2011年10月31日 星期一

蝦醬豬扒!

 
唔知係咪好耐冇捱夜打麻雀呢???

打咗16圈之嘛,

今朝起身竟然周身骨痛;

唔通老人病發作???

昨日煎咗個蝦醬豬扒俾母親大人佢哋食;

今日我用炸嘅方式嚟煮,

呢個豬扒有淡淡蝦醬味,

真係各有風味啊!


 







材料: 梅頭豬扒4塊、蛋1隻、6湯匙蕃薯粉、蒜蓉

醃料: 蝦醬1湯匙、豉油和老抽半茶匙、糖2湯匙、麻油和粟粉少許

做法: 洗豬扒解凍後切細塊,用醃料和蒜蓉醃半天;

蛋發勻備用;燒熱油鑊,將豬扒沾上蛋漿和蕃薯粉,

用中火放在油鑊裡炸,
撈起豬扒後,

轉用大火再炸一次,逼番豬扒其餘嘅油出嚟呀!
 




 
(呢個就係煎嘅蝦醬豬扒啦!)
 
 
 
 
 
大家可以入嚟Facebook讚下我新開嘅Fans專頁呀! 

2011年10月30日 星期日

Happy Day!

 

今日去咗探祈祈BB,

佢又抵打咗啦!

一見我就笑,

真係越大越似我呢個靚姨媽呀!

睇完BB梗係開枱打牌啦!

今日我大殺三方,

Win win win 呀!
 
 

2011年10月29日 星期六

客家豆腐卜煲!

 
因為自己唔係客家人,

又未食過真正客家豆腐卜煲,

所以好難想像佢嘅真正味道;

問問老公似唔似老爺整嘅味道,

佢話喎:

似唔似唔重要,

最梗要有自己嘅風格!

咁即係似唔似呀???

睇住屋企3個客家仔爭住食嘅反應,

答案擺在眼前啦!


(客家豆腐嘅精髓~豬肉碎係要用乾蔥頭和咸魚攪勻o架!)

 

2011年10月28日 星期五

鹽酥雞!

 
朋友仔成日話我鐘意食炸嘢,

係o架!

間唔中放縱吓自己,

舒緩壓力嘛!

但係,

我又好似冇咩壓力喎!

嘻嘻!



 

2011年10月27日 星期四

韓式牛柳炒洋蔥!

 
明天我校有哈囉喂活動,

今日我攞咗頂女巫帽出嚟,

俾定D小朋友睇,

等佢哋明天冇咁驚嚇呀!

多口問問小朋友我扮咩嘢造型???

細嘅小朋友梗係唔識答啦!

大嘅小朋友又梗係唔會答啦!

最後我同小朋友話:

我係扮靚女呀!


 (個個笑到反哂眼呀!)




2011年10月26日 星期三

冬菇栗子炆雞翼!

 
秋冬天係食栗子嘅時候啦!

我好鐘意買呢種栗子,

佢有個好靚嘅名~桂林錐,

外形似圓錐,

又易腍又甜,

真係冇佢我拎願唔食呀!

去栗子皮好簡單,

煲少少熱水放入栗子煮3分鐘左右,

逐少取出襯熱用刀輕輕由尖的部份挑起栗子皮,

咁就好易撕開栗子皮o架啦!

 
 

2011年10月25日 星期二

藥膳雞腳!


見呢排好似好攰咁,

係時候要煲呢個藥膳雞腳嚟嘆吓啦!

 

做女人間唔中都要飲吓佢,

補補骨膠原都好嘛!


 

2011年10月24日 星期一

梅子麵豉蒸排骨!


 
今日見浸完梅酒嘅青梅仲係個樽度,

於是攞咗D出嚟當零食,




原來浸完梅酒嘅青梅都幾好食,

我食咗幾粒後有D 醉添!

另外擺咗2粒梅子肉落D麵豉排骨裡面一齊蒸,

唔知好唔好味道呢???


 

2011年10月23日 星期日

收獲!


今次返中國布吉屋企時,

發覺屋企大門和鐵閘竟然冇鎖,

我和老公已經覺得好奇怪,

唔通上次返嚟冇鎖門就走人???
(不過老公話肯定唔會囉!)
另外廚房近鎖位置玻璃門離奇穿了一個大洞,

塊爛玻璃放係洗衣機面,

但又唔覺屋企有人入過嚟嘅痕跡,

(可能我屋企冇咩值錢嘢俾人偷掛???)

真係超奇怪呀!

下次返去要整門整防盜先得!

今次返中國,

我哋去書局買咗3本書,

仲有帶咗隻新鮮走地文昌雞返嚟呀!
 
 
 
 
 

 
大家可以入嚟Facebook讚下我新開嘅Fans專頁呀! 


新鮮走地文昌雞!

 
新鮮即係新鮮,

走地即係走地,

文昌雞即係文昌雞;

呢隻雞,

皮薄肉嫩,

少少肥膏都冇呀!

仲好有雞味添!

好懷念啊!


2011年10月21日 星期五

老婆靚湯~蓮藕鱆魚綠豆馬蹄排骨湯!


呢個星期我做咗好媽媽、好老婆,

因為平時懶我唔多煲湯,

今個星期我煲咗2次老火湯和1次滾湯;

不過,

成日都聽人話唔好飲隔夜湯,

尤其係菜湯,(冇益喎!)

之但係我次次買一大堆材料番嚟煲湯,

一餐肯定會飲唔哂,

又唔想煲少少湯嘥爐火喎!

好矛盾啊!
(靜靜話俾大家知,其實我鐘意飲隔夜湯o架!因為仲入味呀!)

 

2011年10月20日 星期四

蓮藕魚肉煎餅!

 
秋冬天除咗西洋菜靚靚外,

蓮藕亦都係好合時嘅食材嚟o架!

今日整咗個家鄉煎藕餅,

好啱一家大細食o架!

本來打算落多D蔥落去,

可惜D蔥係雪櫃入面爛哂呀!

又嘥咗我2蚊蔥啦!


 

2011年10月18日 星期二

魚肉豆腐生菜煲!

到了10月中啦!

呢排天氣開始涼涼哋,

早上返工好舒服呀!

我咁鐘意秋天,

就係因為有我鐘意食嘅煲仔餸囉!
 
 

2011年10月17日 星期一

香蕉蛋糕!

 
今日,

終於等到D香蕉起哂梅花點,

拿拿臨攞齊材料整香蕉蛋糕啦喂!
 

 

2011年10月16日 星期日

西洋菜咸鴨腎蜜棗南北杏排骨湯!(加果皮)


秋天天氣乾燥,

係時候要煲D湯潤一潤啦!

呢個湯係我家例湯之一,

秋冬天我成日會煲嚟飲o架!

 

2011年10月15日 星期六

健康萬歲今晚夜!


今次出席blog聚有:

由澳洲代表~Connie、美國代表~Jo 姐姐、

香港代表~美味娘娘、如月、Pansy、欣欣媽媽和欣欣、金魚和我。

聚會地點係頂好海鮮酒家。

呢餐係由一個健康用品所舉辦,

所有餸菜都好健康o架!

今晚由鄧英敏先生做司儀,

仲有好多電視明星係度唱歌添!

不過我哋一樣傾傾傾唔停,

今晚我好高興認識大家呀!
 
 

多謝欣欣媽媽嘅口金

多謝美味娘娘嘅禮物

 
 
 
 

 

 
 
大家可以入嚟Facebook讚下我新開嘅Fans專頁呀! 


 
 

2011年10月13日 星期四

冬瓜豆腐煲(加粉絲)!

 
今日上網睇新聞,

原來有一個颱風嚟梗啦~榕樹!

又係星期六日先嚟打風,

想話放假出去玩都唔得,

嘥哂我D假期啦!

2011年10月12日 星期三

芽菜手撕雞!

 
今日click入新版亞虎Blog又有新面貌喎!

冇以前咁單調,

仲話遲D會將最新回應擺番係最前面,

咁咪好囉,

唔使我哋搵得咁辛苦嘛!

 
 

2011年10月11日 星期二

洛神花!



 
 
 
同事幫我買咗新鮮洛神花,

呢度1磅$30,
有用咗大約半磅(約30粒),

去核,煲15分鐘,加冰糖;

飲落有少少酸酸甜甜,

好似利賓納味,

雪凍佢當水飲,

正呀!

五香肉丁腸仔蛋炒飯!

好唔鐘意呢D又濕又悶熱嘅日子;

最衰係今日學校部冷氣壞咗,

(仲唔知幾時先整番好添!)

以我咁怕熱,

簡直係慘慘慘呀!

放咗工即刻返屋企煲定D洛神花水,

等洛神花水凍咗就放入雪櫃雪凍佢嚟飲;

摷摷吓又俾我睇到有一大碗隔夜飯係度,

唔好嘥,

攞出嚟炒炒佢先得。


 

2011年10月9日 星期日

圍村盆菜!


今日,

我同老公跟姑奶入元朗某圍村食盆菜。

呢個盆菜宴本來10月1日食嘅,

因為打風所以改到今日先食囉!

呢個盆菜雖然冇平時食開嘅盆菜咁豐富,

盆菜裡面有:

客家炆豬肉、門鱔乾、門鱔、魚蛋、魷魚、豬皮、豆腐卜和咸酸菜,

但全部都係圍村人自己煮,

即煮即食,

呢D就係正宗圍村風味啦!
 
 

2011年10月8日 星期六

燒嘢食!

 

今日姑奶、惠州落嚟嘅親戚和1位朋友,

入咗元朗舊屋維修間祖屋,

老公興起話想燒嘢食,

所有我哋即刻買哂所有燒嘢食嘅食物,

其中露絲瑪莉全雞翼係我醃o架!

兩個人揸車入咗元朗舊屋啦!

(大小魔怪死都唔肯入去,話要打機喎!)