2013年5月31日 星期五

酥炸豆腐卜!


呢排太陽伯伯好勤力,

日日都出嚟同大家打招呼,

今日上水最高35度添呀!

就嚟熱溶我架啦!

 

2013年5月30日 星期四

味菜炒牛柳絲!


呢碟味菜炒牛柳絲,

係老公order嘅,

因為佢話好耐冇食咸酸菜喎!

問咗街市亞姐話呢個牌子嘅咸酸菜冇咁咸,

又真係冇介紹錯喎!

 

2013年5月29日 星期三

豉油皇炒麵和咸蛋冬瓜粒湯!


 
今日整呢個豉油皇炒麵,

成本廿零蚊咋,

已經足夠5個大人食,

又一次証明自己煮好過出街食呀!


 

2013年5月28日 星期二

豉椒炒蜆!


呢排真係黑到爆,

大型電器(熱水爐和煮食爐)壞已經換哂,

到小型電器(電腦和飯煲)都換埋,

依家又輪到冷氣機漏水,

唉,

又要破財啦!

今日去街市,

見到有一兜兜蜆賣,

廿蚊兜,

即刻買2兜嚟食,

我叫亞姐幫我磅過,

呢碟蜆有2斤6,

抵食呀!



 

2013年5月27日 星期一

藍莓芝士蛋糕!


 
聽日同事生日,

應承整個蛋糕賀一賀佢,

同事話想食藍莓芝士蛋糕!,

好啦!

一於整俾妳食啦!

見仲有3粒士多啤梨,

加埋落去做裝飾!

用得唔好嘥嘛!

 
 

2013年5月26日 星期日

母親大人的生日晚宴!

噚日係母親大人生日,

我哋係美林大酒樓訂咗一間房食飯兼打牌,
 
食飯前緊係要切蛋糕啦!

 

2013年5月25日 星期六

芒果mousse蛋糕!


 今日係母親大人生日,

祝母親大人生日快樂,

身體健康!

噚晚整咗個芒果mousse蛋糕,

呢個係我第一次整mousse蛋糕,

樣衰衰,

希望好食啦!
 

2013年5月24日 星期五

欖菜炒雜錦!


我話咗一星期起碼煮一兩碟素菜,

上星期炒咗羅漢齋,

今次就整咗欖菜炒雜錦;


其實素菜唔難食,

花少少心思就會炒得好味道架啦!



2013年5月23日 星期四

燒排骨配菜飯!


 噚日襯冇落咁大雨,

拿拿臨落街買餸;

同百佳賣新鮮豬肉嘅亞姐都幾好傾,

我次次賣親豬肉佢都揀舊靚嘅俾我,

有時我寫定紙仔叫工人姐姐代買都冇問題架!

今次我買咗3條腩排,

肥瘦適中,

超正呀!

2013年5月22日 星期三

糯米燕麥蒸丸子!


 
噚晚半夜果場風雨真係好鬼利害,

行雷閃電嘈到我都冇覺好瞓,

一早起身開電視睇天氣報告~黑雨!

再跟住睇到停課消息,

我又有一日額外假期啦!



 

2013年5月21日 星期二

鹵水豬腩肉、豆乾和蛋!


今日下午果場雨真係好勁,

行雷閃電,

風雨交加,

嚇到學校裡小朋友有部份喊哂口添!

放工後嗱嗱臨去買餸,

返屋企穩陣呀!

今日用咗懶人鹵水汁,

滷咗豬腩肉豆乾和蛋
!


2013年5月20日 星期一

黑椒雞軟骨!


 大小魔怪無雞不歡,

甚至連雞軟骨都唔放過架!

每次整呢個小食,

唔該加罐啤酒添吖!

 

2013年5月19日 星期日

出院!

 
今日老公接到醫院電話,

話奶奶可以出院啦!

醫生咩藥都冇開,

剩係寫咗張覆診信,

下月中覆診呀!

講俾大家知,

原來輪椅放入的士車尾箱入唔使額外收費o架,

遇到個好司機提醒,

讚呀!

 

猴頭菇螺頭湯!

 
今日廚房有小工程(整防漏邊),

6個鐘唔可以濕水呀!

咁我可以休息半日???

唔得,

我要煲湯呀!
 
 

2013年5月18日 星期六

白汁蘑菇雞絲燴意粉!

 

晨早巡blog,

見到blog友仔整白汁意粉,

睇到我好想食添,

一於自己整嚟食先得。

棄用一般罐頭白汁,

今次係自己煮架!

 
 

2013年5月17日 星期五

羅漢齋!

 
今日係佛誕假期,

加埋星期六日連續放3 假,

爽呀!

點都要應下節,

今朝午餐食齋菜!
 

2013年5月16日 星期四

肥叉!

 
今日我哋老師帶隊帶小朋友去沙灘,

冇太陽有微風,

仲要係我哋回程後先嚟落大雨,

真係好好彩!

食叉燒,

都係肥叉好食呀!

 

2013年5月15日 星期三

南乳燒雞髀配沙律!

 今日天氣實在太熱啦!

熱到唔想食飯添!

唔食飯食咩好???

南乳燒雞髀配薯仔蘋果菠蘿粟米沙律,

啱唔啱食呀???
 
 

2013年5月14日 星期二

油豆腐粉絲湯!


 
噚日先整完部洗衣機,

今日工人姐姐話我知個電飯煲襟唔著呀!

唔係嘛!

唔通個天想俾多D磨練我!


 

2013年5月13日 星期一

粥粉餐!


今年老公真係犯正太歲囉!

仲要係破財果隻添呀!

啱啱先換完個熱水爐和煮食爐;

年尾時換咗洗衣機電腦版,

噚日個洗衣機又排唔到水,

唔想再受原廠維修嘅氣,

於是求求其其搵個電器師傅整,

原來排水水泵壞咗,

承惠$750。

 

2013年5月12日 星期日

母親節晚餐!

 

今日係母親節,

我雀后祝大家母親節快樂!

今晚4位母親一齊過節(母親大人、奶奶、妹妹和我),

開心!


蔥頭雞


西蘭花炒蝦仁帶子


南乳蓮藕木耳炆排骨


燒鴨


燒肉

菜乾紅蘿蔔咸鴨腎瑤柱蜜棗豬展湯

 
 

大家可以入嚟Facebook讚下我新開嘅Fans專頁呀!

2013年5月11日 星期六

脆卜卜燒腩仔!



今日學校小朋友應邀出席屋苑舉辦嘅母親節表演,

雖說天氣炎熱,

但個個小朋友都表現十分落力,

值得讚賞呀!

 

 

2013年5月10日 星期五

蓮子百合紅豆沙!

 
今晚飯後甜品~蓮子百合紅豆沙,

真係起哂沙架,

熱食凍食都得!

煲紅豆沙究竟點樣先可以起沙???



 

2013年5月9日 星期四

蒜頭豆豉排骨蒸芋絲!


我個人喜歡食芋絲,

鐘意佢爽爽嘅感覺,

而且又係健康食品,

呢期啱我口味,

唔使食飯都夠飽肚呀!


 
 

2013年5月8日 星期三

沙爹金菇牛柳粉絲煲

 
好耐冇食牛牛啦!

大魔怪一見到呢個沙爹金菇牛柳粉絲煲時,

即刻大聲話:

正呀!
 

2013年5月7日 星期二

素鰻魚燴小棠菜!


呢碟素鰻魚燴小棠菜外表都呃得下人架!

尤其係大魔怪,

佢以為係鰻魚,

點知一食就話係齋嚟嘅,

哈哈,

佢都唔蠢得哂喎!
 

 

2013年5月6日 星期一

咖哩雜菜粒炒肉碎!


 
依家做家庭主婦梗係樣樣都要慳啦!

我平時會去街市菜檔買定一份份嘅蔬菜和配料,

等煮餸時隨時都有得用,

但有時用剩一兩個又點算好???

簡簡單單炒埋一碟,

咁咪又一碟餸囉!



 

2013年5月5日 星期日

沙參玉竹蓮子百合螺頭湯!


依家逢星期日,

我都會煲啖靚湯俾家人飲。

今日煲咗沙參玉竹蓮子百合螺頭湯,

適合煙酒過多、喉嚨乾燥,

糖尿病人最啱飲,

不過有感冒就唔啱飲啦!



2013年5月4日 星期六

Mr. Steak Buffet à la minute



噚日拋底大小魔怪和老公,
同朋友出街食自助餐。
我哋嚟咗呢間~Mr. Steak Buffet à la minute,
蠔係即開即食,
不過要排隊攞嘥哂D時間囉!
平日下午5:15-7:15每位$368(要加一),
呢個時段係最抵架啦!

海苔芝麻肉鬆包!


 
大魔怪部電腦hard disk壞咗,

跟手換埋個keybord和mouse,

加多個防毒軟件,

一張黃金牛唔見咗啦!

今日在百忙我都整咗肉鬆包,

不過記住食呢個包係一定要攞個碟墊住,

唔係就一地都係肉鬆架啦!

 
 

2013年5月3日 星期五

兒時小食~生菜魚肉豆腐湯!


好耐冇整呢個煲仔餸。

最近老公提起話好想食喎!

緊係要即刻開工,

10分鐘都唔使就有得食啦!


 

2013年5月2日 星期四

五一晚餐!


 
五一勞動節有咩節目???

梗係約埋屋企人打牌和煮飯仔啦!

今日我唔係大廚,

大廚係姐夫!

我主要係打牌和食呀!

不過我都有貢獻架,
五一勞動節有咩節目???

梗係約埋屋企人打牌和煮飯仔啦!

今日我唔係大廚,

大廚係姐夫!

我主要係打牌和食呀!

不過我都有貢獻架,

就係一早滷咗一磅豬腸啦!

煮咗8個餸,

大部份都係海鮮嚟架,

連材料買咗$450左右,

每家人都係$150,

抵過出街食啦!

2013年5月1日 星期三

西餅蛋糕製作精選實習班三(第八、九堂)

 
第八和九堂整嘅蛋糕,
 
熱情果芝士毛士蛋糕&法國歌劇蛋糕Opera,
 

兩個蛋糕唔只外型靚,仲好鬼好味道添呀!