔話好耐冇食我煮嘅餸，

唔知好評定差評呢???

家常便飯

自從朱小B出生後，

我都好似好耐冇正正經經煮過飯，

今日煲咗湯~牛大力五指毛桃湯，

仲煮咗2個餸，

節瓜炆雞翼和蝦仁炒蛋。

返惠州辦事

9月16日星期二

我同老公一早返咗惠州，

約咗裝修公司傾新屋裝修事宜，

一路食一路傾，

呢餐客家菜都唔錯喎!

朱小B

9月13日

我要去大仔家幫忙照顧朱小B，

响大埔新達廣場食埋咗個早餐，

幫佢哋買咗少少嘢，

就即刻上去睇下出咗世4日嘅朱小B喇!

睇住朱小B，

真係好似大仔細細個時個樣架!

新抱仔訂咗月子餐，

每日都會送嚟，

啱哂佢坐月時食呀!

晚餐煲湯個木瓜魚尾湯，

冬菇蒸肉餅、白切雞和灼菜芯。

豉椒濕炒肉片河

 

今日新抱仔和BB出院啦!

親家母叫咗朋友幫忙接佢哋出院，

咁我哋在家可以休息一日，

明天和後天，

我就要出去幫忙幫忙，

減輕新手爸爸和媽媽嘅壓力，

好彩仲有親家母和工人姐姐幫手湊BB，

幾個大人湊1個B，

應該都湊得掂呀!

今晚晚餐食炒河粉，

豉椒濕炒肉片河，

濕濕哋易入口呀!

新手爺爺嫲嫲

噚日新抱仔清晨5點幾穿咗水，

大魔怪拿拿臨送佢去威爾斯醫院，

痛咗十幾個鐘，

自然分娩生咗朱小B呀!

呢個男孩子，

一出世咀嘟嘟，

真係好似大魔怪細個個樣架!

芥菜咸排骨煲

 

屋企仲有2棵大芥菜，

今日我就買咗條唐排嚟醃咸佢，

用埋果半盒清雞湯，

煮咗呢個芥菜咸排骨煲，

我和老公兩個人食，

今餐有湯有菜有肉，

簡單又好味道呀!

仲有我中午煲咗蕃薯糖水，

今晚食得好飽飽呀!

芥菜咸豬腱墨魚丸湯

今日8號風球，

打亂咗我上午專科覆診時間，

上次打風已經改咗一次期，

明天又要打去專科門診再約過新期喇!

屋企冇菜，

叫老公去買菜，

佢話唔知買咗咩菜返嚟，

原來佢買咗大芥菜；

大芥菜煮咩好，

摷下冰箱有舊咸豬腱和墨魚丸，

再加清雞湯滾咗個簡易湯水，

都唔錯架!

生日會

噚日正日生日，

我哋去咗海洋公園，

今日就母親大人、姐姐和妹妹一家，

齊齊入嚟天水圍同我慶祝生日。

老公負責買生日蛋糕，

我就負責煲湯、薑蔥手撕雞、炸蠔餅和炒XO醬蝦仁炒花菜，

其餘的餸菜就叫中式到會，

7款食品$1500，

每盆都好大盆，

我哋盡咗力都食唔哂呀!

未來新抱仔送咗個靚袋俾我，

多謝哂!

正日生日免費入海洋公園睇熊貓

自從老公退休後，

 

每年佢都話想係我生日果日，

同我去一次海洋公園，

但有咁啱得咁橋，

呢幾年年年都有D阻滯去唔成；

今年，

我哋終於有時間一齊去喇!

老公滿60歲入海洋公園係免費的，

而我生日當天入海洋公園亦都係免費，

但要係網上先預約，

入園前去票務處出示email確認信或QRcode，

和出示身份證，

換張入場劵就入得去架啦!

豆角薯仔炆肉片

我呢排真係好鬼hea，

完全冇心情去煮飯；

今日終於拎起心肝煮飯食，

摷到雪櫃有幾條豆角，

仲有兩個細薯仔，

買多廿蚊梅頭瘦肉落去一齊炒，

一碟餸，

夠食架啦!

走流程

9月1日星期一

今日我和老公又返惠州一趟，

因為我哋要簽合同喇!

網簽後兼錢到位嘅話，

走哂所有流程後，

我哋就可以收樓喇!

不過未返惠州前，

我哋先去蓮塘口岸食早餐￥47。